ବୋରଓ୍ୱେଲରେ ଖସି ପଡ଼ିଲା ୫ ବର୍ଷର ଶିଶୁ, ଆଉ ତା`ପରେ...

ମୁମ୍ବାଇ: ମହାରାଷ୍ଟ୍ରର (Maharastra) ଅହମ୍ମଦନଗର (Ahmednagar) ଜିଲ୍ଲାର ଏକ ୧୫ ଫୁଟ ଗଭୀର ବୋରୱେଲରେ (Borewell) ପଡ଼ିଯିବା ପରେ ଜଣେ ପାଞ୍ଚ ବର୍ଷର ବାଳକର ମୃତ୍ୟୁ ଘଟିଛି। ପ୍ରାୟ ୯ ଘଣ୍ଟା ଧରି ବୋରୱେଲରେ (Borewell) ଫସି ରହିବା ପରେ ଶିଶୁଟିର ମୃତ୍ୟୁ ହୋଇଥିଲା। ମୃତ ଶିଶୁ ଜଣକ ତନ୍ମୟ ସାହୁ (Tanmay Sahoo) ବୋଲି ଜଣାପଡ଼ିଛି। ସୋମବାର ବିଳମ୍ବିତ ରାତିରେ ଯେତେବେଳେ ପିଲାଟି ବୋରୱେଲରୁ ଉଦ୍ଧାର କରାଯାଇଥିଲେ ମଧ୍ୟ ତାଙ୍କ ଜୀବନ ରକ୍ଷା ହୋଇପାରି ନଥିଲା। ପୁଣେ ସହରଠାରୁ ପ୍ରାୟ ୧୨୫ କିଲୋମିଟର ଦୂରରେ ଥିବା କରଜତ ତହସିଲର କୋପାର୍ଡି ଗ୍ରାମରେ ଏହି ଘଟଣା ଘଟିଥିଲା।

ଶିଶୁଟି ବୋରୱେଲରେ ପଡ଼ିଥିବାର ଖବର ପାଇବା ପରେ ଆମ୍ବୁଲାନ୍ସ ଏବଂ ଅନ୍ୟାନ୍ୟ ଡାକ୍ତରୀ ଦଳଙ୍କୁ ଘଟଣାସ୍ଥଳରେ ପ୍ରସ୍ତୁତ ରଖାଯାଇଥିଲା। ଘଟଣାସ୍ଥଳରେ ଉପସ୍ଥିତ ଥିବା ଏନଡିଆରଏଫ ଅଧିକାରୀଙ୍କ ଅନୁଯାୟୀ, ସୋମବାର ସନ୍ଧ୍ୟା ପ୍ରାୟ ୪ଟା ସମୟରେ ପିଲାଟି ବୋରୱେଲରେ ପଡ଼ିଯାଇଥିଲା। ନାବାଳକଟି ୧୫ଫୁଟ ଗଭୀରରେ ଫସି ରହିଥିଲା। ଏହି ଘଟଣା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ ବିପର୍ଯ୍ୟୟ ମୁକାବିଲା ଫୋର୍ସ (ଏନଡିଆରଏଫ) ର ଏକ ଟିମ୍ ସ୍ଥାନୀୟ ପୋଲିସ ଏବଂ ଜିଲ୍ଲା ପ୍ରଶାସନ କର୍ମଚାରୀଙ୍କ ସହ ଘଟଣାସ୍ଥଳରେ ପହଞ୍ଚିଥିଲେ।

ପୋଲିସର ସୂଚନାନୁସାରେ, ଜଣେ ଆଖୁଚାଷୀଙ୍କ ପୁଅ ଖେଳୁଥିବା ସମୟରେ ବୋରୱେଲରେ ପଡ଼ିଯାଇଥିଲା। ସୂଚନା ପାଇବା ପରେ NDRF ର ପାଞ୍ଚଟି ଟିମ୍ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିବା ଆରମ୍ଭ କରିଥିଲେ। ରାତି ପ୍ରାୟ ସାଢେ ଦୁଇଟା ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଥିଲା। 

ସୂଚନାନୁସାରେ, ଶିଶୁର ପିତା ମଧ୍ୟପ୍ରଦେଶର ବୁରହାନପୁର ତାଲୁକା ଅନ୍ତର୍ଗତ ଚିଡିଆପୁର ବାସିନ୍ଦା। ଆଜିକାଲି ସେ କୋପାର୍ଡିର ସନ୍ଦୀପ ଜିଆଣ୍ଡେଭ ସୁଦ୍ରିକଙ୍କ ଆଖୁ କ୍ଷେତରେ ଆଖୁ ଫସଲ ଅମଳ କରିବାକୁ ଆସିଥିଲେ। ଏହି ସମୟରେ ତାଙ୍କ ପୁଅ ଖେଳୁଥିବା ସମୟରେ ଫାର୍ମ ନିକଟରେ ଥିବା ବୋରୱେଲରେ ପଡ଼ିଯାଇଥିଲା। ପିଲାଟି ବୋରୱେଲରେ ପଡ଼ିଥିବାର ଜାଣିବା ମାତ୍ରେ ତାଙ୍କୁ ବାହାରକୁ ଆଣିବା ପାଇଁ ବୋରୱେଲ ସହିତ ସମାନ୍ତରାଳ ଭାବରେ ଦୁଇଟି ଜେସିବି ସାହାଯ୍ୟରେ ଖୋଳିବା କାର୍ଯ୍ୟ ଆରମ୍ଭ ହୋଇଥିଲା। ସେପଟେ ଏହି ଖବର ପାଇବା ପରେ ପୋଲିସ ନୀରିକ୍ଷକ ସତୀଶ ଗାଓ୍ୱିତ ପୋଲିସ କର୍ମୀ ଶ୍ୟାମ ଯାଦବ, ଗୋବର୍ଦ୍ଧନ କଦମ, ରାହୁଲ ଖରାତ ଓ ଜିତେନ୍ଦ୍ର ସରୋଦଙ୍କ ସହିତ ଘଟଣାସ୍ଥଳରେ ପହଞ୍ଚିଥିଲେ। ଗ୍ରାମବାସୀଙ୍କ ସହାୟତାରେ ଉକ୍ତ ନାବାଳକକୁ ଉଦ୍ଧାର କରିବାକୁ ପ୍ରୟାସ କରିଥିଲେ।