Pipili ByPoll 2021: ରୁଦ୍ରଙ୍କୁ ଟିକେଟ ମିଳିବା ପରେ ନବୀନଙ୍କୁ ଭେଟିଲେ ଭଉଣୀ ପଲ୍ଲବୀ ଓ ଭିଣୋଇ ଅର୍ଦ୍ଧେନ୍ଦୁ

ଭୁବନେଶ୍ୱର: ପିପିଲି ଉପନିର୍ବାଚନ ପାଇଁ ତାରିଖ ଘୋଷଣା ହୋଇସାରିଛି । ପିପିଲି ଉପନିର୍ବାଚନ (Pipili By poll)ପାଇଁ ତାରିଖ ଘୋଷଣା ପରେ ଆଚରଣ ବିଧି ଲାଗୁ ହୋଇଛି । ଏପ୍ରିଲ ୧୭ରେ ପିପିଲି ଉପନିର୍ବାଚନ ହେବ । ନାମାଙ୍କନ ଦାଖଲର ଶେଷ ତାରିଖ ମାର୍ଚ୍ଚ ୩୦ ରହିଥିବା ବେଳେ ନାମାଙ୍କନ ପ୍ରତ୍ୟାହାରର ଶେଷ ତାରିଖ ଏପ୍ରିଲ ୩ ତାରିଖକୁ ଧାର୍ଯ୍ୟ କରାଯାଇଛି । ମେ ୨ ତାରିଖରେ ଭୋଟ ଗଣତି ସହ ରେଜଲ୍ଟ (By poll Election Result) ପ୍ରକାଶ କରାଯିବ ।  ତେବେ ବିଜେଡି ଓ ବିଜେପି ନିଜ ନିଜର ପ୍ରାର୍ଥୀ ଘୋଷଣା କରିସାରିଥିବା ବେଳେ କଂଗ୍ରେସ ଏବେ ସୁଦ୍ଧା ପ୍ରାର୍ଥୀ ଘୋଷଣା କରିନାହିଁ ।

ସେପଟେ ନାଁ ଘୋଷଣା ପରେ ଆଜି ବିଜେଡି ପ୍ରାର୍ଥୀ ରୁଦ୍ର ପ୍ରତାପ ମହାରଥୀ (Rudra Pratap Maharathy) ନବୀନ ନିବାସ ଯାଇ ମୁଖ୍ୟମନ୍ତ୍ରୀ (Chief Minister) ନବୀନ ପଟ୍ଟନାୟକ (Naveen Patnaik) ଙ୍କ ଆଶୀର୍ବାଦ ନେବା ସହ ଟିକେଟ ନେଇଛନ୍ତି । ଏହି ସମୟରେ ରୁଦ୍ରଙ୍କ ଭଉଣୀ ପଲ୍ଲବୀ ଓ ଭିଣୋଇ ଅଭିନେତା ଅର୍ଦ୍ଧେନ୍ଦୁ ମଧ୍ୟ ଉପସ୍ଥିତ ଥିଲେ । ପରେ ପରେ ଟିକେଟ ନେବା ପରେ ରୁଦ୍ର ନିଆ ମାଆଙ୍କ ଆଶୀର୍ବାଦ ନେଇଥିଲେ । ସେହି ସମୟରେ ପୁରା ପରିବାରଙ୍କ ଆଖିରେ ଲୁହ ଦେଖିବାକୁ ମିଳିଥିଲା । ବିଜୁ ବାବୁ ଜିନ୍ଦାବାଦ, ନବୀନ ବାବୁ ଜିନ୍ଦାବାଦ୍ ରେ ଫାଟିପଡ଼ୁଥିଲା ଅଞ୍ଚଳ । ପ୍ରଦୀପ ମହାରଥୀ ଅମର ରହେ ନାରା ସମୟରେ ପୁଅ ରୁଦ୍ର କାନ୍ଦିବାକୁ ଲାଗିଥିଲେ । 

ଗତବର୍ଷ ଅକ୍ଟୋବର ମାସରେ ପ୍ରଦୀପ ମହାରଥୀଙ୍କ ଦେହାନ୍ତ ପରଠାରୁ ପିପିଲି (Pipili Assembly Seat) ବିଧାନସଭା ଆସନ ଖାଲିପଡ଼ିଛି। କିଛିଦିନ ତଳେ ଗଣମାଧ୍ୟମରେ ସ୍ୱର୍ଗତଃ ମହାରଥୀଙ୍କ ପତ୍ନୀ ଓ ପୁତ୍ର ଉଭୟ ନିର୍ବାଚନ ଲଢ଼ିବାକୁ ଇଚ୍ଛୁକ ବୋଲି କହିଥିଲେ । ଆଉ ଏହା ପରେ ଲାଗିରହିଥିଲା ଜୋରଦାର ଚର୍ଚ୍ଚା କି କାହାକୁ ଦଳର ମୁଖିଆ ଭରସିବେ । ଆଉ କଳ୍ପନାଜଳ୍ପନାର ଅନ୍ତ ଘଟାଇ ଶେଷରେ ରୁଦ୍ର ମହାରଥୀ (Rudra Maharathy) ଙ୍କୁ ଭରସିଛନ୍ତି ନବୀନ ।