ପଞ୍ଜଶୀର ଉପରେ ଆକ୍ରମଣ କରିବାକୁ ଆସିଥିବା ୩୫୦ ତାଲିବାନୀ ଆତଙ୍କୀ ନିହତ, ୪୦ରୁ ଉର୍ଦ୍ଧ୍ୱ ଅଟକ

ନୂଆଦିଲ୍ଲୀ: Taliban take over Afghanistan: ତାଲିବାନ (Taliban) ଗୋଟିଏ ପଟେ ଦୁନିଆ ଆଗରେ ଆଫଗାନିସ୍ତାନ (Afghanistan) ରେ ଶାନ୍ତିପୂର୍ଣ୍ଣ ଭାବରେ ସରକାର ଗଠନ ଓ ଏହାର   ପରିଚାଳନାର ଦାବି କରୁଛି । କିନ୍ତୁ ଅନ୍ୟପକ୍ଷରେ ତାଲିବାନ ଆତଙ୍କୀମାନେ କ୍ରମାଗତ ଭାବରେ ପଞ୍ଜଶୀର (Panjshir) ଅଞ୍ଚଳରେ ଅନୁପ୍ରବେଶ କରିବାକୁ ଚେଷ୍ଟା କରୁଛନ୍ତି । ସେପଟେ ନର୍ଦର୍ନ ଆଲାଇନ୍ସ (Northern Alliance) ଟ୍ୱିଟରରେ ଦାବି କରିଛି ଯେ ଗତକାଲି ରାତିରେ ଖାୱାକରେ ଆକ୍ରମଣ କରିବାକୁ ଆସିଥିବା ପ୍ରାୟ ୩୫୦ ତାଲିବାନ ଆତଙ୍କୀ ନିହତ ହୋଇଥିବାବେଳେ ୪୦ରୁ ଅଧିକ ଅଟକ ଅଛନ୍ତି । ଏହି ସମୟ ମଧ୍ୟରେ NRF ହାତରେ ଅନେକ ଆମେରିକୀୟ ଯାନ, ଅସ୍ତ୍ରଶସ୍ତ୍ର ଆସିଛି ।

ଏହା ପୂର୍ବରୁ ଖବର ଆସିଥିଲା ​​ଯେ ତାଲିବାନ ମଙ୍ଗଳବାର ରାତିରେ ପଞ୍ଜଶୀର ମଧ୍ୟକୁ ପ୍ରବେଶ କରିବାକୁ ଚେଷ୍ଟା କରିଥିଲା। ଯେଉଁଠାରେ ତାଲିବାନ ଆତଙ୍କୀ ନର୍ଦର୍ନ ଆଲାଇନ୍ସର ଯୋଦ୍ଧାଙ୍କ ସହ ମୁହାଁମୁହିଁ ହୋଇଥିଲେ ।

ସ୍ଥାନୀୟ ସାମ୍ବାଦିକ ନାତିକ ମାଲିକଜାଦାଙ୍କ ଏକ ଟ୍ୱିଟ୍ ଅନୁଯାୟୀ ଆଫଗାନିସ୍ତାନର ପଞ୍ଜଶୀର ପ୍ରବେଶ ଦ୍ୱାରରେ ଗୁଲବାହାର ଅଞ୍ଚଳରେ ତାଲିବାନ ସଦସ୍ୟ ଓ ନର୍ଦର୍ନ ଆଲାଇନ୍ସ ଯୋଦ୍ଧାଙ୍କ ମଧ୍ୟରେ ଗୁଳି ବିନିୟମ ହୋଇଛି । କେବଳ ଏତିକି ନୁହେଁ ତାଲିବାନର ଏଠାରେ ଏକ ପୋଲ ଧ୍ୱଂସ କରିଦେବାର ଖବର ମଧ୍ୟ ରହିଛି । ଏହା ବ୍ୟତୀତ ଅନେକ ଆତଙ୍କୀ ଧରାପଡିଛନ୍ତି ।

ଏହାପୂର୍ବରୁ ସୋମବାର ରାତିରେ ମଧ୍ୟ ତାଲିବାନ ଓ ନର୍ଦର୍ନ ଆଲାଇନ୍ସ ଯୋଦ୍ଧା ମଧ୍ୟରେ ଗୁଳି ବିନିମୟ ହୋଇଥିଲା । ପ୍ରାୟ ୭-୮ ତାଲିବାନ ଆତଙ୍କୀଙ୍କ ମୃତ୍ୟୁ ହୋଇଥିବା ସୂଚନା ମିଳିଥିଲା । ପଞ୍ଜଶୀର ତାଲିବାନ ଦଖଲ ଠାରୁ ବହୁ ଦୂରରେ ରହିଛି, ଯେଉଁଠାରେ ଅହମ୍ମଦ ମାସୁଦଙ୍କ ନେତୃତ୍ୱରେ ନର୍ଦର୍ନ ଆଲାଇନ୍ସ ତାଲିବାନ ବିରୁଦ୍ଧରେ ଲଢୁଛି ।

ତାଲିବାନ ସହିତ ଲଢେଇକୁ ଅହମ୍ମଦ ମାସୁଦଙ୍କ ମୁଖପାତ୍ର ଫହିମ ଦଶ୍ତି ମଧ୍ୟ ନିଶ୍ଚିତ କରିଛନ୍ତି । ଫହିମଙ୍କ ଅନୁଯାୟୀ, ସୋମବାର ରାତିରେ ତାଲିବାନ ପଞ୍ଜଶୀରରେ ଆକ୍ରମଣ କରିଥିଲା ​​ଓ ଅନୁପ୍ରବେଶ ଉଦ୍ୟମ କରାଯାଇଥିଲା କିନ୍ତୁ ତାହା ସଫଳ ହୋଇନଥିଲା । ତାଲିବାନ ପଞ୍ଜଶୀର ଅଞ୍ଚଳରେ ଇଣ୍ଟରନେଟ୍ ବନ୍ଦ କରିସାରିଛି । ତେବେ ପରେ ଏହି ସେବାକୁ ଚାଲୁ କରାଯାଇଥିଲା ।

ଉଲ୍ଲେଖନୀୟ କଥା ହେଉଛି, ଅଗଷ୍ଟ ୩୦ରେ ଆମେରିକାର ସୈନ୍ୟବାହିନୀ କାବୁଲ ବିମାନ ବନ୍ଦର ଛାଡିଥିଲେ । ବର୍ତ୍ତମାନ ଆଫଗାନିସ୍ତାନ ତାଲିବାନ ଦ୍ୱାରା ସମ୍ପୂର୍ଣ୍ଣ ଶାସିତ । ତାଲିବାନ ନେତୃତ୍ୱରେ ଖୁବ ଶୀଘ୍ର ଆଫଗାନିସ୍ତାନରେ ଏକ ନୂତନ ସରକାର ଗଠନ ହେବ । ତାଲିବାନର ବରିଷ୍ଠ ନେତାମାନେ କାନ୍ଦାହାରରେ ଉପସ୍ଥିତ ଅଛନ୍ତି, ଯେଉଁମାନେ ଶୀଘ୍ର କାବୁଲକୁ ଯାଇପାରନ୍ତି । ଯାହା ପରେ ସରକାର ଗଠନ ପ୍ରକ୍ରିୟା ଆରମ୍ଭ ହେବ ।

ଅଧିକ ପଢ଼ନ୍ତୁ:-ଏହି କାରଣରୁ ଆଫଗାନିସ୍ତାନରୁ ସୈନ୍ୟ ଫେରାଇ ନେଲେ ବାଇଡେନ!