Richest and Poorest MLA of India: ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ ପକ୍ଷରୁ ଦେଶର ଗରିବ ଏବଂ ଧନୀ ବିଧାୟକଙ୍କ ତାଲିକା ପ୍ରକାଶ କରାଯାଇଛି। ଏହି ରିପୋର୍ଟ ସାମ୍ନାକୁ ଆସିବା ପରେ ଜଣାପଡ଼ିଛି ଯେ ୧୪ କର୍ଣ୍ଣାଟକ ବିଧାୟକଙ୍କ ସମ୍ପତ୍ତି ୧୦୦ କୋଟିରୁ ଅଧିକ। ଏହା ସହିତ ଦେଶର ସର୍ବାଧିକ ସଂଖ୍ୟକ ଧନୀ ବିଧାୟକ ରାଜ୍ୟ ତାଲିକାରେ କର୍ଣ୍ଣାଟକ ଶୀର୍ଷରେ ରହିଛି। କର୍ଣ୍ଣାଟକ ବିଧାୟକଙ୍କ ହାରାହାରି ସମ୍ପତ୍ତି ହେଉଛି ୬୪.୩୦ କୋଟି ଟଙ୍କା। ଏହା ସହିତ ଦେଶର ୧୦ ଜଣ ଧନୀ ବିଧାୟକଙ୍କ ମଧ୍ୟରୁ କଂଗ୍ରେସ ଦଳର ସର୍ବାଧିକ ୪ ଜଣ ବିଧାୟକ ରହିଥିବା ଜଣାପଡ଼ିଛି। ରିପୋର୍ଟ ଅନୁଯାୟୀ ଦେଶର ସବୁଠାରୁ ଗରିବ ବିଧାୟକ ବିଜେପି ଦଳର ବୋଲି ଜଣାପଡ଼ିଛି।


COMMERCIAL BREAK
SCROLL TO CONTINUE READING

ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ (Association for Democratic Reforms) ଏଡ଼ିଆର ରିପୋର୍ଟ (ADR Report 2023) ଅନୁଯାୟୀ ଦେଶର ସବୁଠାରୁ ଧନୀ ବିଧାୟକଙ୍କ ସମ୍ପତ୍ତି ୧୦୦୦ କୋଟିରୁ ଅଧିକ। ଏହା ସହିତ ପଶ୍ଚିମବଙ୍ଗର ଜଣେ ବିଧାୟକଙ୍କ ମୋଟ ସମ୍ପତ୍ତିର ପରିମାଣ ୨୦୦୦ ଟଙ୍କାରୁ ଅଧିକ ନୁହେଁ। ରିପୋର୍ଟ ଅନୁଯାୟୀ ଦେଶର ସବୁଠାରୁ ଧନୀ ବିଧାୟକ ତାଲିକାରେ କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ଶୀର୍ଷରେ ରହିଛନ୍ତି। ଯିଏ କର୍ଣ୍ଣାଟକ କଂଗ୍ରେସ ସଭାପତି ଅଛନ୍ତି। ତାଙ୍କର ମୋଟ ସମ୍ପତ୍ତି ପରିମାଣ ହେଉଛି ୧୪୧୩ କୋଟି ଟଙ୍କା। କେବଳ ସେତିକି ନୁହେଁ ଦେଶର ଦ୍ୱିତୀୟ ତଥା ତୃତୀୟ ଧନୀ ବିଧାୟକ (Richest MLA of India) ମଧ୍ୟ କର୍ଣ୍ଣାଟକର ବୋଲି ଜଣାପଡ଼ିଛି।


ଦେଶର ଦ୍ୱିତୀୟ ଧନୀ ବିଧାୟକ ହେଉଛନ୍ତି କେ.ଏଚ୍ ପୁଟ୍ଟସ୍ୱାମୀ ଗୌଡା। ବ୍ୟବସାୟୀ ତଥା ସ୍ୱାଧୀନ ବିଧାୟକ ଗୌଡାଙ୍କ ମୋଟ ସମ୍ପତ୍ତି ହେଉଛି ୧୨୬୭ କୋଟି ଟଙ୍କା। ଏହା ସହିତ ତୃତୀୟ ଧନୀ ବିଧାୟକ ପ୍ରିୟା କୃଷ୍ଣଙ୍କ ସମ୍ପତ୍ତି ପରିମାଣ ହେଉଛି ୧୧୫୬ କୋଟି ଟଙ୍କା। ଦେଶର ୨୦ ଧନୀ ବିଧାୟକଙ୍କ ମଧ୍ୟରୁ ୧୨ ଜଣ କର୍ଣ୍ଣାଟକର ରହିଥିବା ଏଡ଼ିଆର ରିପୋର୍ଟ ଦର୍ଶାଇଛି। ଧନୀ ବିଧାୟକଙ୍କ ସହ ରାଜ୍ୟ ମାମଲାରେ ଅରୁଣାଚଳ ପ୍ରଦେଶ ଦ୍ୱିତୀୟ ସ୍ଥାନରେ ରହିଛି। ରାଜ୍ୟର ୫୯ ବିଧାୟକଙ୍କ ମଧ୍ୟରୁ ୪ ଜଣ ବିଧାୟକ ହେଉଛନ୍ତି କୋଟିପତି। ଯଦି ପ୍ରତିଶତରେ ଦେଖାଯାଏ, ତାହେଲେ ଅରୁଣାଚଳ ପ୍ରଦେଶର ୭ ପ୍ରତିଶତ ବିଧାୟକ ହେଉଛନ୍ତି କୋଟିପତି।


ଏଡ଼ିଆର ରିପୋର୍ଟ ଅନୁସାରେ ଦେଶର ଧନୀ ବିଧାୟକ ତାଲିକାରେ କର୍ଣ୍ଣାଟକର ଖଣି ବ୍ୟବସାୟୀ ଗଲି ଜନାର୍ଦ୍ଦନ ରେଡ୍ଡୀ ୨୩ ନମ୍ବର ସ୍ଥାନରେ ଅଛନ୍ତି। ତାଙ୍କର ଅଧିକାଂଶ ସମ୍ପତ୍ତି ପତ୍ନୀ ଅରୁଣା ଲକ୍ଷ୍ମୀଙ୍କ ନାମରେ ରହିଛି। ଜନାର୍ଦ୍ଦନ ରେଡ୍ଡୀ ୨୦୨୩ କର୍ଣ୍ଣାଟକ ବିଧାନସଭା ନିର୍ବାଚନରେ ରେଡ୍ଡୀ ତାଙ୍କ ଦ୍ୱାରା ଗଠିତ ନୂତନ ଦଳ କଲ୍ୟାଣ ରାଜ୍ୟ ପ୍ରଗତି ପକ୍ଷ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରିଥିଲେ। ଚଳିତ ବର୍ଷ ମେ ମାସରେ ଅନୁଷ୍ଠିତ ହୋଇଥିବା କର୍ଣ୍ଣାଟକ ବିଧାନସଭା ନିର୍ବାଚନରେ ​​ଦେଶରେ ସର୍ବାଧିକ କୋଟିପତି ବିଧାୟକ ନିର୍ବାଚିତ ହୋଇଥିଲେ। ଚଳିତ ବର୍ଷ କର୍ଣ୍ଣାଟକ ବିଧାନସଭାକୁ ନିର୍ବାଚିତ ହୋଇଥିବା ୩୨ ଜଣ ବିଧାୟକଙ୍କ ସମ୍ପତ୍ତି ୧୦୦ କୋଟିରୁ ଅଧିକ। ଦେଶର ୧୦ ଜଣ ଧନୀ ବିଧାୟକଙ୍କ ମଧ୍ୟରୁ ୪ ଜଣ କଂଗ୍ରେସ ଏବଂ ୩ ବିଜେପି ଦଳର ବୋଲି ଜଣାପଡ଼ିଛି। 


ଦେଶର ସବୁଠାରୁ ଗରିବ ବିଧାୟକ (Poorest MLA of India) ହେଉଛନ୍ତି ପଶ୍ଚିମବଙ୍ଗ ବିଧାନସଭାକୁ ପ୍ରତିନିଧିତ୍ୱ କରୁଥିବା ନିର୍ମଳ କୁମାର ଧର। ଯିଏ ବିଜେପି ପ୍ରାର୍ଥୀ ଭାବେ ୨୦୨୧ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ତାଙ୍କର ମୋଟ ଘୋଷିତ ସମ୍ପତ୍ତି ହେଉଛି ମାତ୍ର ୧୭୦୦ ଟଙ୍କା। ତାଙ୍କ ବ୍ୟାଙ୍କ ଖାତାରେ ଗୋଟିଏ ଟଙ୍କା ମଧ୍ୟ ନାହିଁ। ଦେଶର ଦ୍ୱିତୀୟ ଗରିବ ବିଧାୟକ ହେଉଛନ୍ତି ମକରନ୍ଦ ମୁଦୁଲି। ଯିଏ ଓଡ଼ିଶା ବିଧାନସଭାକୁ ପ୍ରତିନିଧିତ୍ୱ କରୁଛନ୍ତି। ତାଙ୍କର ମୋଟ ସମ୍ପତ୍ତି ହେଉଛି ୧୫ ହଜାର ଟଙ୍କା। ଏହି ତାଲିକାରେ ଆମ୍ ଆଦମୀ ପାର୍ଟିର ବିଧାୟକ ନରିନ୍ଦର ପାଲ ସିଂହ ସାୱନା ତୃତୀୟ ସ୍ଥାନରେ ଅଛନ୍ତି। ତାଙ୍କର ମୋଟ ଘୋଷିତ ସମ୍ପତ୍ତି ହେଉଛି ୧୮,୩୭୦ ଟଙ୍କା। ଯିଏ ପଞ୍ଜାବ ବିଧାନସଭାକୁ ପ୍ରତିନିଧିତ୍ୱ କରୁଛନ୍ତି। 


ନିର୍ମଳ କୁମାର ଧର ରାଜ୍ୟର ଇନ୍ଦାସ ଆସନରୁ ପଶ୍ଚିମବଙ୍ଗ ବିଧାନସଭାକୁ ପ୍ରତିନିଧିତ୍ୱ କରିଛନ୍ତି। ସେ ଅନୁରାଧା ଧରଙ୍କୁ ବିବାହ କରିଛନ୍ତି ଏବଂ ତାଙ୍କର ଗୋଟିଏ ଝିଅ ରହିଛି। ଯାହାର ନାଁ ହେଉଛି ଅନ୍ୱେଶ। ରିପୋର୍ଟ ଅନୁଯାୟୀ, ତାଙ୍କ ପତ୍ନୀ କିମ୍ବା ତାଙ୍କ ଝିଅ ନାମରେ କୌଣସି ସମ୍ପତ୍ତି ନାହିଁ। କେବଳ ସେତିକି ନୁହେଁ ନିର୍ମଳ କୁମାର ଧରଙ୍କ ବିରୋଧରେ କୌଣସି ଗୋଟିଏ ମାମଲା ରୁଜୁ ହୋଇନାହିଁ। ନିର୍ମଲ କୁମାର ଧର ୨୦୦୯ ବର୍ଷରେ ବର୍ଦ୍ଧମାନ ବିଶ୍ୱବିଦ୍ୟାଳୟରୁ ଇଂରାଜୀ  ବିଷୟରେ ଏମ.ଏ କରିଥିଲେ। ସେ ଟ୍ୟୁସନ କରି ନିଜ ପରିବାରର ଖର୍ଚ୍ଚ ଉଠାଇଥାନ୍ତି। ତାଙ୍କ ପାଖରେ କୌଣସି ଜମା ନାହିଁ କିମ୍ବା ସେ କୌଣସି ନିବେଶ କରିନାହାଁନ୍ତି। ତାଙ୍କର କୌଣସି ବୀମା ପଲିସି ମଧ୍ୟ ନାହିଁ। ତାଙ୍କର ବୟସ ହେଉଛି ୩୯ ବର୍ଷ।