Weather Update : ଆଉ ଦୁଇ ଦିନ ଜଳିବ ଚାରି ଜିଲ୍ଲା, ଉପକୂଳ ଓ ଦକ୍ଷିଣରେ ଝଡ଼ବର୍ଷା

ଭୁବନେଶ୍ୱର: ମୌସୁମୀ ଆସିବା ପୂର୍ବରୁ ରାଜ୍ୟବାସୀଙ୍କୁ ଉଭୟ ଗ୍ରୀଷ୍ମ ପ୍ରବାହ ଓ କାଳବୈଶାଖୀ କଲବଲ କରୁଛି। ପଶ୍ଚିମ ଓଡିଶାରେ ହିଟ୍ ୱେଭ୍ ପରିସ୍ଥିତି ଦେଖା ଦେଇଥିବା ବେଳେ ଉତ୍ତର, ଉପକୂଳ, ଆଭ୍ୟନ୍ତରୀଣ ଓ ଦକ୍ଷିଣ ଜିଲ୍ଲାରେ ଝଡବର୍ଷା ହେବା ସମ୍ଭାବନା ରହିଛି। ଏଥିପାଇଁ ଆସନ୍ତା ଦୁଇ ଦିନ ପାଇଁ ଉଭୟ ଝଡବର୍ଷା ଓ ଗ୍ରୀଷ୍ମ ପ୍ରବାହ ନେଇ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।

ଆଞ୍ଚଳିକ ପାଣିପାଗ କେନ୍ଦ୍ରର ପୂର୍ବାନୁମାନ ଅନୁସାରେ, ରାଜ୍ୟରେ ଆଉ ଦୁଇ ଦିନ ଗ୍ରୀଷ୍ମ ପ୍ରବାହ ସହ ଝଡବର୍ଷା ହେବ। ରବିବାର ଓ ସୋମବାର ବରଗଡ, ବଲାଙ୍ଗିର, ବୌଦ୍ଧ ଓ ସୁବର୍ଣ୍ଣପୁରରେ ମୁଣ୍ଡଫଟା ଖରା ହେବ। ସେଥିପାଇଁ ଏହି ଚାରି ଜିଲ୍ଲାରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ରବିବାର ସକାଳୁ ଉପକୂଳ ଓ ଉତ୍ତର ଓଡିଶାର ୧୩ ଜିଲ୍ଲାରେ ଝଡବର୍ଷା ସହ ବଜ୍ରପାତ ସମ୍ଭାବନା ଅଛି। 

ବର୍ଷା ଓ ବଜ୍ରପାତ ନେଇ ରବିବାର ପାଇଁ ଅନୁଗୁଳ, କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, ଦେବଗଡ, ଖୋର୍ଦ୍ଧା, ପୁରୀ, ଜଗତସିଂହପୁର, କଟକ, ଭଦ୍ରକ, ଯାଜପୁର, ବାଲେଶ୍ୱର ଓ କେନ୍ଦ୍ରାପଡାକୁ ପାଣିପାଗ ବିଭାଗ ୟେଲୋ ୱାର୍ଣ୍ଣିଂ ଜାରି କରିଛି। ସେହିପରି ସୋମବାର ଦକ୍ଷିଣ ଓଡିଶାରେ ବର୍ଷା ହେବ। ଜୁନ ୬ ତାରିଖ ପାଇଁ ମୟୂରଭଞ୍ଜ, କେନ୍ଦୁଝର, ଅନୁଗୁଳ, କନ୍ଧମାଳ, ଗଞ୍ଜାମ, ଗଜପତି, ରାୟଗଡା, କୋରାପୁଟକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।

ଅନ୍ୟପଟେ ମଙ୍ଗଳବାର ୬ ଜିଲ୍ଲା ଯଥା- ମୟୂରଭଞ୍ଜ, ରାୟଗଡା, କୋରାପୁଟ, ନବରଙ୍ଗପୁର, କଳାହାଣ୍ଡି ଓ ମାଲକାନଗିରିରେ ଝଡବର୍ଷା ହେବା ସମ୍ଭାବନା ଅଛି। ସେହିପରି ବୁଧବାର ରାୟଗଡା, କୋରାପୁଟ, ନବରଙ୍ଗପୁର, ଗଞ୍ଜାମ, କନ୍ଧମାଳ, ଗଜପତି ଓ ମାଲକାନଗିରିରେ ବର୍ଷା ହୋଇପାରେ। ଖୁବଶୀଘ୍ର ରାଜ୍ୟରେ ମୌସୁମୀ ବାୟୁ ପ୍ରବେଶ କରିବ। ତେବେ ଏହା କେବେ ଓଡିଶା ଆସିବ ସେ ନେଇ କୌଣସି ନିଦ୍ଧିଷ୍ଟ ତାରିଖ ଘୋଷଣା ହୋଇ ନାହିଁ, କିନ୍ତୁ ଜୁନ ଦ୍ୱିତୀୟ ସପ୍ତାହରେ ମୌସୁମୀ ଆସିପାରେ।

ସୂଚନାଯୋଗ୍ୟ, ଗତ ୨୪ ଘଣ୍ଟାରେ ପଶ୍ଚିମ ଓଡିଶାରେ ରାଜ୍ୟର ସର୍ବାଧିକ ତାପମାତ୍ରା ରେକର୍ଡ କରାଯାଇଥିଲା। ଶନିବାର ବଲାଙ୍ଗିରରେ ୪୫, ଟିଟିଲାଗଡରେ ୪୪.୮ ଡିଗ୍ରୀ ସେଲସିୟସ ତାପମାତ୍ରା ଥିବା ବେଳେ ସମ୍ବଲପୁର ଓ ସୋନପୁରରେ ତାପମାତ୍ରା ୪୪.୭ ଓ ୪୪.୫ ଡିଗ୍ରୀ ସେଲସିୟସ ଥିଲା। ସେହିପରି ଅନ୍ୟ ୯ଟି ସ୍ଥାନରେ ୪୦ରୁ ୪୩ ଡିଗ୍ରୀ ରେକର୍ଡ କରାଯାଇଛି। ରାଜଧାନୀ ଭୁବନେଶ୍ୱରରେ ଶନିବାର ସର୍ବାଧିକ ତାପମାତ୍ରା ୩୫.୭ ଡିଗ୍ରୀ ସେଲସିଅସ ଥିଲା।