ଅଟକିଛି ପାଞ୍ଚ ଟ୍ରିଲିୟନ ଡଲାର ଅର୍ଥନୀତି, ୩୦ ଟ୍ରିଲିୟନର ସ୍ୱପ୍ନ ଦେଖୁଛନ୍ତି ମୋଦିଙ୍କ ମନ୍ତ୍ରୀ

ନୂଆଦିଲ୍ଲୀ: କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ପୀୟୁଷ ଗୋୟାଲ ରବିବାର ଏକ ବଡ ଦାବି କରିଛନ୍ତି। ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ମଧ୍ୟରୁ ଅନ୍ୟତମ ଏବଂ ଆସନ୍ତା ୩୦ ବର୍ଷ ମଧ୍ୟରେ ଏହା ୩୦ ଟ୍ରିଲିୟନ ଡଲାରରେ ପହଞ୍ଚିବ ବୋଲି ଆଶା କରାଯାଉଥିବା ସେ କହିଛନ୍ତି। ଯଦି ମିଶ୍ରିତ ବାର୍ଷିକ ଅଭିବୃଦ୍ଧି ଭିତ୍ତିରେ ଭାରତ ପ୍ରତିବର୍ଷ ୮ ପ୍ରତିଶତରେ ବୃଦ୍ଧି ହୁଏ, ତେବେ ପ୍ରାୟ ନଅ ବର୍ଷ ମଧ୍ୟରେ ଅର୍ଥନୀତି ଦ୍ୱିଗୁଣିତ ହେବ ବୋଲି ଗୁଜୁରାଟ ଗସ୍ତରେ ଥିବା ମନ୍ତ୍ରୀ ଦାବି କରିଛନ୍ତି।

କେନ୍ଦ୍ରମନ୍ତ୍ରୀ ପୀୟୁଶ ଗୋୟାଲ (Piyush Goyal) କହିଛନ୍ତି, 'ଦେଶର ଅର୍ଥନୀତି ବର୍ତ୍ତମାନ ପ୍ରାୟ ୩.୨ ଟ୍ରିଲିୟନ ଡ଼ଲାରରେ ପହଞ୍ଚିଛି ଏବଂ ଆଜିଠାରୁ ନଅ ବର୍ଷ ମଧ୍ୟରେ ଏହା ପ୍ରାୟ ୬.୫ ଟ୍ରିଲିୟନ ଡଲାର ହେବ। ବର୍ତ୍ତମାନଠାରୁ ୧୮ ବର୍ଷ ପରେ ଆମ ଦେଶ ପ୍ରାୟ ୧୩ ଟ୍ରିଲିୟନ୍ ଡଲାର ଅର୍ଥନୀତି ହେବ ଏବଂ ତା’ପରେ ଆଉ ନଅ ବର୍ଷ, ଅର୍ଥାତ୍ ବର୍ତ୍ତମାନ ଠାରୁ ୨୭ ବର୍ଷରେ ଆମେ ୨୬ ଟ୍ରିଲିୟନ ଡଲାର ଅର୍ଥନୀତି ହେବୁ। ତେବେ ଆଜିଠାରୁ ୩୦ ବର୍ଷରେ ଆମେ ସମସ୍ତେ ଆଶା କରିପାରିବା ଯେ ଭାରତୀୟ ଅର୍ଥନୀତି ୩୦ ଟ୍ରିଲିୟନ ଡଲାରର ଅର୍ଥନୀତି (USD 30 trillion economy) ରେ ପହଞ୍ଚିବ।'

ସେ ଆହୁରି ମଧ୍ୟ କହିଛନ୍ତି ଯେ, କିଛି ଲୋକ ଏହି ସଂଖ୍ୟା ଉପରେ ପ୍ରଶ୍ନ ଉଠାଇଛନ୍ତି କିନ୍ତୁ ସେମାନେ ତିରୁପୁର ପରି ସ୍ଥାନକୁ ଆସିବା ଉଚିତ। ଏଠାରେ ଟେକ୍ସଟାଇଲ୍ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରର ଅଭିବୃଦ୍ଧି ଦେଖିଲେ ତାହା ଜାଣିପାରିବେ। ୟୁକ୍ରେନ-ଋଷ ଏବଂ କୋଭିଡ ମହାମାରୀ ମଧ୍ୟରେ ଚାଲିଥିବା ଯୁଦ୍ଧ ହେତୁ ବର୍ତ୍ତମାନର ଆହ୍ୱାନପୂର୍ଣ୍ଣ ସମୟରେ ମଧ୍ୟ ଦେଶର ଅର୍ଥନୀତି ସୁସ୍ଥ ଗତିରେ ବଢୁଛି। ଏହି ଯୁଦ୍ଧ ବିଶ୍ୱବଜାରରେ କିଛି ଦ୍ରବ୍ୟର ଅଭାବ ସୃଷ୍ଟି କରିଛି ଏବଂ ଏହା ବିଶ୍ୱକୁ ମହଙ୍ଗା ଭିତରେ ଠେଲି ଦେଇଛି, କିନ୍ତୁ ଭାରତ ଏହାର ମୁଦ୍ରାସ୍ଫୀତିକୁ ବିକଶିତ ଦେଶ ତୁଳନାରେ ଯୁକ୍ତିଯୁକ୍ତ ସ୍ତରରେ ବଜାୟ ରଖିବାରେ ସଫଳ ହୋଇଛି ବୋଲି ମନ୍ତ୍ରୀ (Union Commerce and Industry Minister) ଦର୍ଶାଇଛନ୍ତି।

ଟେକ୍ସଟାଇଲ୍ ଇଣ୍ଡଷ୍ଟ୍ରି ବିଷୟରେ ସେ କହିଛନ୍ତି ଯେ, ବର୍ତ୍ତମାନ ଶିଳ୍ପ ଆକାର ପ୍ରାୟ ୧୦ ଲକ୍ଷ କୋଟି ଏବଂ ରପ୍ତାନି ପ୍ରାୟ ୩.୫ ଲକ୍ଷ କୋଟି ଟଙ୍କା। ସମ୍ଭାବ୍ୟତାକୁ ଦୃଷ୍ଟିରେ ରଖି ଶିଳ୍ପ ଆକାର ୨୦ ଲକ୍ଷ କୋଟି ଟଙ୍କା ଏବଂ ଆସନ୍ତା ପାଞ୍ଚ ବର୍ଷ ମଧ୍ୟରେ ୧୦ ଲକ୍ଷ କୋଟି ରପ୍ତାନିରେ ପହଞ୍ଚିବାକୁ ଭାରତ ଲକ୍ଷ୍ୟ ରଖିଛି। ମନ୍ତ୍ରୀ ପୀୟୁଷ ଗୋୟାଲ ଆହୁରି ମଧ୍ୟ ସୂଚନା ଦେଇଛନ୍ତି ଯେ, ତିରୁପୁର ଏକ ବିଶ୍ୱ ପୋଷାକ ହବରେ ପରିଣତ ହୋଇଛି ଏବଂ ୩୭ ବର୍ଷ ମଧ୍ୟରେ ୧୫ କୋଟିରୁ ୩୦ ହଜାର କୋଟିରୁ ଅଧିକ ମୂଲ୍ୟର ସାମଗ୍ରୀ ରପ୍ତାନି କରୁଛି। ଦେଶରେ ଏହିପରି ୭୫ଟି ଟେକ୍ସଟାଇଲ୍ ସହର ସୃଷ୍ଟି କରିବାର ଆବଶ୍ୟକତା ରହିଛି ବୋଲି ଗୋୟଲ କହିଛନ୍ତି।

ଟେକ୍ସଟାଇଲ୍ ସହର ସୃଷ୍ଟି ହେଲେ ବୟନଶିଳ୍ପ କ୍ଷେତ୍ରରେ ବିପୁଳ ଚାକିରି ଏବଂ ବିନିଯୋଗ ସୁଯୋଗ ସୃଷ୍ଟି ହୋଇପାରିବ। ଏହି କ୍ଷେତ୍ରରେ ଅପାର ସମ୍ଭାବନା ରହିଛି। ଏହି ସେକ୍ଟର, ୬ ଲକ୍ଷ ଲୋକଙ୍କୁ ସିଧାସଳଖ ରୋଜଗାର ଏବଂ ୪ ଲକ୍ଷ ଲୋକଙ୍କୁ ପରୋକ୍ଷ ରୋଜଗାର ଯୋଗାଇଥାଏ, ତେଣୁ ସାମୂହିକ ଭାବେ ୧୦ ଲକ୍ଷ ଲୋକଙ୍କୁ ରୋଜଗାର ଯୋଗାଇଥାଏ ବୋଲି ସେ କହିଛନ୍ତି। ସମଗ୍ର ଭାରତରେ ପ୍ରାୟ ସାଢେ ତିନିରୁ ଚାରି କୋଟି ଲୋକ କେବଳ ଟେକ୍ସଟାଇଲ ସେକ୍ଟରର ନିୟୋଜିତ ଅଛନ୍ତି। କୃଷି ପରେ ଟେକ୍ସଟାଇଲ୍ ହେଉଛି ଦ୍ୱିତୀୟ ବୃହତ୍ତମ ନିଯୁକ୍ତି ଯୋଗାଣକାରୀ କ୍ଷେତ୍ର।

ସୂଚନାଯୋଗ୍ୟ, ୨୦୨୨ ସୁଦ୍ଧା ଭାରତରୁ ୫ ଟ୍ରିଲିୟନ ଡଲାର ଅର୍ଥନୀତି କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ୱପ୍ନ ଦେଖିଥିଲେ। କିନ୍ତୁ ମହାମାରୀ କୋରୋନା ଓ ଅସ୍ଥିର ବିଶ୍ୱର ବଜାର ପାଇଁ ତାହା ନହୋଇଲା। ତେବେ ୨୦୨୫ ସୁଦ୍ଧା ଏହି ଟାର୍ଗେଟ ପୁରଣ ହେବ ବୋଲି ଅର୍ଥମନ୍ତ୍ରାଳୟ ଆକଳନ କରିଛି। କିନ୍ତୁ ଆଇଏମଏଫ ଏହି ଅବଧିକୁ ଆହୁରି ୪ ବର୍ଷ ବୃଦ୍ଧି କରିଛି। ଯଦି ୮ ପ୍ରତିଶତ ହାରରେ ଜିଡିପି ବୃଦ୍ଧି ପାଇବ ତେବେ ୨୦୨୬-୨୭ ଆର୍ଥିକ ବର୍ଷରେ ଭାରତ ୫ ଟ୍ରିଲିୟନ ଡଲାର ଅର୍ଥନୀତିକାରୀ ଦେଶ ହେବ ବୋଲି ଅନ୍ତର୍ଜାତୀୟ ସଂସ୍ଥା ପୂର୍ବାନୁମାନ କରିଛି।