ପୁଣିଥରେ ଚୀନର ଷଡଯନ୍ତ୍ର, ଲଦାଖ ପରେ ଅରୁଣାଚଳ ପ୍ରଦେଶ ସୀମାରେ ବଢ଼ାଉଛି ସୈନ୍ୟ କ୍ଷମତା

ନୂଆଦିଲ୍ଲୀ: ପୂର୍ବ ଲଦାଖ ପରେ ଚୀନ ବର୍ତ୍ତମାନ ଅରୁଣାଚଳ ପ୍ରଦେଶ(Arunachal Pradesh) ସୀମାରେ ସୈନ୍ୟଙ୍କ ସଂଖ୍ୟା ବୃଦ୍ଧି କରୁଛି । ଯାହା ଦ୍ୱାରା ଆଉ ଏକ ବଡ଼ ସଙ୍କଟ ଦେଖାଦେଇପାରେ । ପୁଣି ଭାରତ-ଚୀନ ମଧ୍ୟରେ ସୀମା ବିବାଦକୁ ଆହୁରି ବୃଦ୍ଧି କରିପାରେ । ଗୁଇନ୍ଦା ସଂସ୍ଥା ସରକାରଙ୍କୁ ଜଣାଇଛନ୍ତି ଯେ, ଚୀନ୍‌ର PLA ଅର୍ଥାତ ଚୀନୀ ସେନା ଅରୁଣାଚଳ ପ୍ରଦେଶ ସୀମାରେ ସୈନ୍ୟ ସଂଖ୍ୟା ବୃଦ୍ଧି କରୁଛନ୍ତି । ଏହି ରିପୋର୍ଟରେ ବିଶେଷ ଭାବରେ ଅରୁଣାଚଳ ପ୍ରଦେଶର ସୁବାନସରୀ ଅଞ୍ଚଳର ଠିକ ସାମ୍ନାରେ ଥିବା ତିବ୍ଦତର ଲୁଙ୍ଗରେ PLAର ଏକ ନୂତନ ହେଲିପ୍ୟାଡ୍ ନିର୍ମାଣ କରିବାର ସୂଚନା ରହିଛି ।

LACରେ ଚାଇନା ଡ୍ରୋନ୍ ମୁତୟନ କରିଛି 

ଏହା ସହିତ ଚୀନ ଅରୁଣାଚଳ ପ୍ରଦେଶକୁ ଲାଗି ଥିବା LAC ଉପରେ ନଜର ରଖିବା ପାଇଁ ଡ୍ରୋନ୍ କ୍ୟାମେରା ମଧ୍ୟ ମୁତୟନ କରିଛି । ଆଜି(ଶୁକ୍ରବାର) ସେନା ମୁଖ୍ୟ ମନୋଜ ମୁକୁନ୍ଦ ନରୱାନେ ତେଜପୁରରୁ ଫେରିଛନ୍ତି, ଯାହାଙ୍କ ହାତରେ ସମଗ୍ର ଅରୁଣାଚଳ ପ୍ରଦେଶର ସୁରକ୍ଷା ଦାୟିତ୍ୱ ରହିଛି । ସେଥିପାଇଁ ସେନା ମୁଖ୍ୟଙ୍କ ଏହି ଗସ୍ତ ହୋଇଥିଲା ।

ଉଲ୍ଲେଖନୀୟ କଥା ହେଉଛି, ବିଗତ ଦିନରେ ପୂର୍ବ ଲଦାଖରେ ଗଲୱାନ ଘାଟିରେ ଚୀନ ସୈନିକ ଓ ଭାରତୀୟ ଯବାନଙ୍କ ମଧ୍ୟରେ ହିଂସାତ୍ମକ ସଂଘର୍ଷ ଘଟିଥିଲା । ଏଥିରେ ଭାରତର ୨୦ ସୈନିକ ସହିଦ ହୋଇଥିଲେ । ଏହା ପରେ ଦୁଇ ଦେଶ ମଧ୍ୟରେ ତିକ୍ତତା ପରିସ୍ଥିତି ସୃଷ୍ଟି ହୋଇଥିଲା । ବହୁ ସଂଖ୍ୟାରେ ଚୀନ ସୈନିକଙ୍କ ମଧ୍ୟ ହତାହତ ହୋଇଥିଲେ, କିନ୍ତୁ ଏହି ସଂଖ୍ୟା ପ୍ରକାଶ କରାଯାଇ ନାହିଁ ।

ଏହା ପରେ ଦୁଇ ଦେଶ ମଧ୍ୟରେ ସୀମାରେ ଶାନ୍ତି ଫେରାଇ ଆଣିବା ପାଇଁ କମାଣ୍ଡର ସ୍ତରର ଅନେକ ବୈଠକ ହୋଇସାରିଛି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ କୌଣସି ସୁଫଳ ମିଳିନାହିଁ । ଚୀନ ପ୍ରତିଥର ନିଜ କଥାରୁ ଓହରି ଯାଉଛି । ଆଉ ଭାରତକୁ ଧୋକା ଦେଇ ଚାଲିଛି ।