ଗୁଣି ସନ୍ଦେହରେ ବାପ-ପୁଅଙ୍କୁ ନିର୍ମମ ହତ୍ୟା

ପ୍ରେମାନନ୍ଦ ପୂଜାରୀ, ଗଜପତି: ଅନ୍ଧବିଶ୍ୱାସରୁ ପୁଣି ଏକ ଘଟିଛି ବିବତ୍ସ ହତ୍ୟାକାଣ୍ଡ। ଗୁଣି ସନ୍ଦେହରେ ଗୋଟିଏ ପରିବାରର ଦୁଇ ଦୁଇ ଜଣଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଛି। ମୃତକ ହେଲେ ବାପା ଲୁକ ଦଳବେହେରା ଓ ପୁଅ ଅନକ ଦଳବେହେରା। ଗଜପତି ଜିଲ୍ଲା ଅଡବା ଥାନା ଅନ୍ତର୍ଗତ ଗୁଲୁବା ପଞ୍ଚାୟତର ମୁଠାଗୁଡା ଗାଁରେ ଘଟଣାଟି ଘଟିଛି।

ଗାଁ ଠାରୁ ଅଧକିମି ଦୂର ଜଙ୍ଗଲରେ ବାପା ପୁଅ ଦୁଇଜଣଙ୍କୁ ଆକ୍ରମଣ କରାଯାଇଥିଲା। ଜଙ୍ଗଲରେ ବାପାର ମୃତ ଶରୀର ପଡିଥିବା ବେଳେ ପୁଅର ମୃତ ଶରୀର ଘରେ ପଡିରହିଛି। ଏ ନେଇ ଅଡବା ଥାନାରେ ସ୍ଥାନୀୟ ସରପଞ୍ଚଙ୍କ ଅଭିଯୋଗ କ୍ରମେ ଘଟଣା ସ୍ଥଳରେ ଅଡବା ପୋଲିସ ଓ ସାଇନ୍ଟିଫିକ ଟିମ ପହଞ୍ଚି ତଦନ୍ତ ଚଳାଇଛନ୍ତି।

ମିଳିଥିବା ସୂଚନା ପ୍ରକାରେ ଗତକାଲି ରାତିରେ ଲୁକା ଏବଂ ପୁଅ ଅନକ ନିଜ କାଜୁବାଡ଼କୁ ଯାଇଥିଲେ। ସେହି ସମୟରେ କିଛି ଦୁର୍ବୃତ୍ତ ସେମାନଙ୍କୁ ଆକ୍ରମଣ କରିଥିଲେ। ଘଟଣା ସ୍ଥଳରେ ଲୁକାଙ୍କ ମୃତ୍ୟୁ ହୋଇଥିବା ବେଳେ ଗୁରୁତର ଭାବେ ଆହତ ଅବସ୍ଥାରେ ଅନକ କୌଶଳ କ୍ରମେ ଘରେ ପହଞ୍ଚିଥିଲେ। ହେଲେ ପରେ ଘରେ ତାଙ୍କ ମୃତ୍ୟୁ ଘଟିଥିଲା।

ଲୁକା ନିଜ ପରିବାର ସହ ୧୦ ବର୍ଷ ହେଲା ନିଜ ଗ୍ରାମ ପାଟିପଙ୍କାରୁ ଆସି ମୁଠାଗୁଡାରେ ଚାଷବାସ କରି ରହୁଥିଲେ। ତେଵେ ଗୁଣିଗାରେଡିରୁ ହତ୍ୟାକାଣ୍ଡ ହୋଇଥିବା ପୋଲିସ ପ୍ରାଥମିକ ତଦନ୍ତରୁ ସୂଚନା ଦେଇଛି। ଆର. ଉଦୟଗିରି SDPOଙ୍କ ନେତୃତ୍ୱରେ ମୋହନା ଏବଂ ଅଡବା ପୋଲିସ ଟିମ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅନ୍ୟପଟେ ଅନେକ ଦିଗକୁ ନେଇ ପୋଲିସ ତଦନ୍ତ କରୁଥିବା SDPO ଦିଲ୍ଲୀପ କୁମାର ନାୟକ ସୂଚନା ଦେଇଛନ୍ତି।