IPL ରୁ ଅବସର ପରେ DK କୁ ମିଳିଲା ଆମେରିକା ଟିକେଟ୍, T20 WC ରେ ନିଭାଇବେ ଏହି ଭୂମିକା
Dinesh Karthik: ଆଇସିସି ଟି-୨୦ ବିଶ୍ୱକପ ୨୦୨୪ ପାଇଁ କମେଣ୍ଟ୍ରୀ ପ୍ୟାନେଲ ଘୋଷଣା କରାଯାଇଛି। ଆଇସିସି ଟି-୨୦ ବିଶ୍ୱକପ ୨୦୨୪ (T20 World Cup 2024) ସମୟରେ ଦୀନେଶ କାର୍ତ୍ତିକ କମେଣ୍ଟ୍ରୀ କରୁଥିବାର ନଜର ଆସିବେ। ଦୀନେଶ କାର୍ତ୍ତିକ ତାଙ୍କ ଭୂମିକାକୁ ନେଇ ବହୁତ ଉତ୍ସାହିତ ମଧ୍ୟ ଅଛନ୍ତି।
ICC Men's T20 World Cup 2024: ଅନ୍ତର୍ଜାତୀୟ କ୍ରିକେଟ୍ ପରିଷଦ ଆଇସିସି ଟି-୨୦ ବିଶ୍ୱକପ ୨୦୨୪ ପାଇଁ କମେଣ୍ଟ୍ରୀ ପ୍ୟାନେଲ ଘୋଷଣା କରିଛି। ରବି ଶାସ୍ତ୍ରୀ, ନାସିର୍ ହୁସେନ୍, ଇଆନ୍ ସ୍ମିଥ୍, ମେଲ ଜୋନ୍ସ, ହର୍ଷ ଭୋଗଲେ ଓ ଇଆନ୍ ବିଶୋପଙ୍କ ଭଳି ବଡ ନାମ କମେଣ୍ଟ୍ରୀ ପ୍ୟାନେଲର ଏକ ଅଂଶ, ଏହା ବ୍ୟତୀତ ଆଇସିସି ଟି-୨୦ ବିଶ୍ୱକପ ୨୦୨୨ ରେ ଟିମ୍ ଇଣ୍ଡିଆର ଅଂଶ ଥିବା ଦୀନେଶ କାର୍ତ୍ତିକ (Dinesh Karthik) ଚଳିତ ବର୍ଷ ଆଇସିସି ଟି-୨୦ ବିଶ୍ୱକପ ସମୟରେ କମେଣ୍ଟ୍ରି ପ୍ୟାନେଲର ଏକ ଅଂଶ ହୋଇଛନ୍ତି। ଦୀନେଶ କାର୍ତ୍ତିକ ଆଇପିଏଲରୁ ଅବସର ନେଇଛନ୍ତି ଏବଂ ୨୨ ମେ'ରେ ସେ ନିଜ କ୍ୟାରିୟରର ଶେଷ ଆଇପିଏଲ ମ୍ୟାଚକୁ ଏକ ଏଲିମିଟର ମ୍ୟାଚ ଆକାରରେ ଖେଳିଥିଲେ। ଦୀନେଶ କାର୍ତ୍ତିକଙ୍କ ବ୍ୟତୀତ ଇବୋନି ରେନଫୋର୍ଡ-ବ୍ରେଣ୍ଟ, ସାମୁଏଲ ବଦ୍ରି, କାର୍ଲୋସ ବ୍ରାଥୱାଇଟ୍, ଷ୍ଟିଭ ସ୍ମିଥ, ଆରୋନ ଫିଞ୍ଚ ଓ ଲିସା ଷ୍ଟାଲେକର ମଧ୍ୟ ଏହି କମେଣ୍ଟ୍ରି ପ୍ୟାନେଲର ଏକ ଅଂଶ।
ଦୀନେଶ କାର୍ତ୍ତିକ କହିଛନ୍ତି, "ଏହି ଟୁର୍ଣ୍ଣାମେଣ୍ଟ ଅନେକ ଉପାୟରେ ଭିନ୍ନ ହେବାକୁ ଯାଉଛି, ଯେଉଁଥିପାଇଁ ଏହା ଅଧିକ ରୋମାଞ୍ଚକର ହେବ। ୨୦ଟି ଦଳ ଓ ୫୫ ଟି ମ୍ୟାଚ୍, ଏବଂ କିଛି ନୂତନ ସ୍ଥାନ ... ଏହା ଏକ ଭଲ ମିଶ୍ରଣ, ମୁଁ ଏଥିରେ ଭାଗ ନେବାକୁ ଅପେକ୍ଷା କରିଛି। ଏହିପରି ଏକ ଉଚ୍ଚ-ଶ୍ରେଣୀର କମେଣ୍ଟ୍ରୀ ପ୍ୟାନେଲର ଏକ ଅଂଶ ହେବା ମୋ ପାଇଁ ଏକ ବଡ଼ ଅନୁଭୂତି। ଯେଉଁ ଖେଳାଳୀମାନଙ୍କ ସହିତ ମୁଁ ନିକଟରେ ଖେଳିଛି ସେମାନଙ୍କ ପାଇଁ କମେଣ୍ଟ୍ରୀ କରିବା ଏହି କାର୍ଯ୍ୟକୁ ଅଧିକ ମଜାଳିଆ କରିଥାଏ।"
ଏହି କମେଣ୍ଟ୍ରୀ ପ୍ୟାନେଲରେ ରିକି ପଣ୍ଟିଂ, ସୁନୀଲ ଗାଭାସ୍କର, ମାଥ୍ୟୁ ହେଡେନ, ରମିଜ ରାଜା, ଇଓନ ମୋର୍ଗାନ, ଟମ୍ ମୁଡି ଏବଂ ୱାସିମ ଆକ୍ରାମ ମଧ୍ୟ ସାମିଲ ହେବେ। ଆମେରିକୀୟ ସମୀକ୍ଷକ ଜେମ୍ସ ଓ’ବ୍ରାଇନ୍, ଜମ୍ବୋ ନାମରେ ମଧ୍ୟ ଜଣାଶୁଣା, ସେ ମଧ୍ୟ କମେଣ୍ଟ୍ରୀ ପ୍ୟାନେଲର ଏକ ଅଂଶ ହେବେ। ଆଇସିସି ଟି-୨୦ ବିଶ୍ୱକପ ୨୦୨୪ ଜୁନ୍ ୨ ରେ ଆରମ୍ଭ ହେବ। ଆମେରିକା ଓ ୱେଷ୍ଟଇଣ୍ଡିଜ୍ ମିଳିତ ଭାବେ ଟି-୨୦ ବିଶ୍ୱକପ୍ ଆୟୋଜନ କରୁଛନ୍ତି। ଆଇସିସି ଟି-୨୦ ବିଶ୍ୱକପ ୨୦୨୪ ର ଫାଇନାଲ୍ ମ୍ୟାଚ୍ ଜୁନ୍ ୨୯ ରେ ଖେଳାଯିବ।