୪୫ ଦିନର ବନ୍ଧୁତାରୁ ପ୍ରେମ, ତାପରେ ପ୍ରେମିକାଠୁ ୨୪ଲକ୍ଷ ଟଙ୍କା ଲୁଟ୍

Love And Crime: ବର୍ତ୍ତମାନର ଦୁନିଆରେ ସମସ୍ତେ ନିଜ କାର୍ଯ୍ୟରେ ବ୍ୟସ୍ତ । କିନ୍ତୁ କିଛି ବ୍ୟକ୍ତି ସହରୀ ଜୀବନ ମଧ୍ୟରେ ଏକଲାପଣ ଅନୁଭବ କରୁଛନ୍ତି । ୫ଜି ଇଣ୍ଟରନେଟ୍ ବର୍ତ୍ତମାନ ଜୀବନକୁ ଟିକେ ସହଜ କରିଦେଇଛି । ବିଳମ୍ୱିତ ରାତି ପର୍ଯ୍ୟନ୍ତ ଅନେକ ବ୍ୟକ୍ତି ଚାଟିଂ ଆପରେ ବ୍ୟସ୍ତ ରହୁଛନ୍ତି । ଏହାର ପରିଣାମ ମଧ୍ୟ ବର୍ତ୍ତମାନ ଘଟିବା ଆରମ୍ଭ କରିଛି । ବର୍ତ୍ତମାନ ସହର ଝିଅମାନେ ଏପରି ଜାଲରେ ଫସିଯାଉଛନ୍ତି ଯେଉଁଥିରୁ ମୁକୁଳିବା ସେମାନଙ୍କ ପାଇଁ ଅସହଜ ହୋଇପଡୁଛି । ପ୍ରେମ ଜାଲରେ ପଡି ସର୍ବସ୍ୱ ଲୁଟି ନେଇଯାଉଛନ୍ତି । ଆଜି ଆପଣଙ୍କୁ ସେମିତି ଏକ ଉଦାହରଣ ଦେବାକୁ ଯାଉଛୁ । ଗାଜିଆବାଦର ସିହାନି ଗେଟ୍ ଥାନା ଅଞ୍ଚଳର ଜଣେ ଝିଅ ଜୁଲାଇ ୫ ତାରିଖରେ ଏକ ଡେଟିଂ ଆପ୍ ରେ ଆକାଉଣ୍ଟ୍ ଖୋଲିଥିଲେ । ସେହି ଦିନ ଏକ ସୁନ୍ଦର ପ୍ରୋଫାଇଲ୍ ଥିବା ପୁଅକୁ ପସନ୍ଦ କରିବା ସହ ଚାଟିଂ ଆରମ୍ଭ କରିଥିଲେ । ଚାଟିଂ କରିବା ସମୟରେ ଝିଅଟି ଏହା ଜାଣି ଖୁସି ହୋଇଥିଲା ଯେ, ପୁଅଟି ଜାତୀୟ ସୁରକ୍ଷା ଏଜେନ୍ସିରେ କାମ କରୁଛି ବୋଲି କହିଥିଲା । ଏଇଠୁ ଆରମ୍ଭ ହୋଇଥିଲା ବନ୍ଧୁତା ଏବଂ ତାପରେ ଧିରେଧିରେ ସମ୍ପର୍କ ପ୍ରେମ ଆଡକୁ ଗତି କରିଥିଲା ।

ହଠାତ୍ ଝିଅଟି ଗାଜିଆବାଦର ସାଇବର ପୋଲିସ୍ ଷ୍ଟେସନରେ ପୁଅ ନାମରେ ଏକ ଠକେଇ ମାମଲା ରୁଜୁ କରିଥିଲା। ଗାଜିଆବାଦ ପୋଲିସ ତଦନ୍ତ ଆରମ୍ଭ କରିବା ପରେ ଜଣାପଡିଲା ଯେ, ଉଭୟଙ୍କର ବନ୍ଧୁତ୍ୱ ମାତ୍ର ୪୦ରୁ ୪୫ ଦିନର । ମାତ୍ର ଏତିକି ଦିନ ମଧ୍ୟରେ ଝିଅଠାରୁ ପୁଅଟି ଲକ୍ଷ ଲକ୍ଷ ଟଙ୍କା ଲୁଟି ନେଇଥିଲା ।
ପୋଲିସକୁ ଦେଇଥିବା ବିବୃତ୍ତିରେ ଝିଅଟି କହିଥିଲା ଯେ, 'ଆକାଶ ଅଗ୍ରୱାଲ ନାମକ ଜଣେ ପୁଅଙ୍କ ସହିତ ତାଙ୍କର ବନ୍ଧୁତା ଜୁଲାଇ ୧ ତାରିଖରୁ ଆରମ୍ଭ ହୋଇଥିଲା । ସେ ନିଜକୁ NSA ରେ ମୁଖ୍ୟ ଡାଟା ଆନାଲିଷ୍ଟ ଭାବରେ କାର୍ଯ୍ୟ କରୁଥିବା କହିଥିଲେ । ସେ ଏକଥା ମଧ୍ୟ କହିଥିଲେ ଯେ, ତାଙ୍କ ପିତାମାତା ଭାରତୀୟ ସେନାରେ ଚାକିରି କରୁଛନ୍ତି । ଉଭୟେ ୯ ଜୁଲାଇରେ ପ୍ରଥମଥର ଫୋନରେ କଥା ହୋଇଥିଲେ । କିନ୍ତୁ ହଠାତ ଆକାଶ କହିଥିଲେ ଯେ, ମୁଁ ପଦୋନ୍ନତି ପାଇବାକୁ ଯାଉଛି ତେଣୁ ମୋର ସାଲାରୀ ଆକାଉଣ୍ଟ ୧୦ ଜୁଲାଇ ପର୍ଯ୍ୟନ୍ତ ଫ୍ରିଜ୍ ହୋଇଯାଇଛି । ଏହା କହିବା ପରେ ଝିଅଟିକୁ ଟଙ୍କା ମାଗିଥିଲେ ଆକାଶ । ଏକଥା ଶୁଣି ଝିଅଜଣକ 8500 ଟଙ୍କା ପଠାଇଥିଲେ । ପରଦିନ ଏକ ଦୁର୍ଘଟଣା ହୋଇଥିବା କହି ପୁଣି ଝିଅଠାରୁ 1960 ଟଙ୍କା ନେଇଥିଲା ।

ଏଫଆଇଆର ତଥ୍ୟ ଅନୁଯାୟୀ, 'ଯେତେବେଳେ ଝିଅଟି ଆକାଶଙ୍କ ସହ ସାକ୍ଷାତ କରିବାକୁ କହିଥିଲେ ସେତେବେଳେ ଆକାଶ କହିଥିଲେ ଯେ, ପ୍ରଧାନମନ୍ତ୍ରୀ ଆଜି ତାଙ୍କ କାର୍ଯ୍ୟାଳୟକୁ ଆସିବେ । ସେଠାରେ ଏକ ପଦୋନ୍ନତି କାର୍ଯ୍ୟକ୍ରମ ରହିଛି । ତେଣୁ ଅନ୍ୟ କୌଣସି ଦିନ ଦେଖା ହେବ । ପରଦିନ ସାକ୍ଷାତ କରିବାକୁ କୁହିବା ପରେ ଆକାଶ ଝିଅଟିକୁ କହିଥିଲେ ଯେ, ଗତକାଲିର ପଦୋନ୍ନତି କାର୍ଯ୍ୟକ୍ରମ ସ୍ଥଗିତ ରଖାଯାଇଛି। ଏହି କାରଣରୁ ଆଜି ଏହା ଅନୁଷ୍ଠିତ ହେବ । ତା ପରଦିନ ସାକ୍ଷାତ କରିବାକୁ କହିବା ପରେ ଆକାଶ କହିଥିଲେ ଯେ, ତାଙ୍କ ପିତାଙ୍କର ହୃଦଘାତ ହୋଇଛି । ତେଣୁ ତାଙ୍କୁ ପ୍ରାୟ 40 ଲକ୍ଷ ଟଙ୍କା ଆବଶ୍ୟକ ଅଛି । ଏହା ଶୁଣିବା ପରେ ଝିଅଟି 2 ଲକ୍ଷ ଟଙ୍କା ପଠାଇଥିଲେ । ତା’ପରେ ଆକାଶ କହିଥିଲେ ଯେ, ଅପରେସନ କରାଯାଇଛି, କିନ୍ତୁ 6 ଲକ୍ଷ ଟଙ୍କା ଆବଶ୍ୟକ ରହିଛି । ଏହା ଶୁଣି ଝିଅଟି ତୁରନ୍ତ 3.5 ଲକ୍ଷ ଟଙ୍କା ଟ୍ରାନ୍ସଫର କରିଥିଲା । ଏହିପରି ମୋଟ ୨୫ ଲକ୍ଷ ଟଙ୍କା ପଠାଇବା ପରେ ଦିନେ ହଠାତ୍ ଆକାଶ ଝିଅଟି ମୋବାଇଲକୁ ଅଶ୍ଳୀଳ ଚାଟ୍ ଏବଂ ଫଟୋ ପଠାଇଥିଲା । ତାପରେ ବିଭିନ୍ନ ବାହାନା କରିବା ସହ ଟଙ୍କା ଦାବି କରିଥିଲେ । ଯେତେବେଳେ ମନରେ ସନ୍ଦେହ ହେଲା ସେତେବେଳେ ଝିଅଟି ହସ୍ପିଟାଲ ସହ ଯୋଗାଯୋଗ କରିଥିଲେ । ସେଠାରୁ ଜାଣିବାକୁ ପାଇଥିଲେ ଆକାଶଙ୍କ ବାପାଙ୍କ ନାମରେ କେହି ରୋଗୀ ସେଠାରେ ଚିକିତ୍ସିତ ହୋଇନାହାନ୍ତି । ଏହାପରେ ଆକାଶ ଦେଇଥିବା ଦିଲ୍ଲୀ ସ୍ଥିତ ବାସଭବନର ଠିକଣାରେ ପହଞ୍ଚିଥିଲେ ପ୍ରେମିକା । କିନ୍ତୁ ସେଠାରେ ମଧ୍ୟ ଆକାଶ ନଥିଲେ ଏବଂ ଭୁଲ୍ ଥିଲା ଠିକଣା । ବର୍ତ୍ତମାନ ପୋଲିସ ଏ ଘଟଣାର ତଦନ୍ତ ଆରମ୍ଭ କରିଛି ।