ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଫିଜିର ସର୍ବୋଚ୍ଚ ନାଗରିକ ପୁରସ୍କାର

ଫିଜି ସଂସଦକୁ ସମ୍ବୋଧିତ କରିବା ସହିତ ଜଳବାୟୁ ନ୍ୟାୟ ପାଇଁ ଭାରତ ଫିଜି ଏବଂ ଅନ୍ୟାନ୍ୟ ସାମୁଦ୍ରିକ ରାଷ୍ଟ୍ର ସହ ଠିଆ ହେବ ବୋଲି କହିଛନ୍ତି ରାଷ୍ଟ୍ରପତି । ଫିଜିରେ ଥିବା ଭାରତୀୟ ସମ୍ପ୍ରଦାୟକୁ ସମ୍ବୋଧିତ କରି କହିଥିଲେ ଯେ, ଆମେ ସାରା ବିଶ୍ୱରେ ଥିବା ପ୍ରବାସୀ ଭାରତୀୟ ସମ୍ପ୍ରଦାୟକୁ ଆମ ସ୍ୱପ୍ନର ଭାରତ ନିର୍ମାଣ ଯାତ୍ରାରେ ଗୁରୁତ୍ୱପୂର୍ଣ୍ଣ ସହଭାଗୀ ଭାବରେ ଦେଖୁଛୁ ।

ନୂଆଦିଲ୍ଲୀ: ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ସକାଳେ ନାଡିରୁ ଫିଜିର ସୁଭାରେ ପହଞ୍ଚିଥିଲେ, ଯେଉଁଠାରେ ସେ ଫିଜି, ନ୍ୟୁଜିଲ୍ୟାଣ୍ଡ ଏବଂ ତିମୋର-ଲେଷ୍ଟେ ଗସ୍ତର ପ୍ରଥମ ପର୍ଯ୍ୟାୟ ଆରମ୍ଭ କରିଛନ୍ତି । ବିମାନବନ୍ଦରରେ ଫିଜିର ପ୍ରଧାନମନ୍ତ୍ରୀ ସିତିବେନି ରାବୁକା ତାଙ୍କୁ ସ୍ୱାଗତ କରିଥିଲେ। କୌଣସି ଭାରତୀୟ ରାଷ୍ଟ୍ରମୁଖ୍ୟଙ୍କ ଏହା ପ୍ରଥମ ଫିଜି ଗସ୍ତ। ଏହି ଗସ୍ତରେ ରାଷ୍ଟ୍ରପତି ମୁର୍ମୁଙ୍କ ସହ ରାଷ୍ଟ୍ରମନ୍ତ୍ରୀ ଜର୍ଜ କୁରିଆନ୍, ଲୋକସଭା ସାଂସଦ ସୌମିତ୍ର ଖାଁ ଓ ଯୁଗଳ କିଶୋର ଉପସ୍ଥିତ ଥିଲେ।

ଫିଜି ପ୍ରଧାନମନ୍ତ୍ରୀଙ୍କ ଉପସ୍ଥିତିରେ ରାଷ୍ଟ୍ରପତି ମୁର୍ମୁଙ୍କ ପାଇଁ ଏକ ପାରମ୍ପରିକ ସ୍ୱାଗତ ସମାରୋହର ଆୟୋଜନ କରାଯାଇଥିଲା । ଏହାପରେ ରାଷ୍ଟ୍ରପତି ଷ୍ଟେଟ୍ ହାଉସ୍ ପରିଦର୍ଶନ କରି ଫିଜିର ରାଷ୍ଟ୍ରପତି ରାତୁ ୱିଲିଆମେ ମାଇଭାଲିଲି କାଟୋନିଭେରେ ତାଙ୍କୁ ସ୍ୱାଗତ କରିଥିଲେ। ଉଭୟ ନେତା ଭାରତ-ଫିଜି ସମ୍ପର୍କକୁ ଆହୁରି ଗଭୀର କରିବା ଉପରେ ଆଲୋଚନା କରିଥିଲେ। ପ୍ରଶାନ୍ତ ମହାସାଗରୀୟ ଦ୍ୱୀପ ଦେଶଗୁଡ଼ିକ (ପିଆଇସି) ସହିତ ଆମର ସମ୍ପର୍କ ଏବଂ ବିକାଶ ଭାଗିଦାରୀକୁ ସୁଦୃଢ଼ କରିବା ପାଇଁ ଭାରତ ପ୍ରତିଶ୍ରୁତିବଦ୍ଧ ବୋଲି ରାଷ୍ଟ୍ରପତି କହିଥିଲେ, ଯେଉଁଥିରେ ଫିଜି ଏକ ଗୁରୁତ୍ୱପୂର୍ଣ୍ଣ ଅଂଶୀଦାର । ଷ୍ଟେଟ୍ ହାଉସରେ ଫିଜି ରାଷ୍ଟ୍ରପତି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଫିଜିର ସର୍ବୋଚ୍ଚ ବେସାମରିକ ସମ୍ମାନ - କମ୍ପାନିଅନ୍ ଅଫ୍ ଦି ଅର୍ଡର ଅଫ୍ ଫିଜି ପ୍ରଦାନ କରିଥିଲେ। ରାଷ୍ଟ୍ରପତି ମୁର୍ମୁ ଗତ ବର୍ଷ ଫେବ୍ରୁଆରିରେ ଉଦଘାଟିତ ହୋଇଥିବା ଭାରତୀୟ ପଦକ୍ଷେପ 'ରାଷ୍ଟ୍ରମୁଖ୍ୟଙ୍କ ସୌରୀକରଣ' ପ୍ରକଳ୍ପର ଅଗ୍ରଗତି ଦେଖିଥିଲେ।

ପରବର୍ତ୍ତୀ କାର୍ଯ୍ୟକ୍ରମରେ ରାଷ୍ଟ୍ରପତି ଫିଜି ସଂସଦକୁ ସମ୍ବୋଧିତ କରିଥିଲେ। ରାଷ୍ଟ୍ରପତି କହିଥିଲେ ଯେ ଆମ ଆକାରରେ ବ୍ୟାପକ ପାର୍ଥକ୍ୟ ଥିଲେ ମଧ୍ୟ ଉଭୟ ଭାରତ ଏବଂ ଫିଜିରେ ଆମର ଜୀବନ୍ତ ଗଣତନ୍ତ୍ର ସମେତ ଅନେକ ସାମଞ୍ଜସ୍ୟ ରହିଛି । ତୃଣମୂଳ ସ୍ତରରେ ଗଣତନ୍ତ୍ରକୁ ପ୍ରୋତ୍ସାହିତ କରିବାର ସମୃଦ୍ଧ ଅଭିଜ୍ଞତା ଥିବା ଜଣେ ଘନିଷ୍ଠ ବନ୍ଧୁ ଏବଂ ସହଯୋଗୀ ଭାବରେ ଭାରତ ଫିଜିକୁ ସର୍ବଦା ସହଯୋଗ କରିବାକୁ ପ୍ରସ୍ତୁତ ଅଛି ବୋଲି ସେ ଫିଜି ସାଂସଦମାନଙ୍କୁ ଆଶ୍ୱାସନା ଦେଇଥିଲେ। ରାଷ୍ଟ୍ରପତି ମୁର୍ମୁ ଆହୁରି ମଧ୍ୟ କହିଛନ୍ତି ଯେ ଆଜି ଫିଜି ଆମର ମିଳିତ ପ୍ରୟାସରେ ଏହାର ଅବଦାନ ପାଇଁ ସମଗ୍ର ବିଶ୍ୱରେ ପରିଚିତ ଏବଂ ଏହା ଦୁଇଟି ପ୍ରମୁଖ ବିଶ୍ୱ ଆହ୍ୱାନ - ଜଳବାୟୁ ପରିବର୍ତ୍ତନ ଏବଂ ମାନବ ସଂଘର୍ଷର ମୁକାବିଲା ଉପରେ ଧ୍ୟାନ କେନ୍ଦ୍ରିତ କରିଛି । ଜଳବାୟୁ ପରିବର୍ତ୍ତନ ପ୍ରସଙ୍ଗରେ ବିଶ୍ୱସ୍ତରୀୟ ଆଲୋଚନାକୁ ଆକାର ଦେବା ହେଉ କିମ୍ବା ସାମୁଦ୍ରିକ-ରାଷ୍ଟ୍ରଗୁଡ଼ିକର ଉଦବେଗ ଉତ୍‌ଥାପନ କରିବା ହେଉ, ଫିଜି ବିଶ୍ୱର ମଙ୍ଗଳରେ ବିପୁଳ ଅବଦାନ ଦେଉଛି । ସମଗ୍ର ବିଶ୍ୱରେ ଫିଜିର ଗୁରୁତ୍ୱପୂର୍ଣ୍ଣ ଭୂମିକାକୁ ଭାରତ ବହୁତ ଗୁରୁତ୍ୱ ଦେଇଥାଏ ଏବଂ ପ୍ରଶଂସା କରେ । ରାଷ୍ଟ୍ରପତି କହିଥିଲେ ଯେ ଫିଜିଠାରୁ ବାକି ବିଶ୍ୱ ବହୁତ କିଛି ଶିଖିବାର ଅଛି, ଯେଉଁଥିରେ ସରଳ ଫିଜିଆନ୍ ଜୀବନଶୈଳୀ, ପରମ୍ପରା ଏବଂ ରୀତିନୀତି ପ୍ରତି ଗଭୀର ସମ୍ମାନ ଏବଂ ଏକ ଖୋଲା ତଥା ବହୁ ସାଂସ୍କୃତିକ ପରିବେଶ ଅନ୍ତର୍ଭୁକ୍ତ । ବିଭିନ୍ନ କ୍ଷେତ୍ରରେ ଭାରତ-ଫିଜି ସହଯୋଗ ସୁଦୃଢ଼ ହେବାରେ ଲାଗିଛି ବୋଲି ସେ ଖୁସି ବ୍ୟକ୍ତ କରିଥିଲେ। ରାଷ୍ଟ୍ରପତି କହିଛନ୍ତି ଯେ ଗ୍ଲୋବାଲ ସାଉଥର ଏକ ଶକ୍ତିଶାଳୀ ସ୍ୱର ଭାବରେ ଭାରତ ଜଳବାୟୁ ନ୍ୟାୟ ପାଇଁ ଫିଜି ଏବଂ ଅନ୍ୟାନ୍ୟ ମହାସାଗରୀୟ ରାଷ୍ଟ୍ରମାନଙ୍କ ସହିତ କାନ୍ଧରେ କାନ୍ଧ ମିଳାଇ ଛିଡା ହେବ ।

ପରବର୍ତ୍ତୀ କାର୍ଯ୍ୟକ୍ରମରେ ଫିଜିର ପ୍ରଧାନମନ୍ତ୍ରୀ ସିତିକେନି ରାବୁକା ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଥିଲେ। ଦୁଇ ନେତା ବ୍ୟାପକ ଆଲୋଚନା କରିବା ସହ ଐତିହାସିକ ସମ୍ପର୍କକୁ ସୁଦୃଢ଼ କରିବା ଏବଂ ଦୁଇ ଦେଶ ମଧ୍ୟରେ ଭାଗିଦାରୀକୁ ସୁଦୃଢ଼ କରିବା ପାଇଁ ସହମତି ପ୍ରକାଶ କରିଥିଲେ । ରାଷ୍ଟ୍ରପତି କହିଥିଲେ ଯେ ଜଳବାୟୁ ସ୍ଥିରତା ଏବଂ ସ୍ୱଚ୍ଛ ତଥା ଅକ୍ଷୟ ଶକ୍ତିର ବିକାଶ ଉପରେ ଗୁରୁତ୍ୱ ଦେବା ସହିତ ଫିଜି ସହିତ ଏହାର ବିକାଶ ଭାଗିଦାରୀକୁ ସୁଦୃଢ଼ କରିବାକୁ ଭାରତ ପ୍ରତିଶ୍ରୁତିବଦ୍ଧ । ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ସିତିବେନୀ ରବୁକାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମାରୋହରେ (୧) ଭାରତୀୟ ହାଇ କମିଶନ ଚାନ୍ସେରୀ ଏବଂ ଭାରତୀୟ ସାଂସ୍କୃତିକ କେନ୍ଦ୍ର କମ୍ପ୍ଲେକ୍ସ, ସୁଭା ଏବଂ (୨) ୧୦୦ ଶଯ୍ୟା ବିଶିଷ୍ଟ ସୁପର ସ୍ପେଶାଲିଟି ହସ୍ପିଟାଲ, ସୁଭା ପାଇଁ ପ୍ରକଳ୍ପ ସ୍ଥଳ ଆବଣ୍ଟନ ପାଇଁ ଦସ୍ତାବିଜ ପ୍ରଦାନ କରାଯାଇଥିଲା। ଭାରତୀୟ ପ୍ରବାସୀ ସମ୍ପ୍ରଦାୟର ଏକ ଉତ୍ସାହଜନକ ସମାବେଶକୁ ମଧ୍ୟ ରାଷ୍ଟ୍ରପତି ସମ୍ବୋଧିତ କରିଥିଲେ। ସେ କହିଛନ୍ତି ଯେ ୧୪୫ ବର୍ଷ ପୂର୍ବେ ଫିଜି ଆସିଥିବା ଏବଂ ସମସ୍ତ ପ୍ରତିକୂଳ ପରିସ୍ଥିତି ସହ ନିଜ ନୂଆ ମାତୃଭୂମିରେ ବିକଶିତ ହୋଇଥିବା 'ଗିର୍ମିଟିଆ' ଶ୍ରମିକଙ୍କ ସଂକଳ୍ପ ଓ ଦୃଢ଼ତା ବିଶ୍ୱ ପାଇଁ ଏକ ବଡ଼ ପ୍ରେରଣାର ଉତ୍ସ। ରାଷ୍ଟ୍ରପତି କହିଲେ ଯେ ଆମେ ଆମ ସ୍ୱପ୍ନର ଭାରତ ନିର୍ମାଣ ଯାତ୍ରାରେ ସମଗ୍ର ବିଶ୍ୱରେ ଆମର ପ୍ରବାସୀ ଭାରତୀୟ ସମ୍ପ୍ରଦାୟକୁ ଗୁରୁତ୍ୱପୂର୍ଣ୍ଣ ଅଂଶୀଦାର ଭାବରେ ଦେଖୁଛୁ ।

ସହିଦ ଯବାନଙ୍କ ସ୍ମୃତିକୁ ସମ୍ମାନ ଜଣାଇ ରାଷ୍ଟ୍ରପତି ସୁଭାସ୍ଥିତ ଜାତୀୟ ଯୁଦ୍ଧ ସ୍ମାରକୀ ପରିଦର୍ଶନ କରିଥିଲେ। ସେ ମହାତ୍ମା ଗାନ୍ଧୀ ମେମୋରିଆଲ ହାଇସ୍କୁଲ ପରିଦର୍ଶନ କରି ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ଏହି ଦିନର ଶେଷ ସରକାରୀ କାର୍ଯ୍ୟକ୍ରମରେ ଫିଜିର ରାଷ୍ଟ୍ରପତି ରାତୁ ୱିଲିଆମେ ମାଇଭାଲିଲି କାଟୋନିଭେରେ ଷ୍ଟେଟ୍ ହାଉସରେ ରାଷ୍ଟ୍ରପତି ମୁର୍ମୁଙ୍କ ସମ୍ମାନରେ ଏକ ସମ୍ବର୍ଦ୍ଧନା ସଭାର ଆୟୋଜନ କରିଥିଲେ, ଯେଉଁଥିରେ ବିଭିନ୍ନ ବର୍ଗର ବିଶିଷ୍ଟ ଫିଜିଆନ୍ ମାନେ ଏକାଠି ହୋଇଥିଲେ। ଏହି ଅବସରରେ ରାଷ୍ଟ୍ରପତି ତାଙ୍କ ବକ୍ତବ୍ୟରେ ରାଷ୍ଟ୍ରପତି କାଟୋନିଭେରେ, ପ୍ରଧାନମନ୍ତ୍ରୀ ରବୁକା ଏବଂ ଫିଜି ସରକାର ଏବଂ ଜନସାଧାରଣଙ୍କୁ ଧନ୍ୟବାଦ ଜଣାଇଥିଲେ । ସୁଭାରେ ସରକାରୀ କାର୍ଯ୍ୟକ୍ରମ ସଫଳ ହେବା ପରେ ରାଷ୍ଟ୍ରପତି ନାଦି ଅଭିମୁଖେ ଯାତ୍ରା କରିଛନ୍ତି ଯେଉଁଠାରୁ ସେ ଆସନ୍ତାକାଲି ନ୍ୟୁଜିଲାଣ୍ଡର ଅକଲାଣ୍ଡ ଅଭିମୁଖେ ଯାତ୍ରା କରିବେ।