କୋରୋନା ସଙ୍କଟ ମଧ୍ୟରେ ଆତଙ୍କ ଖେଳାଇଲା ଆଉ ଏକ ଭାଇରସ୍, ୩ ସଂକ୍ରମିତଙ୍କ ଭିତରୁ ଗଲା ଜଣକର ଜୀବନ

ଲାସା ଜ୍ୱରରେ ସଂକ୍ରମିତ ତିନି ଜଣଙ୍କ ମଧ୍ୟରୁ ଜଣେ ରୋଗୀଙ୍କର ମୃତ୍ୟୁ ହୋଇଛି। ଯଦିଓ ବିଶେଷଜ୍ଞମାନେ କୁହନ୍ତି ଯେ, ଲାସା ଜ୍ୱରର ମୃତ୍ୟୁ ହାର ଏକ ପ୍ରତିଶତ, କିନ୍ତୁ ଏହା କୋରୋନା ସଂକ୍ରମଣ ମଧ୍ୟରେ ଚିନ୍ତାର କାରଣ ପାଲଟିଛି। କିଛି ଲୋକ ଏବଂ ଗର୍ଭବତୀ ମହିଳାମାନେ ସେମାନଙ୍କର ତୃତୀୟ ତ୍ରୈମାସିକରେ ଅଧିକ ବିପଦରେ ଥାଆନ୍ତି।

ବ୍ରିଟିଶ ସ୍ୱାସ୍ଥ୍ୟ ଅଧିକାରୀଙ୍କ କହିବାନୁସାରେ, ଲାସା ଜ୍ୱର (Lassa Fever) ର ତିନିଟି ମାମଲା ରିପୋର୍ଟ ହୋଇଛି। ଫେବୃଆରୀ ୧୧ରେ ଉତ୍ତର ଲଣ୍ଡନର ଏକ ହସ୍ପିଟାଲରେ ଜଣେ ରୋଗୀଙ୍କର ମୃତ୍ୟୁ ହୋଇଥିଲା। କୁହାଯାଉଛି ଯେ, ସମସ୍ତ ସଂକ୍ରମିତ ବ୍ୟକ୍ତି ଇଂଲଣ୍ଡର ସମାନ ପରିବାରର ଅଟନ୍ତି ଏବଂ ପଶ୍ଚିମ ଆଫ୍ରିକା ଯାତ୍ରା କରିବା ପରେ ସେମାନେ ଫେରି ଆସିଥିଲେ।

ଲାସା ଜ୍ୱର ବିଷୟରେ ସବୁଠାରୁ ବଡ ଚିନ୍ତା ହେଉଛି ଏହାର ୮୦ ପ୍ରତିଶତ ମାମଲା ଲକ୍ଷଣବିହୀନ (asymptomatic), ଯେଉଁଥିପାଇଁ ଏହା ଚିହ୍ନିବା ବହୁତ କଷ୍ଟସାଧ୍ୟ। ୟୁରୋପୀୟ ରୋଗ ନିରାକରଣ ଏବଂ ନିୟନ୍ତ୍ରଣ କେନ୍ଦ୍ର ଅନୁଯାୟୀ, ଅନେକ ରୋଗୀଙ୍କୁ ଡାକ୍ତରଖାନାରେ ଭର୍ତ୍ତି କରିବାକୁ ପଡିବ ଏବଂ ସେମାନଙ୍କର ରୋଗ ଅତ୍ୟନ୍ତ ଗୁରୁତର ହୋଇପାରେ। ଲାସା ଭାଇରସରେ ପୀଡିତ ଡାକ୍ତରଖାନାରେ ଭର୍ତ୍ତି ହୋଇଥିବା ୧୫ ପ୍ରତିଶତ ରୋଗୀଙ୍କର ମୃତ୍ୟୁ ହୋଇପାରେ।

ବିଶେଷଜ୍ଞଙ୍କ ଅନୁଯାୟୀ, ଲାସା ଜ୍ୱର ସଂକ୍ରମିତ ମୂଷାଙ୍କ ମଳ ଏବଂ ପରିସ୍ରା ମାଧ୍ୟମରେ ବ୍ୟାପିଥାଏ। ଯଦି କୌଣସି ବ୍ୟକ୍ତି, ମୂଷା ଏବଂ ପରିସ୍ରା ସଂସ୍ପର୍ଶରେ ଆସନ୍ତି, ତେବେ ସେ ଲାସା ଜ୍ୱରରେ ସଂକ୍ରମିତ ହୋଇପାରନ୍ତି। ଏହା ପରେ ସଂକ୍ରମିତ ସଂକ୍ରମିତ ବ୍ୟକ୍ତି ଅନ୍ୟ ଲୋକଙ୍କୁ ମଧ୍ୟ ସଂକ୍ରମିତ କରିପାରନ୍ତି। କେତେକ କ୍ଷେତ୍ରରେ ସଂକ୍ରମିତ ବ୍ୟକ୍ତିଙ୍କ ଆଖି, ପାଟି, ନାକ ଭଳି ଅଙ୍ଗରୁ ପ୍ରବାହିତ ତରଳ ପଦାର୍ଥ ଦ୍ୱାରା ସଂକ୍ରମଣ ମଧ୍ୟ ବିସ୍ତାର ହୋଇପାରେ।

ଲାସା ଭାଇରସ୍ ବା ଲାସା ଜ୍ୱର, ଇବୋଲା ଏବଂ ମାର୍ଗବର୍ଗ ଭୂତାଣୁ ପରିବାରର ଅଟେ। ୧୯୬୯ ମସିହାରେ ନାଇଜେରିଆର ଲାସା ସହରରେ ଲାସା ଜ୍ୱର ପ୍ରଥମେ ଆବିଷ୍କୃତ ହୋଇଥିଲା। ତେଣୁ ଏହି ରୋଗର ନାମକରଣ ସହରର ନାମ ଅନୁସାରେ କରାଯାଇଥିଲା। ନାଇଜେରିଆରେ ଦୁଇ ନର୍ସଙ୍କ ମୃତ୍ୟୁପରେ ଏହି ରୋଗ ସାମ୍ନାକୁ ଆସିଥିଲା।

ବିଶେଷଜ୍ଞଙ୍କ ଅନୁଯାୟୀ, ଲକ୍ଷଣ ଗମ୍ଭୀର ନହେବା ପର୍ଯ୍ୟନ୍ତ ଏବଂ ଏହାର ଲକ୍ଷଣ ଏକରୁ ତିନି ସପ୍ତାହ ପରେ ବିକଶିତ ନହେବା ପର୍ଯ୍ୟନ୍ତ ଲାସା ଜ୍ୱର ଜଣେ ବ୍ୟକ୍ତିଙ୍କଠାରୁ ଅନ୍ୟ ଜଣକୁ ବ୍ୟାପି ନଥାଏ। ଲାସା ଜ୍ୱରର ଲକ୍ଷଣ ମଧ୍ୟରେ ଥକାପଣ, ମୁଣ୍ଡବିନ୍ଧା, ଦୁର୍ବଳତା, ଜ୍ୱର ଇତ୍ୟାଦି ଅନ୍ତର୍ଭୁକ୍ତ। ଏହା ବ୍ୟତୀତ, କେତେକ କ୍ଷେତ୍ରରେ, ନିଶ୍ୱାସ ନେବାରେ ଅସୁବିଧା, ମୁହଁ ଫୁଲିବା, ରକ୍ତସ୍ରାବ, ଛାତି ଯନ୍ତ୍ରଣା, ପେଟ ଦରଜ କିମ୍ବା ବାନ୍ତି ଅନୁଭବ କରାଯାଇପାରେ।

ୟୁରୋପୀୟ ରୋଗ ନିରାକରଣ ଏବଂ ନିୟନ୍ତ୍ରଣ କେନ୍ଦ୍ର ବିଶ୍ୱାସ କରେ ଯେ, ଲାସା ଜ୍ୱରର ଲକ୍ଷଣ ଆରମ୍ଭ ହେବାର ଦୁଇ ସପ୍ତାହ ପରେ, କେତେକ କ୍ଷେତ୍ରରେ ମଲ୍ଟି ଅର୍ଗାନ ଫେଲ୍ୟୁର ହେତୁ ରୋଗୀ ମୃତ୍ୟୁ ବରଣ କରିପାରନ୍ତି।

କୋରୋନା ସଂକ୍ରମଣ ମଧ୍ୟରେ ଲାସା ଜ୍ୱରର ସଙ୍କଟ ଅତ୍ୟନ୍ତ ଗମ୍ଭୀର ହୋଇପାରେ। ତେଣୁ ଏହି ରୋଗରୁ ରକ୍ଷା ପାଇବା ପାଇଁ ମୂଷାଙ୍କ ଠାରୁ ଦୂରେଇ ରହିବା ପାଇଁ ପରାମର୍ଶ ଦିଆଯାଉଛି। ଏହା ବ୍ୟତୀତ, ଘରେ ପରିଷ୍କାର ପରିଚ୍ଛନ୍ନତା ଏବଂ ଭେଣ୍ଟିଲେସନର ବିଶେଷ ଯତ୍ନ ନିଅନ୍ତୁ।