ଆମେରିକାରେ କୋରୋନାର ତାଣ୍ଡବ, ଗୋଟିଏ ଦିନରେ ରେକର୍ଡ ସଂଖ୍ୟକ ସଂକ୍ରମିତ ଚିହ୍ନଟ

ୱାଶିଂଟନ୍: ସାରା ବିଶ୍ୱରେ କୋରୋନା ସଙ୍କଟ ଜାରି ରହିଛି । ପ୍ରତିଦିନ କୋରୋନା (Coronavirua) ସ୍ଥିତି ସାଙ୍ଘାତିକ ହେବାରେ ଲାଗିଛି । ଏହି ସମୟରେ ଆମେରିକାରେ ମଧ୍ୟ କୋରୋନା ମାମଲାରେ ଲଗାତର ବୃଦ୍ଧି ରେକର୍ଡ କରାଯାଉଛି । ଆମେରିକାର ରାଷ୍ଟ୍ରପତି ନିର୍ବାଚନର ଭୋଟ ଗଣତି ମଧ୍ୟରେ କୋରୋନା ମାମଲାରେ ଆଜି ରେକର୍ଡ ବୃଦ୍ଧି ଘଟିଛି । ଜନ୍ ହପକିନ୍ସ ୟୁନିଭର୍ସିଟି (Johns Hopkins University) ଅନୁଯାୟୀ, ଆମେରିକାରେ ଗତ ୨୪ ଘଣ୍ଟା ମଧ୍ୟରେ କୋରୋନା ମାମଲାରେ ସମସ୍ତ ରେକର୍ଡ ଭାଙ୍ଗିଛି । ଗୋଟିଏ ଦିନରେ ୯୯,୦୦୦ରୁ ଅଧିକ ନୂଆ ମାମଲା ଚିହ୍ନଟ ହୋଇଛି । ଜନ୍ ହପକିନ୍ସ ବିଶ୍ୱବିଦ୍ୟାଳୟ ଆରମ୍ଭରୁ ଦେଶରେ କୋରୋନା ମାମଲା ଉପରେ ନଜର ରଖିଛି ।

ବିଶ୍ୱବିଦ୍ୟାଳୟ ରିପୋର୍ଟ ଅନୁଯାୟୀ, ମଙ୍ଗଳବାର ରାତି ୮.୩୦ରୁ ବୁଧବାର ରାତି ୮.୩୦ ପର୍ଯ୍ୟନ୍ତ କୋରୋନାର ୯୯,୬୬୦ ସଂକ୍ରମିତ ମାମଲା ଚିହ୍ନଟ ହୋଇଛି । ଏହି ସମୟ ମଧ୍ୟରେ ୧,୧୧୨ ଜଣଙ୍କର ମୃତ୍ୟୁ ଘଟିଛି । ମଙ୍ଗଳବାର ଆମେରିକାରେ ରାଷ୍ଟ୍ରପତି ନିର୍ବାଚନ ପାଇଁ ମତଦାନ ହୋଇଥିଲା ।

ସୂଚନାଯୋଗ୍ୟ, ଆମେରିକାରେ କୋରୋନା ମାମଲା ୯୪ ଲକ୍ଷ ଅତିକ୍ରମ କରିଛି । ଏପର୍ଯ୍ୟନ୍ତ ୨,୩୩,୦୦୦ ରୋଗୀଙ୍କର ମୃତ୍ୟୁ ଘଟିଛି । ବର୍ତ୍ତମାନ ସମୟରେ ଭାରତ ମାମଲାରେ ଦ୍ୱିତୀୟ ସ୍ଥାନରେ ରହିଛି । ଭାରତରେ କୋରୋନା ମାମଲା ୮୩ ଲକ୍ଷ ଅତିକ୍ରମ କରିଛି । ଏହା ବ୍ୟତୀତ ୧,୨୩,୬୧୧ ଜଣଙ୍କର ମୃତ୍ୟୁ ହୋଇଛି । ଏହି ତାଲିକାରେ ବ୍ରାଜିଲ ତୃତୀୟ ସ୍ଥାନରେ ଅଛି, ଯେଉଁଠାରେ କୋରୋନା ମାମଲା ୫୫,୬୬,୦୪୯ ରହିଛି । ଏହାସହ ଏପର୍ଯ୍ୟନ୍ତ ୧,୬୦,୪୯୬ ସଂକ୍ରମିତ ଲୋକଙ୍କର ମୃତ୍ୟୁ ଘଟିଛି ।