കനത്ത ഉഷ്ണം അനുഭവപ്പെടുന്ന ഈ സമയത്ത് കേരളത്തിൽ എസിയുടെ ഉപയോഗം വലിയതോതിലാണ് വർധിച്ചിരിക്കുന്നത്
ഒരു ടണ് എസി 12 മണിക്കൂര് പ്രവര്ത്തിപ്പിച്ചാല് ആറ് യൂണിറ്റ് വൈദ്യുതി ചെലവാകുമെന്നാണ് കെഎസ്ഇബി അറിയിക്കുന്നത്.
അതെതുടർന്ന് ഈ ചൂട് കാലത്ത് ഒരു ഭീമമായ വൈദ്യുതി ബില്ല് നിങ്ങൾക്ക് വന്നേക്കും. അതിനാൽ എസികാരണം വൈദ്യുതി ബില്ല് ഉയരാതിരിക്കാൻ ചില ടിപ്സ് പരിശോധിക്കാം
എസി വാങ്ങുന്ന സമയത്ത് ബി.ഇ.ഇ സ്റ്റാര് ലേബല് ശ്രദ്ധിക്കുക. 5 സ്റ്റാര് ആണ് ഏറ്റവും ഊർജ്ജ കാര്യക്ഷമത കൂടിയത്.
എസി ഘടിപ്പിച്ച മുറികളിലേക്ക് ജനലുകള്, വാതിലുകള്, മറ്റു ദ്വാരങ്ങള് എന്നിവയില്ക്കൂടി വായു അകത്തേക്കു കടക്കുന്നില്ലെന്ന് ഉറപ്പുവരുത്തുക.
ഫിലമെന്റ് ബള്ബ് പോലുള്ള ചൂട് പുറപ്പെടുവിക്കുന്ന ഉപകരണങ്ങള് എസിയുള്ള മുറിയില് നിന്ന് ഒഴിവാക്കുക.
എസിയുടെ ടെംപറേച്ചര് സെറ്റിങ് 22 ഡിഗ്രി സെല്ഷ്യസില് നിന്നും ഓരോ ഡിഗ്രി കൂടുമ്പോഴും 5% വരെ വൈദ്യുതി ഉപയോഗം കുറയും. അതിനാല് 25 ഡിഗ്രി സെറ്റ് ചെയ്യുന്നതാണ് ഉത്തമം.
എസിയുടെ ഫില്ട്ടര് എല്ലാ മാസവും വൃത്തിയാക്കുക.
എസിയുടെ കണ്ടെന്സര് യൂണിറ്റ് കഴിയുന്നതും വീടിന്റെ തെക്ക് പടിഞ്ഞാറ് ഭാഗത്ത് ഘടിപ്പിക്കാതിരിക്കുവാൻ ശ്രദ്ധിക്കുക. കേരളത്തിൽ ഏറ്റവും കൂടുതൽ സൂര്യപ്രകാശം ലഭിക്കുന്നത് തെക്ക് പടിഞ്ഞാറ് ഭാഗത്ത് നിന്നാണ്. വൈകുന്നേരത്തെ വെയിലിന്റെ ചൂട് ഏറ്റവുമധികം ഉണ്ടാവുക തെക്കു പടിഞ്ഞാറ് ഭാഗത്തായിരിക്കുമല്ലോ.
കണ്ടൻസർ ഇരിക്കുന്ന ഭാഗം ചൂടുള്ളതായാൽ സ്വാഭാവികമായും ഊർജ്ജനഷ്ടം കൂടും. കണ്ടെന്സറിന് ചുറ്റും ആവശ്യത്തിന് വായു സഞ്ചാരം ഉറപ്പു വരുത്തുക.