రెండు కప్పుల బియ్యంతో అన్నం వండి పెట్టుకోండి. ఆ అన్నంలో ఒక టేబుల్ స్పూన్ నువ్వుల నూనె, కొద్దిగా పసుపు, ఉప్పు, కరివేపాకులు వేసి కలిపి పక్కన పెట్టుకోండి.
స్టవ్ పైన కళాయి పెట్టి అందులో మూడు స్పూన్ల నువ్వులు, 10 ఎండుమిర్చి వేసి వేయించుకొని.. మిక్సీ జార్లో మెత్తగా పొడి చేసుకుని పక్కన పెట్టుకోవాలి.
ఇప్పుడు మళ్లీ స్టవ్ మీద మరొక కళాయి పెట్టి ఒక స్పూన్ నువ్వుల నూనె వేసి అందులో.. ఆవాలు వేసి చిటపటలాడించండి.
అందులో ఒక స్పూన్ మినప్పప్పు, ఒక స్పూన్ శనగపప్పు, వేరుశెనగ పలుకులు, 2 ఎండుమిర్చి వేసి వేయించండి.
మరొక గిన్నె స్టవ్ మీద పెట్టి అందులో కొంచెం నూనె వేయండి. అందులో ఒక పచ్చిమిర్చి వేయించి.. ఇప్పుడు నానబెట్టిన చింతపండు రసాన్ని కూడా వేసి అది దగ్గరగా మరిగే వరకు ఉడికించండి.
ఇందులో కొద్దిగా బెల్లం తురుము, ముందుగా వేయించి పెట్టుకున్న వేరుశెనగ పలుకులు, మినప్పప్పు, శనగపప్పుల మిశ్రమాన్ని కూడా వేసి కలిపి స్టవ్ ఆఫ్ చేయండి.
ఇప్పుడు ఈ మిశ్రమాన్ని, నువ్వుల పొడిని వేసి అన్నాన్ని పొడి పొడిగా కలుపుకోండి. అంతే టేస్టీ నువ్వుల చింతపండు పులిహోర రెడీ.