WTC Points Table: ନ୍ୟୁଜିଲ୍ୟାଣ୍ଡ ଠାରୁ ବେଙ୍ଗାଲୁରୁ ଟେଷ୍ଟ ହାରିବା ପରେ ଭାରତକୁ ହେଲା ବଡ କ୍ଷତି, ଦେଖନ୍ତୁ ପଏଣ୍ଟ ଟେବୁଲ୍
World Test Championship Points Table: ଆଇସିସି ଟେଷ୍ଟ ବିଶ୍ୱ ଚାମ୍ପିଅନସିପର ପଏଣ୍ଟ ଟେବୁଲରେ ଭାରତ କ୍ଷତି ସହିଛି। ବେଙ୍ଗାଲୁରୁରେ ବିଜୟ ପରେ ନ୍ୟୁଜିଲ୍ୟାଣ୍ଡ ଦଳ ଦୁଇଟି ସ୍ଥାନ ଉପରକୁ ଉଠିଛି।
WTC Points Table update: ରବିବାର ଦିନ ନ୍ୟୁଜିଲ୍ୟାଣ୍ଡ ବିପକ୍ଷ ପ୍ରଥମ ଟେଷ୍ଟରେ ଭାରତୀୟ ଦଳକୁ ୮ ୱିକେଟରେ ପରାଜୟର ସମ୍ମୁଖୀନ ହେବାକୁ ପଡିଛି। ଭାରତ ମାତ୍ର ୧୦୭ ରନ୍ର ଲକ୍ଷ୍ୟ ଧାର୍ଯ୍ୟ କରିଥିଲା, ଯାହାକୁ ପିଛାକରି ନ୍ୟୁଜିଲ୍ୟାଣ୍ଡ ସହଜରେ ହାସଲ କରିନେଇଥିଲା। ବେଙ୍ଗାଲୁରୁ ଟେଷ୍ଟରେ ପରାଜୟ ପରେ ଆଇସିସି ଟେଷ୍ଟ ବିଶ୍ୱ ଚାମ୍ପିୟନଶିପ (WTC) ୨୦୨୩-୨୫ ର ପଏଣ୍ଟ ଟେବୁଲରେ ଭାରତକୁ କ୍ଷତି ହୋଇଛି। ଭାରତ ଶୀର୍ଷରେ ରହିଛି କିନ୍ତୁ ଜିତିବାରେ ଶତକଡା କମ୍ ହୋଇଛି। ଭାରତର ବିଜୟ ହାର ୭୪.୨୪ ରୁ ୬୮.୦୫ କୁ ହ୍ରାସ ପାଇଛି।
WTC ର ବର୍ତ୍ତମାନର ଚକ୍ରରେ ଭାରତ ୮ଟି ମ୍ୟାଚ୍ ଜିତିଛି ଓ ୧୨ଟି ଟେଷ୍ଟ ମ୍ୟାଚ୍ ମଧ୍ୟରୁ ତିନୋଟି ହାରିଛି ଏବଂ କେବଳ ଗୋଟିଏ ମ୍ୟାଚ୍ ଡ୍ର ରହିଥିଲା। ଏଥି ସହିତ ବେଙ୍ଗାଲୁରୁ ଟେଷ୍ଟ ବିଜୟ ହେବା ପରେ ନ୍ୟୁଜିଲ୍ୟାଣ୍ଡ ଲାଭ ହୋଇଛି। କିୱି ଦଳ ଦୁଇଟି ସ୍ଥାନ ଉପରକୁ ଉଠି ଚତୁର୍ଥ ସ୍ଥାନରେ ପହଞ୍ଚିଛି। ନ୍ୟୁଜିଲ୍ୟାଣ୍ଡ ବିଜୟ ପ୍ରତିଶତ ୩୭.୫୦ ରୁ ୪୪.୪୪ କୁ ଚାଲିଯାଇଛି। WTC ରେ ୯ଟି ଟେଷ୍ଟ ମଧ୍ୟରୁ ଚାରିଟି ଜିତିବା ସମେତ ନ୍ୟୁଜିଲ୍ୟାଣ୍ଡ ୫ଟି ମ୍ୟାଚ୍ ହାରିଛି। ବିଜୟ ଶତକଡା ୬୨.୫୦ ସହିତ ଅଷ୍ଟ୍ରେଲିଆ ଦ୍ୱିତୀୟ ସ୍ଥାନରେ ଅଛି।
ଟେବୁଲରେ ଶ୍ରୀଲଙ୍କା (୫୫.୫୬) ତୃତୀୟ ସ୍ଥାନରେ ଅଛି। ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ବିପର୍ଯ୍ୟୟର ସମ୍ମୁଖୀନ ହୋଇଛନ୍ତି। ଉଭୟ ଗୋଟିଏ ସ୍ଥାନ ତଳକୁ ଖସିଆସିଛି। ଇଂଲଣ୍ଡ (୪୩.୦୬) ପଞ୍ଚମ ସ୍ଥାନରେ ଓ ଦକ୍ଷିଣ ଆଫ୍ରିକା (୩୮.୮୯) ଷଷ୍ଠ ସ୍ଥାନରେ ରହିଛି। ବାଂଲାଦେଶ (୩୪.୩୮) ସପ୍ତମ ସ୍ଥାନରେ ଓ ପାକିସ୍ତାନ (୨୫.୯୩) ଅଷ୍ଟମ ସ୍ଥାନରେ ରହିଛି। ବର୍ତ୍ତମାନ ପାକିସ୍ତାନ ଏବଂ ଇଂଲଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ସିରିଜ୍ ଚାଲିଛି। ୱେଷ୍ଟଇଣ୍ଡିଜ୍ ନବମ ସ୍ଥାନରେ ପଏଣ୍ଟ ଟେବୁଲର ତଳେ ରହିଛି। ୱେଷ୍ଟଇଣ୍ଡିଜ୍ ର ବିଜୟ ପ୍ରତିଶତ ୧୮.୫୨ ରହିଛି।
ଭାରତ ବନାମ ନ୍ୟୁଜିଲ୍ୟାଣ୍ଡ ବେଙ୍ଗାଲୁରୁ ଟେଷ୍ଟ ବିଷୟରେ କହିବାକୁ ଗଲେ ରୋହିତ ବ୍ରିଗେଡ ପ୍ରଥମ ଇନିଂସରେ ମାତ୍ର ୪୬ ରନରେ ଅଲ୍ ଆଉଟ୍ ହୋଇଥିଲା। ଏହାର ଜବାବରେ ନ୍ୟୁଜିଲ୍ୟାଣ୍ଡ ୪୦୨ ରନ୍ ସ୍କୋର କରି ଏକ ଶକ୍ତିଶାଳୀ ଅଗ୍ରଣୀ ହାସଲ କରିଥିଲା। ସରଫରାଜ ଖାନ (୧୫୦), ଋଷଭ ପନ୍ତ (୯୯) ଓ ବିରାଟ କୋହଲିଙ୍କ ଚମତ୍କାର ବ୍ୟାଟିଂ ଯୋଗୁଁ ଭାରତ ଦ୍ୱିତୀୟ ଇନିଂସରେ ଭଲ ପ୍ରତ୍ୟାବର୍ତ୍ତନ କରିଥିଲା। ଭାରତ ୪୬୨ ରନ୍ ସଂଗ୍ରହ କରିଥିଲା। ତେବେ ଭାରତ ଦ୍ୱିତୀୟ ଇନିଂସରେ ଏକ ବଡ ଟାର୍ଗେଟ ଦେବାରେ ବିଫଳ ହୋଇଥିଲା। ସିରିଜର ଦ୍ୱିତୀୟ ଟେଷ୍ଟ ୨୪ ଅକ୍ଟୋବରରୁ ଆରମ୍ଭ ହେବ।