ഇന്ന് ചെറുപ്പക്കാരിലടക്കം കണ്ടുവരുന്ന ഉയർന്ന രക്തസമ്മർദ്ദം എന്ന രോഗാവസ്ഥയ്ക്ക് പരിഹാരം കാണുന്ന ഒരു ഭക്ഷണക്രമമാണ് ഡയറ്ററി അപ്രോച്ചസ് ടു സ്റ്റോപ് ഹൈപ്പർ ടെൻഷൻ അഥവാ ഡാഷ് ഡയറ്റ്. ഡാഷ് ഡയറ്റിന് ഇന്ന് ആളുകൾക്കിടെയിൽ പ്രചാരണം കൂടി വരികയാണ്.
ഉയർന്ന രക്തസമ്മർദ്ദമുള്ള രോഗികളും ഹൃദയാരോഗ്യം ശ്രദ്ധിക്കുന്നവരും ഡാഷ് ഡയറ്റ് പിന്തുടരുന്നത് ആരോഗ്യത്തിന് ഉത്തമമാണ്. ഡാഷ് ഡയറ്റ് പിന്തുടരുന്നവ‌ർക്ക് ഒരു ദിവസം എന്തെല്ലാം കഴിക്കാമെന്ന് നോക്കാം. ഈ ഡയറ്റ് പിന്തുടരുന്നവർ ഉപ്പിൻ്റെ അളവ് കുറയ്ക്കേണ്ടത് അത്യാവശ്യമാണ്.
തവിട് കളയാത്ത അരി, ഗോതമ്പ്, റാഗി, ഓട്‌സ്, ചോളം എന്നിവയിൽ ഏതെങ്കിലും ഒരു ധാന്യം ½ കപ്പ് വച്ച് നാല് മുതൽ ആറ് പോർഷൻ വരെ ഒരു ദിവസം കഴിക്കാവുന്നതാണ്.
ദിവസേനയുള്ള ഭക്ഷണത്തിൽ പഴങ്ങളും പച്ചക്കറികളും ധാരാളമായി ഉൾപ്പെടുത്തണം. രക്തക്കുഴലുകളെ അയവുള്ളതാക്കാൻ സഹായിക്കുന്ന പൊട്ടാസ്യം, മഗ്നീഷ്യം എന്നിവ അടങ്ങിയ ഇലക്കറികൾ കഴിക്കുന്നതാണ് ഉത്തമം. ഒരു നേരം 1 കപ്പ് പച്ചക്കറികളും 1 കപ്പ് ഫ്രൂട്ട്സും എന്നതാണ് അളവ്.
കൊഴുപ്പ് കുറഞ്ഞ പാൽ അല്ലെങ്കിൽ പാലുൽപന്നങ്ങളായ തൈര്, ചീസ്, യോഗർട്ട് എന്നിവ ദിവസേന രണ്ടോ മൂന്നോ തവണയായി കഴിക്കാവുന്നതാണ്. 1 കപ്പ് പാൽ അല്ലെങ്കിൽ തൈര്, അതുമല്ലെങ്കിൽ ഒന്നര ഔൺസ് ചീസ് എന്നതാണ് അളവ്.
ചിക്കൻ, മീൻ, മുട്ട എന്നിവ വറുത്ത് കഴിക്കാതെ ഗ്രിൽ ചെയ്തോ കറി വെച്ചോ കഴിക്കാവുന്നതാണ്. രണ്ടോ അതിൽ താഴെയോ പോർഷൻ മാത്രമേ കഴിക്കാവൂ. ഇവയിൽ ഏതെങ്കിലും പരമാവധി 3 ഔൺസ് എന്ന അളവിൽ മാത്രം കഴിക്കുക.
പയറുവർഗങ്ങളും കടല വർഗങ്ങളും ഡയറ്റിൽ ഉൾപ്പെടുത്താം. ഒരു ദിവസം ½ കപ്പ് പയറോ കടലയോ കഴിക്കാവുന്നതാണ്. ഏതെങ്കിലും വെജിറ്റബിൾ ഓയിൽ രണ്ട് മുതൽ മൂന്നു ടേബിൾ സ്‌പൂൺ വരെ ഭക്ഷണത്തിൽ ഉൾപ്പെടുത്താം.
ഡാഷ് ഡയറ്റ് ചെയ്യുമ്പോൾ ആഡഡ് ഷുഗർ പരമാവധി കുറയ്ക്കുക. മധുരപലഹാരങ്ങൾ, ചോക്ലേറ്റ്സ്, മധുരപാനീയങ്ങൾ എന്നിവയുടെ ഉപയോഗം പരമാവധി ഒഴിവാക്കേണ്ടതാണ്. 5 ടേബിൾ സ്‌പൂൺ മധുരം വരെ ഒരു ആഴ്ചയിൽ മൊത്തത്തിൽ ഉപയോഗിക്കാൻ ശ്രദ്ധിക്കണം.
ഇവിടെ നൽകിയിരിക്കുന്ന വിവരങ്ങൾ വീട്ടുവൈദ്യങ്ങളും പൊതുവായ വിവരങ്ങളും അടിസ്ഥാനമാക്കിയുള്ളതാണ്. അത് സ്വീകരിക്കുന്നതിന് മുമ്പ് വൈദ്യോപദേശം തേടുക