କଳିଙ୍ଗ ଷ୍ଟାଡିୟମକୁ ପୁଣି ଫେରିଛି ହକି କ୍ରେଜ୍, ମୁହାଁମୁହିଁ ହେଲେ ପୋଲିସ ହକି ଟିମ୍

ଶାନ୍ତସ୍ୱରୂପ ରାଉତ, ଭୁବନେଶ୍ୱର: କଳିଙ୍ଗ ଷ୍ଟାଡିୟମକୁ ପୁଣି ଫେରିଛି ହକି କ୍ରେଜ୍ । ମୁହାଁମୁହିଁ ହେଲେ ପୋଲିସ ହକି ଟିମ୍ । ଭୁବନେଶ୍ୱରରେ ଆରମ୍ଭ ହୋଇଛି ୬୮ତମ ସର୍ବଭାରତୀୟ ପୋଲିସ ହକି ପ୍ରତିଯୋଗୀତା । ଆନୁଷ୍ଠାନିକ ଭାବେ ସପ୍ତମ ବାଟାଲିୟନରେ ଏହାର ଉଦଘାଟନ କରିଛନ୍ତି ପୋଲିସ ମହାନିର୍ଦ୍ଦେଶକ । ଆୟୋଜକ ଭାବେ ଓଡ଼ିଶା ପୋଲିସ ପ୍ରଥମ ଥର ପାଇଁ ଏହି ପ୍ରତିଯୋଗୀତା ଭୁବନେଶ୍ୱରରେ ଆୟୋଜନ କରିଛି । ଆଜିଠାରୁ ଆସନ୍ତା ୨୪ ତାରିଖ ପର୍ଯ୍ୟନ୍ତ ଏହାର ସମସ୍ତ ମ୍ୟାଚ କଳିଙ୍ଗ ଷ୍ଟାଡିୟମରେ ଖେଳାଯିବ । ଯାହାକୁ ନେଇ ଖେଳାଳୀଙ୍କ ମଧ୍ୟରେ ବେଶ୍ ଉତ୍ସୁକତା ଦେଖିବାକୁ ମିଳିଛି ।

ଏହାର ଉଦଘାଟନୀ ଉତ୍ସବରେ ମୁଖ୍ୟ ଅତିଥିଭାବେ ପୋଲିସ ମହାନିର୍ଦ୍ଦେଶକ ତଥା ପ୍ରତିଯୋଗୀତା ପରିଚାଳନା କମିଟି ଅଧ୍ୟକ୍ଷ ଶ୍ରୀ ଅଭୟ ଯୋଗ ଦେଇ ପ୍ରଥମେ ପରେଡ୍ ଅଭିବାଦନ ଗ୍ରହଣ କରିଥିଲେ । ଏହାସହ ଖେଳୀଳିଙ୍କୁ ସ୍ୱାଗତ କରିବା ସହ ଶୁଭେଚ୍ଛା ଜଣାଇଲେ ।ଏଥିରେ ବିଭିନ୍ନ ରାଜ୍ୟ ଓ କେନ୍ଦ୍ରୀୟ ବଳର ମୋଟ ୨୫ ଟିମ ଭାଗ ଦେଇଛନ୍ତି । ମୋଟ ୫୦୦ ପ୍ରତିଯୋଗୀ ଅଂଶ ଗ୍ରହଣ କରିଥିବା ବେଳେ ରାଜ୍ୟ ପୋଲିସ ଦଳ ଓ କେନ୍ଦ୍ରୀୟ ପୋଲିସ ଦଳରୁ ମଧ୍ୟ ପ୍ରାୟ ୨୦୦ ଜଣ ପ୍ରଶିକ୍ଷକ ଓ ଅଧିକାରୀ ସାମିଲ ରହିଥିବା ଆଇଜି ଅପରେସନ ଅମିତାଭ୍ ଠାକୁର କହିଛନ୍ତି ।

ଏହି ପ୍ରତିଯୋଗୀତା ଲିଗ୍ କମ୍ ନକ୍ ଆଉଟ୍ ଆଧାରରେ ଖେଳାଯିବ । ସେପଟେ ଖେଳାଳିମାନେ ମଧ୍ୟ ମ୍ୟାଚ ପୂର୍ବରୁ କଳିଙ୍ଗ ଷ୍ଟାଡିୟମରେ ଦମଦାର ଅଭ୍ୟାସ ଆରମ୍ଭ କରିଦେଇଥିଲେ । ବିଶେଷ କରି ହକି ବିଶ୍ୱକପର ସଫଳ ଆୟୋଜନ କରି ଇତିହାସ ରଚିଥିବା କଳିଙ୍ଗ ଷ୍ଟାଡିୟମରେ ଖେଳିବାର ସୁଯୋଗ ପାଇଥିବାରୁ ଗର୍ବିତ ଓ ପରସ୍ପର ମଧ୍ୟରେ ଉତ୍ତମ ବନ୍ଧୁତ୍ୱପୂର୍ଣ୍ଣ ବାତାବରଣ ରଖି ଭଲ ପ୍ରଦର୍ଶନ କରିବାକୁ ଆଶା ରଖିଥିବା ବିଭିନ୍ନ ଟିମର ଖେଳାଳିମାନେ କହିଛନ୍ତି ।

ତେବେ ଭାରତୀୟ ହକି ଟିମ୍ ର କ୍ୟାପଟେନ ମନପ୍ରିତ ସିଂଙ୍ଗଙ୍କ ସମେତ ଆଉ ଦୁଇ ଜଣ ଜାତୀୟ ସ୍ତରର ଖେଳାଳୀ ପଞ୍ଜାବ ଟିମରେ ଖେଳିବାର ସମ୍ଭାବନା ଥିବା ଜଣାପଡିଛି । ଆସନ୍ତା ୨୪ ତାରିଖରେ ଏହାର ଫାଇନାଲ ମ୍ୟାଚ ଖେଳାଯିବା ସହ ଉଦଯାପନ ହେବ ।