ଆଜିଠୁ ୬ ଦିନ ପର୍ଯ୍ୟନ୍ତ ସମ୍ବଲପୁରରେ ଦ୍ଵିତୀୟ ପର୍ଯାୟ ସଟଡାଉନ୍

ଅଜୟ କୁମାର, ସମ୍ୱଲପୁର: ଆଜିଠାରୁ ସମ୍ବଲପୁରରେ ଦ୍ଵିତୀୟ ପର୍ଯ୍ୟାୟର ୬ ଦିନିଆ ସଟଡାଉନ୍ ଆରମ୍ଭ ହୋଇଛି । ଜୁଲାଇ ୨୨ ତାରିଖରୁ ଆରମ୍ଭ ହୋଇଥିବା ଏହି ୧୦ ଦିନିଆ ସଟଡାଉନ୍ ଦୁଇଟି ପର୍ଯ୍ୟାୟରେ ଲାଗୁ ହୋଇଛି । ପ୍ରଥମ ପର୍ଯ୍ୟାୟ ଜୁଲାଇ ୨୨ରୁ ୨୫ ତାରିଖ ପର୍ଯ୍ୟନ୍ତ ଜାରି ଥିଲା । ଅନ୍ୟପକ୍ଷେ ଦ୍ଵିତୀୟ ପର୍ଯ୍ୟାୟ କୋହଳ ସଟଡାଉନ ଆଜି ଠାରୁ ଆରମ୍ଭ ହୋଇଛି । ଆଜି ଠାରୁ ଏହି ସଟ ଡାଉନ ଆରମ୍ଭ ହୋଇ ଆସନ୍ତା ୩୧ ତାରିଖ ଯାଏ ଜିଲ୍ଲାରେ ବଳବତ୍ତର ରହିବ ।

ସକାଳ ୬ଟାରୁ ଦିନ ଗୋଟାଏ ପର୍ଯ୍ୟନ୍ତ କୋହଳ କରାଯାଇଥିବା ବେଳେ ବାକି ୧୮ ଘଣ୍ଟା ପୂର୍ବ ଭଳି ସଟଡାଉନ ଜାରି ରହିବ । ଏହି ସମୟରେ ସାଧାରଣ ଯାତାୟାତ ବନ୍ଦ ରହିବ । ଜରୁରୀକାଳୀନ ସ୍ଥିତିକୁ ଏହି ସମସ୍ତ କଟକଣାକୁ ବାଦ ଦିଆଯାଇଛି । ଉପଜିଲ୍ଲାପାଳଙ୍କ ତତ୍ତ୍ୱାବଧାନରେ ଆଜି ସମ୍ବଲପୁର ଲକ୍ଷ୍ମୀ ଟକିଜ ଛକ ଠାରେ ଅଗ୍ନିଶମ ବିଭାଗ ତରଫରୁ ସେନିଟାଇଜେସନ କରାଯାଉଥିବା ବେଳେ ସାଧାରଣ ଜନତାଙ୍କୁ ସଚେତନ କରାଯାଇଥିଲା । 

ଆଜି ସମ୍ବଲପୁର ଜିଲ୍ଲାରେ ଆଉ ୧୭ କୋରୋନା ସଂକ୍ରମିତ ମାମଲା ସାମ୍ନାକୁ ଆସିଛି । ଫଳରେ ଜିଲ୍ଲାରେ ବର୍ତ୍ତମାନ ପର୍ଯ୍ୟନ୍ତ ମୋଟ ୨୪୭ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେପଟେ ସାଧାରଣ ଜନତା ମାସ୍କ ପିନ୍ଧିବା ଏବଂ ସାମାଜିକ ଦୂରତା ଅବଲମ୍ବନ କରିବା ବାବଦରେ ସମ୍ବଲପୁର ଏସ ପି କୁଅଁର ବିଶାଳ ସିଂ କହିଛନ୍ତି ଯେ, ଚାରି ଆଡ଼େ କୋରୋନା ସଂକ୍ରମଣ ବ୍ୟାପିବାରେ ଲାଗିଛି । ଏଥିରୁ ବଞ୍ଚିବାର ଏକ ମାତ୍ର ଉପାୟ ହେଉଛି ମାସ୍କ ଓ ସାମାଜିକ ଦୂରତା ବଜାୟ ରଖିବା । ଏହି ସଟଡାଉନ ସମୟରେ ଜନସାଧାରଣଙ୍କୁ ସହଯୋଗ ଏକାନ୍ତ ଆବଶ୍ୟକ ବୋଲି ମଧ୍ୟ କହିଛନ୍ତି ।