ସ୍ତ୍ରୀ ସହ ଝଗଡ଼ା କରି ନବଜାତ ଶିଶୁ ପୁତ୍ରକୁ ହତ୍ୟା, ଅଭିଯୁକ୍ତ ଗିରଫ

ରାମଚନ୍ଦ୍ର ଦଳେଇ, ଝରୀଗାଁ: ଘରୋଇ କଳିର କରୁଣ ପରିଣତି । ମା' କୋଳରୁ ଟାଣି ନେଇ ନବଜାତ ଶିଶୁ ପୁତ୍ରକୁ ହତ୍ୟା କଲା ବାପା । ଏଭଳି ଅଭାବନୀୟ ଘଟଣା ଘଟିଛି ନବରଙ୍ଗପୁର ଝରୀଗାଁ ବ୍ଲକ ଅନ୍ତର୍ଗତ ଚକଲା ପଦର ପଞ୍ଚାୟତ ଗାଈବନ୍ଧା ଗ୍ରାମରେ । ଅଭିଯୁକ୍ତ ବାସୁଦେବ ଜାନିକୁ ଗିରଫ କରିଛି ପୋଲିସ । 

ସୂଚନା ମୁତାବକ, ପୁରା ଘଟଣା ଥିଲା ଏପରି । ଅଭିଯୁକ୍ତ ବାସୁଦେବ ଜାନି ସ୍ତ୍ରୀ ସହ ଝଗଡ଼ା କରିଥିଲା । ଆଉ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ହୋଇଥିବା ଏହି ଝଗଡ଼ା ଉଗ୍ରରୂପ ନେଇଥିଲା । ନିଜ ସ୍ତ୍ରୀ କୋଳରୁ ୨୦ ଦିନର ନବଜାତ ଶିଶୁ ପୁତ୍ରକୁ ଛଡ଼ାଇଆଣି ହତ୍ୟା କରିଥିଲା ଅଭିଯୁକ୍ତ ବାସୁଦେବ । କେବଳ ଏତିକି ନୁହେଁ, ନିଜ ଔରସରୁ ଜନ୍ମିତ ଶିଶୁ ପୁତ୍ରକୁ ମାରି ନଦୀରେ ଫୋପାଡ଼ି ଦେଇଥିଲା । 

ଅନ୍ୟପଟେ ଏନେଇ ଝରୀଗାଁ ଥାନାରେ ଅଭିଯୋଗ କରିଥିଲେ ପରିବାର ଲୋକ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲା । ନବଜାତ ଶିଶୁ ପୁତ୍ରର ମୃତଦେହକୁ ନଦୀରୁ ଉଦ୍ଧାର କରିବା ସହ ଘଟଣାର ତଦନ୍ତ ଚଳାଇଛି ଝରୀଗାଁ ପୋଲିସ । ସେହିପରି ଅଭିଯୁକ୍ତ ବାସୁଦେବ ଜାନିକୁ ଗିରଫ କରିଛି ପୋଲିସ ।