IND vs PAK Hockey: ଭାରତର ଆଗରେ ଆଣ୍ଠୁ ମାଡିଲା ପାକିସ୍ତାନ, ଏସିଆନ୍ ଚାମ୍ପିଅନ୍ସ ଟ୍ରଫିରେ କ୍ରମାଗତ ପଞ୍ଚମ ମ୍ୟାଚ୍ ଜିତିଲା ଦଳ
Asian Champions Trophy: ଏସୀୟ ଚାମ୍ପିଅନ୍ସ ଟ୍ରଫିର ବହୁ ପ୍ରତୀକ୍ଷିତ ଶେଷ ରାଉଣ୍ଡ ରୋବିନ ମ୍ୟାଚରେ ଭାରତୀୟ ଦଳ ଶନିବାର ପାକିସ୍ତାନକୁ ୨-୧ ଗୋଲରେ ପରାସ୍ତ କରିଛି।
India vs Pakistan Hockey Highlights: ଶନିବାର ଦିନ ଏସିଆନ ଚାମ୍ପିଅନ୍ସ ଟ୍ରଫିର ଶେଷ ରାଉଣ୍ଡ ରୋବିନ ମ୍ୟାଚରେ ଭାରତୀୟ ହକି ଦଳ ଭାରତୀୟ ହକି ଦଳ ପାକିସ୍ତାନକୁ ୨-୧ ଗୋଲରେ ପରାସ୍ତ କରିଛି। ଭାରତ ପାଇଁ ହରମନପ୍ରୀତ ଦୁଇଟି ଗୋଲ ସ୍କୋର କରିଥିବାବେଳେ ନାଦିମ ଅହମ୍ମଦ ଏହି ମ୍ୟାଚରେ ପାକିସ୍ତାନ ପାଇଁ ପ୍ରଥମ ଗୋଲ ସ୍କୋର କରିଥିଲେ। ଏହି ଟୁର୍ଣ୍ଣାମେଣ୍ଟରେ ଭାରତ କ୍ରମାଗତ ପଞ୍ଚମ ମ୍ୟାଚ୍ ଜିତିଛି। ପ୍ୟାରିସ ଅଲିମ୍ପିକ୍ସର ବ୍ରୋଞ୍ଜ ପଦକ ବିଜେତା ଭାରତ ଚୀନକୁ ୩-୦, ଜାପାନକୁ ୫-୧, ମାଲେସିଆକୁ ୮-୧ ଓ କୋରିଆକୁ ୩-୧ରେ ପରାସ୍ତ କରିଛି।
ପାକିସ୍ତାନ ଦଳ ମ୍ୟାଚର ଶେଷ ୧୦ ମିନିଟରେ ମାତ୍ର ୧୦ ଜଣ ଖେଳାଳିଙ୍କ ସହ ଖେଳିଥିଲା। କାରଣ ୱାହିଦ୍ ଆଶରଫ ରାଣା ଜଣେ ଭାରତୀୟ ଖେଳାଳିଙ୍କୁ ଧକ୍କା ମାରିବା ପାଇଁ ୟେଲୋ କାର୍ଡ ପାଇଥିଲେ ଏବଂ ୧୦ ମିନିଟ୍ ପାଇଁ ସେ ମ୍ୟାଚରୁ ବାହାରେ ରହିଥିଲେ। ଏହି ମ୍ୟାଚରେ ଭାରତକୁ ୫ ପେନାଲ୍ଟି କର୍ଣ୍ଣର ଓ ପାକିସ୍ତାନକୁ ୭ଟି ପେନାଲ୍ଟି କର୍ଣ୍ଣର ମିଳିଥିଲା।
ଭାରତ ବନାମ ପାକିସ୍ତାନ ଏସୀୟ ଚାମ୍ପିଅନ୍ସ ଟ୍ରଫି ୨୦୨୪ ର ଏହି ମ୍ୟାଚରେ ପ୍ରଥମ ଗୋଲ ସ୍କୋର ପାକିସ୍ତାନର ନାଦିମ ଅହମ୍ମଦ ୮ ମିନିଟରେ କରିଥିଲେ। ଏହି ଟୁର୍ଣ୍ଣାମେଣ୍ଟରେ ଏହା ପ୍ରଥମ ଥର ପାଇଁ ଭାରତ ଗୋଟିଏ ଗୋଲ୍ ଖାଇ ମ୍ୟାଚ୍ ଆରମ୍ଭ କରିଥିଲା। ଏହା ପୂର୍ବରୁ ଟିମ୍ ଇଣ୍ଡିଆ ଶେଷ ଚାରିଟି ମ୍ୟାଚ୍ ରେ ପ୍ରଥମ ଗୋଲ୍ ସ୍କୋର କରିଥିଲା। ତେବେ ପ୍ରଥମ କ୍ୱାର୍ଟର ଶେଷରେ ହରମାନପ୍ରୀତ ସିଂ ଭାରତର ଆକାଉଣ୍ଟ ଖୋଲିବା ସହ ପେନାଲ୍ଟି କର୍ଣ୍ଣର ସାହାଯ୍ୟରେ ଭାରତ ତରଫରୁ ଗୋଲ ସ୍କୋର କରିଥିଲେ। ଦ୍ୱିତୀୟ କ୍ୱାର୍ଟରର ଚତୁର୍ଥ ମିନିଟରେ ଭାରତ ଆଉ ଏକ ପେନାଲ୍ଟି କର୍ଣ୍ଣର ସ୍କୋର କରିଥିଲା ଏବଂ ହରମାନପ୍ରୀତ ସିଂ ଆଉ ଏକ ଗୋଲ ସ୍କୋର କରି ଭାରତକୁ ୨-୧ ରେ ଅଗ୍ରଣୀ କରାଇଥିଲେ। ଏହା ପରେ ତୃତୀୟ ଓ ଚତୁର୍ଥ କ୍ୱାର୍ଟରରେ ଉଭୟ ଦଳ ଅତ୍ୟନ୍ତ ଆକ୍ରମଣାତ୍ମକ ଖେଳ ଖେଳିଥିଲେ ମଧ୍ୟ ଗୋଟିଏ ବି ଗୋଲ ସ୍କୋର କେହି କରିପାରିନଥିଲେ।
ଏହି ଟୁର୍ନାମେଣ୍ଟରେ ଏପର୍ଯ୍ୟନ୍ତ ଭାରତ ଓ ପାକିସ୍ତାନର ଦଳ ଅପରାଜିତ ରହିଥିଲେ। କିନ୍ତୁ ଭାରତ ବିପକ୍ଷ ମ୍ୟାଚକୁ ୧-୨ ରେ ହାରିବା ପରେ ବର୍ତ୍ତମାନ କେବଳ ଭାରତୀୟ ଦଳ ଟୁର୍ଣ୍ଣାମେଣ୍ଟରେ ଅପରାଜୟ ରହିଛି। ଭାରତ ଏପର୍ଯ୍ୟନ୍ତ ଖେଳିଥିବା ସମସ୍ତ ପାଞ୍ଚଟି ମ୍ୟାଚ୍ ଜିତିଥିବାବେଳେ ପାକିସ୍ତାନ ଦୁଇଟି ମ୍ୟାଚ୍ ଜିତିଛି, ଗୋଟିଏ ହାରିଛି ଓ ଦୁଇଟି ମ୍ୟାଚ୍ ଡ୍ର କରିଛି।