Punjab Congress Crisis; ସୋନିଆଙ୍କୁ ସିଦ୍ଧୁଙ୍କ ୧୩ ସୂତ୍ରି ଚିଠି, କଲେ ଏହି ଦାବି

ନୂଆଦିଲ୍ଲୀ: ବର୍ତ୍ତମାନ ସୁଦ୍ଧା ପଞ୍ଜାବ କଂଗ୍ରେସରେ ଦେଖାଦେଇଥିବା ବିବାଦର ସମାଧାନ ହୋଇନାହିଁ। ଏହାରି ଭିତରେ ନବଜୋତ ସିଂ ସିଦ୍ଧୁ କଂଗ୍ରେସ ସୁପ୍ରିମୋ ସୋନିଆ ଗାନ୍ଧୀଙ୍କୁ ଏକ ଚିଠି ଲେଖିଛନ୍ତି। ଚିଠିରେ ସିଦ୍ଧୁ ଡ୍ରଗ୍ସ, ମଦ ମାଫିଆ ସମେତ ୧୩ଟି ପ୍ରସଙ୍ଗକୁ ଦର୍ଶାଇ ସୋନିଆଙ୍କୁ ପଞ୍ଜାବ ସରକାରଙ୍କୁ ଏହି ପ୍ରସଙ୍ଗରେ କାର୍ଯ୍ୟ କରିବାକୁ କହିଛନ୍ତି। ସିଦ୍ଧୁ, ସୋନିଆ ଗାନ୍ଧୀଙ୍କ ଠାରୁ ମଧ୍ୟ ଏହି ୧୩ଟି ବିଷୟ ଉପରେ ଆଲୋଚନା କରିବାକୁ ସମୟ ମାଗିଛନ୍ତି। ଚିଠିରେ ସିଦ୍ଧୁ ନିଜକୁ ରାଜ୍ୟ କଂଗ୍ରେସ ସଭାପତି ବୋଲି ବର୍ଣ୍ଣନା କରୁଥିବାବେଳେ କାର୍ଯ୍ୟନିର୍ବାହୀ (ସରକାର) ଉପରେ ନଜର ରଖିବାର ଦାୟିତ୍ୱ ରହିଛି ବୋଲି ସେ କହିଛନ୍ତି।

ନବଜୋତ ସିଂ ସିଦ୍ଧୁ (Navjot Singh Sidhu) କହିଛନ୍ତି ଯେ, ସରକାରରେ ଦଳିତ ସମାଜର ସ୍ୱରକୁ ମଜବୁତ କରିବା ପାଇଁ ଜଣେ ଦଳିତଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା, କିନ୍ତୁ ଏହା ସତ୍ତ୍ୱେ ସେ ରାଜ୍ୟରେ ସମାନ ସ୍ଥାନ ପାଇନାହାଁନ୍ତି। ଧାର୍ମିକ ସମାଜର ଅତି କମରେ ଜଣେ ସଦସ୍ୟଙ୍କୁ ଚରଣଜିତ ସିଂ ଚନ୍ନି (Charanjit Singh Channi) କ୍ୟାବିନେଟରେ ମନ୍ତ୍ରୀ କରାଯିବା ବ୍ୟତୀତ ଦୋବା ଅଞ୍ଚଳ ତଥା ପଛୁଆ ବର୍ଗର ଦୁଇଜଣ ମନ୍ତ୍ରୀ ହେବା ଉଚିତ ବୋଲି ସିଦ୍ଧୁ ଦାବି କରିଛନ୍ତି। ସିଦ୍ଧୁ, ସୋନିଆ (Sonia Gandhi) ଙ୍କୁ ଲେଖିଥିବା ଚିଠିରୁ ଏହା ସ୍ପଷ୍ଟ ଯେ, ରାହୁଲ ଗାନ୍ଧୀଙ୍କୁ ଭେଟିବା ସତ୍ତ୍ୱେ ତାଙ୍କର ଅସନ୍ତୋଷ ଶେଷ ହୋଇନାହିଁ ଏବଂ ସେଥିପାଇଁ ସେ ଏବେ ଏକ ନୂଆ କୌଶଳ ଆପଣାଇଛନ୍ତି।

ଶୁକ୍ରବାର ସିଦ୍ଧୁ, ଦିଲ୍ଲୀର ତାଙ୍କ ବାସଭବନରେ ରାହୁଲ ଗାନ୍ଧୀ (Rahul Gandhi) ଙ୍କୁ ଭେଟିଥିଲେ। ଏହି ବୈଠକ ପରେ ସିଦ୍ଧୁ ନିଷ୍ପତ୍ତି ନେଇଥିଲେ ଯେ, ସେ ପଞ୍ଜାବ ୟୁନିଟର ସଭାପତି ଭାବରେ କାର୍ଯ୍ୟ କରିବେ। ସେ କହିଛନ୍ତି, ଅଭିଯୋଗ ଯାହା ହେଉନା କାହିଁକି ମୁଁ ରାହୁଲ ଗାନ୍ଧୀଙ୍କ ସହ ସେୟାର କରିଥିଲି। ସବୁ ସମାଧାନ ହୋଇଛି। ଯେତେବେଳେ ସେ ତାଙ୍କ ଇସ୍ତଫା ପ୍ରତ୍ୟାହାର କରିଛନ୍ତି କି ବୋଲି ପଚରାଯିବାରୁ, ସିଦ୍ଧୁ କହିଛନ୍ତି ଯେ- ମୁଁ ଯାହା କରୁଛି ତାହା ଆପଣଙ୍କ ସାମ୍ନାରେ ଅଛି। ରାହୁଲ ଗାନ୍ଧୀଙ୍କ ସହ ସାକ୍ଷାତ ସମୟରେ ପଞ୍ଜାବ କଂଗ୍ରେସର ଦାୟିତ୍ୱରେ ଥିବା ହରିଶ ରାୱତ ମଧ୍ୟ ଉପସ୍ଥିତ ଥିଲେ। 

ସୂଚନାଯୋଗ୍ୟ, କ୍ୟାପଟେନ ଅମରିନ୍ଦର ସିଂଙ୍କ ଅସନ୍ତୋଷ ସତ୍ତ୍ୱେ କଂଗ୍ରେସ (congress) ହାଇକମାଣ୍ଡଙ୍କ ଦ୍ୱାରା ଚଳିତ ବର୍ଷ ଜୁଲାଇ ୧୦ରେ ନବଜୋତ ସିଂ ସିଦ୍ଧୁ ରାଜ୍ୟ ଦଳର ସଭାପତି ଭାବରେ ନିଯୁକ୍ତ ହୋଇଥିଲେ। ତେବେ ବିବାଦ ଶେଷ ହୋଇନଥିଲା। ଏହା ପରେ ସେପ୍ଟେମ୍ବର ୧୮ରେ ଅମରିନ୍ଦର ସିଂ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ପରେ ୨୦ ସେପ୍ଟେମ୍ବରରେ ଚରଣଜିତ ସିଂ ଚନ୍ନି ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଚନ୍ନି ସରକାରଙ୍କ କିଛି ନିଷ୍ପତ୍ତି ଉପରେ ରାଗିଯିବା ପରେ ସିଦ୍ଧୁ ଇସ୍ତଫା ଦେଇଛନ୍ତି।