ਆਮਿਰ ਖਾਨ ਦੀ ਫ਼ਿਲਮ ਲਾਲ ਸਿੰਘ ਚੱਢਾ ਦਾ ਵਿਰੋਧ, ਸ਼ਿਵ ਸੈਨਾ ਹਿੰਦ ਨੇ ਕੀਤਾ ਬਾਈਕਾਟ ਦਾ ਐਲਾਨ

ਚੰਡੀਗੜ: ਜਲੰਧਰ ਦੇ ਐਮ. ਬੀ. ਡੀ. ਮਾਲ ਦੇ ਬਾਹਰ ਆਮਿਰ ਖਾਨ ਦੀ ਨਵੀਂ ਫਿਲਮ ਲਾਲ ਸਿੰਘ ਚੱਢਾ ਦੇ ਵਿਰੋਧ ਵਿਚ ਵੀਰਵਾਰ ਨੂੰ ਸ਼ਿਵ ਸੈਨਾ ਹਿੰਦ ਅਤੇ ਸਿੱਖ ਕੋਆਰਡੀਨੇਸ਼ਨ ਕਮੇਟੀ ਦੇ ਮੈਂਬਰ ਆਹਮੋ-ਸਾਹਮਣੇ ਹੋ ਗਏ। ਸ਼ਿਵ ਸੈਨਾ ਨੇ ਆਮਿਰ ਖਾਨ ਨੂੰ ਹਿੰਦੂ ਵਿਰੋਧੀ ਦੱਸਦੇ ਹੋਏ ਉਨ੍ਹਾਂ ਦੀ ਫਿਲਮ ਦਾ ਬਾਈਕਾਟ ਕੀਤਾ ਸੀ। ਦੂਜੇ ਪਾਸੇ ਜਦੋਂ ਇਸ ਬਾਰੇ ਸਿੱਖ ਤਾਲਮੇਲ ਕਮੇਟੀ ਨੂੰ ਪਤਾ ਲੱਗਾ ਤਾਂ ਇਸ ਦੇ ਮੈਂਬਰ ਵੀ ਮੌਕੇ ’ਤੇ ਪਹੁੰਚ ਗਏ। ਇਸ ਤੋਂ ਬਾਅਦ ਉਨ੍ਹਾਂ ਕਿਹਾ ਕਿ ਉਹ ਫਿਲਮ ਦਾ ਬਾਈਕਾਟ ਨਹੀਂ ਹੋਣ ਦੇਣਗੇ।

ਸ਼ਿਵ ਸੈਨਾ ਨੇ ਕਿਹਾ ਹਿੰਦੂ ਵਿਰੋਧੀ ਆਮਿਰ ਖਾਨ

ਸ਼ਿਵ ਸੈਨਾ ਨੇਤਾ ਨੇ ਕਿਹਾ ਕਿ ਆਮਿਰ ਖਾਨ ਹਿੰਦੂ ਵਿਰੋਧੀ ਹੈ ਉਹ ਹਮੇਸ਼ਾ ਹਿੰਦੂਆਂ ਵਿਰੁੱਧ ਸਾਜ਼ਿਸ਼ਾਂ ਰਚਦਾ ਰਹਿੰਦਾ ਹੈ। ਸ਼ਿਵ ਸੈਨਾ ਆਗੂਆਂ ਨੇ ਕਿਹਾ ਕਿ PK ਫਿਲਮ 'ਚ ਹਿੰਦੂ ਧਰਮ ਦਾ ਅਪਮਾਨ ਕੀਤਾ ਸੀ। 'ਸਾਡਾ ਵਿਰੋਧ ਲਾਲ ਸਿੰਘ ਚੱਢਾ ਦੇ ਖਿਲਾਫ ਨਹੀਂ ਹੈ, ਅਸੀਂ ਆਮਿਰ ਖਾਨ ਦੇ ਖਿਲਾਫ ਹਾਂ। ਉਨ੍ਹਾਂ ਕਿਹਾ ਜੇਕਰ ਕੋਈ ਅਜਿਹੀ ਫਿਲਮ ਪੰਜਾਬ ਵਿਚ ਆਉਂਦੀ ਹੈ ਜਿਸ ਨਾਲ ਹਿੰਦੂ-ਸਿੱਖ ਭਾਈਚਾਰਾ ਟੁੱਟਦਾ ਹੋਵੇ ਤਾਂ ਅਸੀਂ ਉਸ ਦਾ ਵਿਰੋਧ ਕਰਾਂਗੇ।

"PK ਫ਼ਿਲਮ ਆਉਣ 'ਤੇ ਨਹੀਂ ਕੀਤਾ ਵਿਰੋਧ"

ਸਿੱਖ ਤਾਲਮੇਲ ਕਮੇਟੀ ਦੇ ਅਹੁੱਦੇਦਾਰ ਹਰਪਾਲ ਸਿੰਘ ਚੱਡਾ ਨੇ ਕਿਹਾ ਕਿ ਸ਼ਿਵ ਸੈਨਾ ਨੇ ਫਿਲਮ ਪੀ. ਕੇ. ਵਿਚ ਆਮਿਰ ਖਾਨ ਵੱਲੋਂ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਸੀ ਪਰ ਫਿਲਮ ਨੂੰ ਰਿਲੀਜ਼ ਹੋਏ ਕਈ ਸਾਲ ਬੀਤ ਚੁੱਕੇ ਹਨ। ਉਸ ਨੇ ਪੁੱਛਿਆ ਕਿ ਤੁਸੀਂ ਉਸ ਸਮੇਂ ਕੀ ਕਰ ਰਹੇ ਸੀ? ਅੱਜ ਆਮਿਰ ਖਾਨ ਸਿੱਖੀ ਸਰੂਪ ਵਿੱਚ ਆਏ ਹਨ ਅਤੇ ਜਦੋਂ ਲਾਲ ਸਿੰਘ ਚੱਢਾ ਫਿਲਮ ਲੈ ਕੇ ਆਏ ਹਨ ਤਾਂ ਉਹ ਉਸਦਾ ਵਿਰੋਧ ਕਰ ਰਹੇ ਹਨ।