Weather Update:  ନୂଆଦିଲ୍ଲୀ: ତମାମ ଦେଶରେ ଏବେ ଶୀତ ଲହରୀ ଜାରି ରହିଛି। ଉତ୍ତର ଭାରତ ଠାରୁ ଆରମ୍ଭ କରି ଦକ୍ଷିଣ ଭାରତ ସମସ୍ତ ରାଜ୍ୟରେ ଏବେ ଶୀତର ରାଜୁତି। ରାଜସ୍ଥାନ ସମେତ ସମଗ୍ର ଉତ୍ତର ଭାରତ ଶୀତ ଜାଡ଼ରେ ଥରୁଛି। ପାର୍ବତ୍ୟରେ କ୍ରମାଗତ ତୁଷାରପାତ ହେତୁ ସମତଳ ଅଞ୍ଚଳରେ ପ୍ରବଳ କାଲୁଆ ପବନ ଫଳରେ ଶୀତ ବୃଦ୍ଧି ପାଇଛି। ଭାରତୀୟ ପାଣିପାଗ କେନ୍ଦ୍ର (ଆଇଏମଡି) ଆସନ୍ତା ପାଞ୍ଚ ଦିନ ପାଇଁ ଏଭଳି ସ୍ଥିତି ରହିବ ବୋଲି ପୂର୍ବାନୁମାନ ଜାରି କରିଛି। ଆଇଏମଡି ଦ୍ୱାରା ପ୍ରକାଶିତ ରିପୋର୍ଟ ଅନୁଯାୟୀ, ଆଗାମୀ ପାଞ୍ଚ ଦିନ ପାଇଁ ରାଜସ୍ଥାନ, ଦିଲ୍ଲୀ-ଏନସିଆର, ପଞ୍ଜାବ, ହରିୟାଣା ଏବଂ ଇଷ୍ଟର୍ଣ୍ଣ ୟୁପି ଅଞ୍ଚଳରେ ବହୁତ ଘନ କୁହୁଡି ହେବାର ସମ୍ଭାବନା ରହିଛି। ପାହାଡ ଅଞ୍ଚଳରେ ତୁଷାରପାତ ହେତୁ ଥଣ୍ଡା ପବନ ବହୁଛି, ଯାହା ଥଣ୍ଡାକୁ ବଢାଇ ଦେଇଛି। 


COMMERCIAL BREAK
SCROLL TO CONTINUE READING

ଭାରତୀୟ ପାଣିପାଗ କେନ୍ଦ୍ରର ରିପୋର୍ଟ ଅନୁଯାୟୀ ଆସନ୍ତା ପାଞ୍ଚ ଦିନ ମଧ୍ୟରେ ରାଜସ୍ଥାନ, ପଞ୍ଜାବ, ହରିୟାଣା ଏବଂ ପୂର୍ବ ଉତ୍ତରପ୍ରଦେଶର କେତେକ ଅଞ୍ଚଳରେ ଘନ କୁହୁଡ଼ି ହୋଇପାରେ। ବିହାର, ମେଘାଳୟ ଏବଂ ତ୍ରିପୁରାରେ ମଧ୍ୟମରୁ ହାଲୁକା କୁହୁଡି ହୋଇପାରେ। ଆସନ୍ତା ଦୁଇ ଦିନ ମଧ୍ୟରେ ସର୍ବନିମ୍ନ ତାପମାତ୍ରା ଉତ୍ତର-ପଶ୍ଚିମ ଏବଂ ମଧ୍ୟ ଭାରତ ଉପରେ ହ୍ରାସ ପାଇପାରେ।


ଜାଡ଼ରେ ଥରୁଛି ଦିଲ୍ଲୀ
ମଙ୍ଗଳବାର ଦିନ ଦିଲ୍ଲୀ-ଏନସିଆର ଏବଂ ଉତ୍ତର ଭାରତର ଅନେକ ଅଞ୍ଚଳରେ ପ୍ରବଳ ଥଣ୍ଡା ଅନୁଭୂତ ହେଉଛି। ପାହାଡ ଅଞ୍ଚଳରେ ତୁଷାରପାତ ହେତୁ ଥଣ୍ଡା ପବନ ବହୁଛି, ଯାହା ଥଣ୍ଡାକୁ ବଢାଇ ଦେଇଛି। ପଞ୍ଜାବରେ ସର୍ବନିମ୍ନ ତାପମାତ୍ରା ୫ ଡିଗ୍ରୀ ସେଲସିୟସ ଏବଂ ହରିୟାଣାରେ ୬ ଡିଗ୍ରୀ ସେଲସିୟସ ଥିବାବେଳେ ଜାମ୍ମୁ କାଶ୍ମୀର ଏବଂ ହିମାଚଳ ପ୍ରଦେଶରେ ତୁଷାରପାତ ବଢିବାରେ ଲାଗିଛି। 


ସେହିପରି ତାମିଲନାଡ଼ୁରେ ବର୍ଷା ହେବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛ। ଏଥିପାଇଁ ବିଭାଗ ପକ୍ଷରୁ ଆର୍ଲଟ ଜାରି କରାଯାଇଛି। ବୁଧବାର ଠାରୁ ଶନିବାର ପର୍ଯ୍ୟନ୍ତ ତାମିଲନାଡୁ, ପୁଡୁଚେରୀ ଏବଂ କରାଇକାଲ ଉପରେ ଏକ କିମ୍ବା ଦୁଇଟି ସ୍ଥାନରେ ହାଲୁକା ରୁ ମଧ୍ୟମ ବର୍ଷା ହେବାର ସମ୍ଭାବନା ଅଛି। ଏଥି ସହିତ, ଆଜି ତାମିଲନାଡୁ ଏବଂ ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜର କେତେକ ସ୍ଥାନରେ ହାଲୁକା ବର୍ଷା ହୋଇପାରେ।


କେରଳରେ ସାମାନ୍ୟ ବର୍ଷା ଆଶଙ୍କା
ଆଇଏମଡି ଅନୁଯାୟୀ ଆସନ୍ତା ତିନି ଦିନ ପର୍ଯ୍ୟନ୍ତ କେରଳରେ ହାଲୁକା ରୁ ମଧ୍ୟମ ବର୍ଷା ଜାରି ରହିବ। ଆଜି ପତ୍ଥାନାମଥିଟ୍ଟା, କୋଲାମ ଏବଂ ଥିରୁବନନ୍ତପୁରମରେ ଜିଲ୍ଲା ସ୍ତରୀୟ ଅରେଞ୍ଜ ଆଲର୍ଟ ଲାଗୁ କରାଯାଇଛି। ଏଥି ସହିତ ଆସନ୍ତା ୭ ଦିନ ମଧ୍ୟରେ ତେଲେଙ୍ଗାନାରେ ପାଗ ଶୁଖିଲା ରହିବ ବୋଲି ଆଶା କରାଯାଉଛି। ଡିସେମ୍ବର ୨୪ରେ ଉତ୍ତର-ଦକ୍ଷିଣ ଉପକୂଳ ଆନ୍ଧ୍ରପ୍ରଦେଶ, ୟାନାମ ଏବଂ ରୟାଲସୀମା ଉପରେ ବିଚ୍ଛିନ୍ନ ସ୍ଥାନରେ ହାଲୁକା ରୁ ମଧ୍ୟମ ବର୍ଷା ହେବାର ଆଶଙ୍କା ରହିଛି।


ସେହିପରି ଓଡ଼ିଶାରେ ମଧ୍ୟ ଶୀତ ଲହରୀ ଜାରି ରହିଛି। ରାଜ୍ୟର ଅଧିକାଂଶ ସ୍ଥାନରେ ପାରଦ ଖସିଛି। ଫୁଲବାଣୀରେ ୮.୦୫, କୋରାପୁଟରେ ୮.୭,କେନ୍ଦୁଝରରେ ୮.୮, ସୁନ୍ଦରଗଡରେ ୯, ଝାରସୁଗୁଡାରେ ୯.୨, ଦାରିଙ୍ଗିବାଡିରେ ୯.୫, ଅନୁଗୋଳରେ ୯.୬, ରାଉରକେଲାରେ ୯.୬,  ଓ ରାଣୀତାଳରେ ତାପମାତ୍ରା ୧୦ ଡିଗ୍ରୀ ରେକର୍ଡ ହୋଇଛି। ସୋନପୁରରେ ୧୦.୫, ଭବାନୀପାଟଣାରେ ୧୧,ବଲାଙ୍ଗୀରରେ ୧୧.୨, ବୌଦ୍ଧରେ ୧୧.୩, ବାରିପଦାରେ ୧୧.୫, ନବରଙ୍ଗପୁର ଓ କେନ୍ଦ୍ରାପଡାରେ ୧୨, ଢେଙ୍କାନାଳରେ ୧୨.୩, ଜଗତସିଂହପୁରରେ ୧୨.୬, ବରଗଡରେ୧3, କଟକରେ ୧୩.୦୬, ଟିଟିଲାଗଡରେ ୧୩.୮,  ଭୁବନେଶ୍ବରରେ ୧୩.୮ ଡିଗ୍ରୀ ରେକର୍ଡ଼ ହୋଇଛି। ରାଜ୍ୟର ଅଧିକାଂଶ ସ୍ଥାନରେ ରାତ୍ରୀର ତାପମାତ୍ରା ୧୫ ଡିଗ୍ରୀ ତଳେ ରହିଥିଲା। 


କୋରାପୁଟ, ଫୁଲବାଣୀ, ଅନୁଗୁଳ ଓ କେନ୍ଦୁଝରରେ ବୁଧବାର ସର୍ବନିମ୍ନ ତାପମାତ୍ରା ୯ ଡିଗ୍ରୀ ରହିବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ କୁହାଯାଇଛି। ତେବେ, ୨୦ ତାରିଖ ପରେ ତାପମାତ୍ରା କ୍ରମଶଃ ବଢିବ। ଏବଂ ଶୀତ କମିବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ କୁହାଯାଇଛି।  ସେହିପରି କେନ୍ଦୁଝର, କଳାହାଣ୍ତି, କୋରାପୁଟ, କନ୍ଧମାଳ, ବଲାଙ୍ଗୀର, ସୁନ୍ଦରଗଡ, ଝାରସୁଗୁଡା , ଅନୁଗୋଳ ଓ ଢେଙ୍କାନାଳରେ ଆଜି ସକାଳୁ କୁହୁଡି ଦୃଶ୍ୟମାନ ହେବ ବୋଲି ବିଭାଗ ପକ୍ଷରୁ କୁହାଯାଇଛି।