Morocco Earthquake Today: ਮੋਰੱਕੋ ਵਿੱਚ ਭੂਚਾਲ, ਘੱਟੋ-ਘੱਟ 820 ਲੋਕਾਂ ਦੀ ਮੌਤ

Morocco Earthquake News: ਪੁਰਤਗਾਲ ਅਤੇ ਅਲਜੀਰੀਆ ਤੱਕ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ ਸਨ।

Morocco Earthquake Today: ਜਿੱਥੇ ਇਸ ਸਾਲ ਦੇ ਸ਼ੁਰੂਆਤ ਵਿੱਚ ਤੁਰਕੀ ਤੇ ਸੀਰੀਆ ਵਿਖੇ ਭੁਚਾਲ ਨੇ ਵੱਡੀ ਤਬਾਹੀ ਮਚਾਈ ਸੀ, ਉੱਥੇ ਹੁਣ ਮੋਰੱਕੋ ਉਵੇਂ ਦੇ ਹਾਲਾਤਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਦੱਸ ਦਈਏ ਕਿ ਸ਼ੁੱਕਰਵਾਰ ਦੇਰ ਰਾਤ ਆਏ ਇੱਕ ਸ਼ਕਤੀਸ਼ਾਲੀ ਭੂਚਾਲ ਕਾਰਨ ਮੋਰੱਕੋ 'ਚ ਘੱਟੋ-ਘੱਟ 820 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ ਇਹ ਦੇਸ਼ ਦੇ ਗ੍ਰਹਿ ਮੰਤਰਾਲੇ ਵੱਲੋਂ ਦੱਸਿਆ ਗਿਆ ਹੈ।

ਇਸ ਦੌਰਾਨ ਮੋਰੱਕੋ ਦੇ ਲੋਕਾਂ ਵੱਲੋਂ ਕਾਫੀ ਵਿਡੀਓਜ਼ ਵੀ ਪੋਸਟ ਕੀਤੀਆਂ ਗਈਆਂ ਹਨ ਜਿਸ ਵਿੱਚ ਇਮਾਰਤਾਂ ਨੂੰ ਮਲਬੇ ਅਤੇ ਧੂੜ ਵਿੱਚ ਦੇਖਿਆ ਜਾ ਸਕਦਾ ਹੈ ਅਤੇ ਮਸ਼ਹੂਰ ਲਾਲ ਕੰਧਾਂ ਦੇ ਕੁਝ ਹਿੱਸੇ ਜੋ ਇਤਿਹਾਸਕ ਮੈਰਾਕੇਚ ਵਿੱਚ ਪੁਰਾਣੇ ਸ਼ਹਿਰ ਨੂੰ ਘੇਰਦੇ ਹਨ, ਜੋ ਕਿ ਯੂਨੈਸਕੋ ਦੀ ਵਿਸ਼ਵ ਵਿਰਾਸਤ ਸਾਈਟ ਹੈ, ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ।

ਮੋਰੱਕੋ ਵਿੱਚ ਭੂਚਾਲ ਦੇ ਦੌਰਾਨ ਸੈਲਾਨੀਆਂ ਅਤੇ ਹੋਰਾਂ ਵੱਲੋਂ ਲੋਕਾਂ ਦੇ ਚੀਕਦੇ ਹੋਏ ਅਤੇ ਸ਼ਹਿਰ ਦੇ ਰੈਸਟੋਰੈਂਟਾਂ ਨੂੰ ਖਾਲੀ ਕਰਨ ਦੇ ਵੀਡੀਓ ਵੀ ਪੋਸਟ ਕੀਤੇ ਗਏ ਹਨ। ਅਮਰੀਕੀ ਭੂ-ਵਿਗਿਆਨ ਸਰਵੇਖਣ ਨੇ ਕਿਹਾ ਕਿ ਭੂਚਾਲ ਦੀ ਸ਼ੁਰੂਆਤੀ ਤੀਬਰਤਾ 6.8 ਸੀ ਜਦੋਂ ਇਹ ਰਾਤ 11:11 ਵਜੇ ਆਇਆ, ਜਿਸ ਦੇ ਝਟਕੇ ਕਈ ਸਕਿੰਟਾਂ ਤੱਕ ਚੱਲੇ। ਦੂਜੇ ਪਾਸੇ ਮੋਰੱਕੋ ਦੇ ਨੈਸ਼ਨਲ ਸਿਸਮਿਕ ਮਾਨੀਟਰਿੰਗ ਐਂਡ ਅਲਰਟ ਨੈੱਟਵਰਕ ਨੇ ਇਸ ਦੀ ਤੀਬਰਤਾ 7 ਮਾਪੀ। 

ਉੱਥੇ ਅਮਰੀਕੀ ਏਜੰਸੀ ਵੱਲੋਂ 19 ਮਿੰਟ ਬਾਅਦ 4.9 ਤੀਬਰਤਾ ਦੇ ਝਟਕੇ ਦੀ ਸੂਚਨਾ ਦਿੱਤੀ ਗਈ। ਦੱਸ ਦਈਏ ਕਿ ਸ਼ੁਰੂਆਤੀ ਮਾਪਾਂ ਵਿੱਚ ਭਿੰਨਤਾਵਾਂ ਆਮ ਹਨ, ਪਰ ਫਿਰ ਵੀ ਇਸ ਭੁਚਾਲ ਦੀ ਰੀਡਿੰਗ ਪਿਛਲੇ ਕੁਝ ਸਾਲਾਂ ਵਿੱਚ ਮੋਰੱਕੋ 'ਚ ਸਭ ਤੋਂ ਵੱਧ ਮੰਨੀ ਜਾ ਰਹੀ ਹੈ। ਹਾਲਾਂਕਿ ਉੱਤਰੀ ਅਫਰੀਕਾ ਵਿੱਚ ਭੂਚਾਲ ਮੁਕਾਬਲਤਨ ਦੁਰਲੱਭ ਹਨ, ਪਰ 1960 ਵਿੱਚ ਅਗਾਦੀਰ ਦੇ ਨੇੜੇ 5.8 ਤੀਬਰਤਾ ਦਾ ਭੂਚਾਲ ਆਇਆ ਅਤੇ ਹਜ਼ਾਰਾਂ ਮੌਤਾਂ ਹੋਈਆਂ।
ਸ਼ੁੱਕਰਵਾਰ ਦੇ ਭੂਚਾਲ ਦਾ ਕੇਂਦਰ ਮੈਰਾਕੇਚ ਤੋਂ ਲਗਭਗ 70 ਕਿਲੋਮੀਟਰ ਦੱਖਣ ਵਿਚ ਐਟਲਸ ਪਹਾੜਾਂ ਵਿਚ ਉੱਚਾ ਸੀ। 

ਯੂਐਸਜੀਐਸ ਨੇ ਕਿਹਾ ਕਿ ਭੂਚਾਲ ਦਾ ਕੇਂਦਰ ਧਰਤੀ ਦੀ ਸਤ੍ਹਾ ਤੋਂ 18 ਕਿਲੋਮੀਟਰ ਹੇਠਾਂ ਸੀ, ਜਦੋਂ ਕਿ ਮੋਰੋਕੋ ਦੀ ਭੂਚਾਲ ਏਜੰਸੀ ਨੇ ਇਸ ਨੂੰ 8 ਕਿਲੋਮੀਟਰ ਹੇਠਾਂ ਰੱਖਿਆ। ਪੁਰਤਗਾਲ ਅਤੇ ਅਲਜੀਰੀਆ ਤੱਕ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ ਸਨ।