ଜୁଆ ଆଡ୍ଡାରେ ପୋଲିସ ରେଡ୍; ୧୭ ଗିରଫ, ବିପୁଳ ଟଙ୍କା ଜବତ

କନ୍ଧମାଳ: ଜୁଆ ଆଡ୍ଡା ଉପରେ ପୋଲିସର ଚଢ଼ାଉ। ଦାରିଙ୍ଗବାଡ଼ି ପୋଲିସ ଶୁକ୍ରବାର ସକାଳୁ ସକାଳୁ ବସଷ୍ଟାଣ୍ଡ ନିକଟରେ ଚାଲିଥିବା ଏକ ଜୁଆ ଆଡ୍ଡା ଉପରେ ଚଢ଼ାଉ କରିଥିଲା। ଚଢଉ ବେଳେ ୧୭ ଜଣ ଜୁଆଡିଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ପୋଲିସ ନଗଦ ୬୨ ହଜାର ୮୬୦ ଟଙ୍କା ସମେତ ୯ ଟି ମୋବାଇଲ ଜବତ କରିଛି।

ସୋରଡା ଥାନା ଅଂଚଳର କୁରକୁରେ ବ୍ୟବସାୟୀ ଗୌରୀ ଶଙ୍କର ପାଢ଼ୀ ବସଷ୍ଟାଣ୍ଡ ନିକଟରେ ଏକ ଘର ଭଡା ନେଇ ବହୁ ଦିନ ଧରି ଜୁଆ ଆଡ୍ଡା ଚଳାଇ ଆସୁଥିଲେ। ଯେଉଁଥିରେ ଦାରିଙ୍ଗବାଡି ଅଞ୍ଚଳର ସଞ୍ଜୟ ପ୍ରଧାନ ନାମକ ଜଣେ ଅଟୋ ଚାଳକ ଏଥିରେ ତାଙ୍କୁ ସାହାଯ୍ୟ କରିଆସୁଥିଲେ। ଆଉ ଏହି ଦୁଇଜଣ ମିଳିମିଶି ଜୁଆ ଆଡ୍ଡା ଚଳାଇଥିବା ବେଳେ ପୋଲିସକୁ ହାତରେ ରଖି ଆଡ୍ଡା ଚଳାଉଥିବା ଜୁଆ ଖେଳାଳିମାନଙ୍କୁ କହୁଥିଲେ। ଫଳରେ ଦୀର୍ଘଦିନ ଧରି ଏହି ଆଡ୍ଡା ଏଭଳି ପ୍ରତିଦିନ ଜମୁଥିଲା।

ଆଉ ଗୁରୁବାର ଦୀପାବଳି ଥିବାରୁ ଜୁଆଡିଙ୍କ ସଂଖ୍ୟା ଅତ୍ୟଧିକ ହୋଇଥିଲା। ହେଲେ ଶୁକ୍ରବାର ସକାଳୁ ଖବର ପାଇ ଥାନା ଅଧିକାରୀ କୌଶିକ ମାଝୀଙ୍କ ନେତୃତ୍ୱରେ ଏକ ଟିମ ଜୁଆ ଆଡ୍ଡା ଘର ଉପରେ ଚଢ଼ାଉ କରିଥିଲେ। କିନ୍ତୁ ଆଶା ଠାରୁ କମ ପରିମାଣର ଚଢ଼ାଉ ହୋଇଥିବା ବେଳେ ଅନେକ ପୂର୍ବରୁ ଖବର ପାଇ ସେଠୁ ପଳାଇଯାଇଥିବା ଜଣାପଡିଛି।