Padmapur Bypoll: ରହିଲାନି ଚାଷୀଙ୍କ ମାନ, ମାଣବସା ଗୁରୁବାରରେ ଚାରି ପ୍ରାର୍ଥୀ କଲେ ନାମାଙ୍କନ

Padmapur Bypoll: ବିରାଟ ଶୋଭାଯାତ୍ରାରେ ଆସି କଂଗ୍ରେସ ପ୍ରାର୍ଥୀ ସତ୍ୟଭୁଷଣ ସାହୁ ନାମାଙ୍କନ ଭରିଥିଲେ । ବିଜେପି ପ୍ରାର୍ଥୀ ପ୍ରଦୀପ ପୁରୋହିତ ମଧ୍ୟ ପ୍ରାର୍ଥିପତ୍ର ଦାଖଲ କରିଛନ୍ତି । ପଦ୍ମପୁର ଉପନିର୍ବାଚନ ପାଇଁ ୧୩ଟି ପ୍ରାର୍ଥୀ ପତ୍ର କିଣାଯାଇଥିଲା । କିନ୍ତୁ ତଥ୍ୟ ଅନୁଯାୟୀ, ଶେଷ ଦିନରେ ୪ ଜଣ ପ୍ରାର୍ଥୀ ନାମାଙ୍କନ କରିଛନ୍ତି ।

Padmapur Bypoll, ବରଗଡ: ଆଜି ପବିତ୍ର ମାର୍ଗଶୀର ମାସର ଦ୍ୱିତୀୟ ଗୁରୁବାର। ପଦ୍ମପୁରରେ ନିର୍ବାଚନ ଯୁଦ୍ଧ ପାଇଁ ସବୁ ଦଳର ପ୍ରସ୍ତୁତି ଜାରି ରହିଥିବାବେଳେ ଆଜି ନାମାଙ୍କନ ସରିଛି । ତିନି ପ୍ରମୁଖ ଦଳ ଯଥା ବିଜେପି, ବିଜେଡି, କଂଗ୍ରେସ ସମେତ ସ୍ୱାଧୀନ ପ୍ରାର୍ଥୀ ମଧ୍ୟ ମାଣବସା ଗୁରୁବାରରେ ନାମାଙ୍କନ ଦାଖଲ କରିଛନ୍ତି । ପଦ୍ମପୁର ଉପନିର୍ବାଚନ ପାଇଁ ଗୁରୁବାର ନାମାଙ୍କନ ଦାଖଲର ଶେଷଦିନ ହୋଇଥିବାବେଳେ ଶୁକ୍ରବାର ପ୍ରାର୍ଥୀପତ୍ର ଯାଞ୍ଚ କରାଯିବ । ନଭେମ୍ୱର ୨୧ରେ ପ୍ରାର୍ଥୀପତ୍ର ପ୍ରତ୍ୟାହାର କରିବାକୁ ଥିବାବେଳେ ଆସନ୍ତା ଡିସେମ୍ୱର ୫ ତାରିଖରେ ନିର୍ବାଚନ ଏବଂ ୮ ତାରିଖରେ ଭୋଟ ଗଣତି ହେବ । 

ଶେଷ ଦିନକୁ ସମସ୍ତେ ଅପେକ୍ଷା କରି ଗୁରୁବାର ପ୍ରାର୍ଥୀପତ୍ର ଦାଖଲ କରିଛନ୍ତି ।  ଗୁରୁବାର ସକାଳେ ପ୍ରଥମେ ସ୍ୱାଧୀନ ପ୍ରାର୍ଥୀ ଭାବରେ ଜୟନ୍ତ ଥାପା ନାମାଙ୍କନ ଦାଖଲ କରିଥିଲେ । ଏହା ପରେ ପରେ ଏକ ବିଶାଳ ରାଲିରେ ଆସି ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ବିଜେଡି ପ୍ରାର୍ଥୀ ବର୍ଷାରାଣୀ ବରିହା ପହଞ୍ଚିଥିଲେ । ନାମାଙ୍କନବେଳେ ବିଜେଡିର ବରିଷ୍ଠ ନେତାମାନେ ସେଠାରେ ଉପସ୍ଥିତ ଥିଲେ । ବିଜେଡି ନେତ୍ରୀ ସ୍ନେହାଙ୍ଗୀନ ଛୁରିଆ, ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ, ରିତା ସାହୁଙ୍କ ସହିତ ଅନେକ ସମର୍ଥକଙ୍କ ଗହଣରେ ବର୍ଷା ପ୍ରାର୍ଥୀପତ୍ର ଭରିଥିଲେ । ତେବେ ନାମାଙ୍କନ ପୂର୍ବରୁ ବିଜେଡି ପ୍ରାର୍ଥୀ ବର୍ଷା, ବୁଢ଼ାରାଜାଙ୍କ ଆର୍ଶୀବାଦ ନେଇଛନ୍ତି । 

ଅନ୍ୟପଟେ ବିରାଟ ଶୋଭାଯାତ୍ରାରେ ଆସି କଂଗ୍ରେସ ପ୍ରାର୍ଥୀ ସତ୍ୟଭୁଷଣ ସାହୁ ନାମାଙ୍କନ ଭରିଥିଲେ । ତାଙ୍କ ସାଥିରେ ପିସିସି ସଭାପତି ଶରତ ପଟ୍ଟନାୟକ, ବିଧାୟକ ସନ୍ତୋଷ ସିଂ ସାଲୁଜାଙ୍କ ସହ ଅନ୍ୟ ବରିଷ୍ଠ ନେତାମାନେ ମଧ୍ୟ ଉପସ୍ଥିତ ରହିଥିଲେ । ଉତ୍ସାହର ସହ ସମସ୍ତଙ୍କ ଉପସ୍ଥିତିରେ ସେ ନାମାଙ୍କନ ଭରିଥିଲେ । ଶେଷରେ ପଦ୍ମପୁର ଉପନିର୍ବାଚନ ଲାଗି ବିଜେପି ପ୍ରାର୍ଥୀ ପ୍ରଦୀପ ପୁରୋହିତ ପ୍ରାର୍ଥିପତ୍ର ଦାଖଲ କରିଥିଲେ । ବିଶାଳ ଶୋଭାଯାତ୍ରାରେ ଆସି ଦଳର ରାଜ୍ୟ ସଭାପତି ସମୀର ମହାନ୍ତି, ବିରୋଧୀ ଦଳ ନେତା ଜୟନାରାୟଣ ମିଶ୍ର, ବରଗଡ଼ ସାଂସଦ ସୁରେଶ ପୂଜାରୀ, ବରିଷ୍ଠ ନେତା କନକବର୍ଦ୍ଧନ ସିଂଦେଓ ଓ ଗୋଲକ ମହାପାତ୍ରଙ୍କ ଉପସ୍ଥିତିରେ ନାମାଙ୍କନ ଦାଖଲ କରିଥିଲେ । ନାମାଙ୍କନ ପୂର୍ବରୁ ପ୍ରଦୀପ ପୁରୋହିତ ଗୁରୁଜନମାନଙ୍କ ଆଶୀର୍ବାଦ ନେଇଥିଲେ । 

 ନାମାଙ୍କନକୁ ନେଇ ଛକାପଞ୍ଝା ସ୍ଥିତି ଦେଖିବାକୁ ମିଳିଥିଲା ଯାହାକି ପଦ୍ମପୁର ରାଜନୀତିକୁ ଦୋହରା ଉଷ୍ଣ କରି ଦେଇଥିଲା । ପଦ୍ମପୁର ଉପନିର୍ବାଚନ ପାଇଁ ୧୩ଟି ପ୍ରାର୍ଥୀ ପତ୍ର କିଣାଯାଇଥିବାବେଳେ ସମସ୍ତ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଛନ୍ତି । କିନ୍ତୁ ତଥ୍ୟ ଅନୁଯାୟୀ, ଶେଷ ୪ ଜଣ ପ୍ରାର୍ଥୀ ନାମାଙ୍କନ କରିଛନ୍ତି । ଦୀର୍ଘ ୧୫ ଦିନ ହେଲା ଉପଜିଲ୍ଲାପାଳଙ୍କ ଦପ୍ତର ସମ୍ମୁଖରେ ବୀମା ଏବଂ ଇନ୍‌ପୁଟ୍‌ ସବ୍‌ସିଡି ଦାବିନେଇ ବୋଡ଼ାସମ୍ବର କୃଷକ ସଂଗଠନର ନେତୃତ୍ବରେ ଚାଷୀମାନେ ଧାରଣାରେ ବସିଛନ୍ତି । ନାମାଙ୍କନ ନ କରିବାକୁ ଚାଷୀମାନେ ସର୍ବଦଳୀୟ ବୈଠକ ବେଳେ ନେତାଙ୍କୁ ମୁଣ୍ଡିଆ ମାରିବା ବି ନଜିର ରହିଛି । ଗତ ସୋମବାର ବିଜେପି ଜୋର୍‌ଦାର୍‌ ଶୋଭାଯାତ୍ରା କରି ଉପଜିଲ୍ଲାପାଳ କାର୍ଯ୍ୟାଳୟରେ ପହଂଚିଥିଲା । ମାତ୍ର ଶେଷ ମୁହୂର୍ତ୍ତରେ ଆନ୍ଦୋଳନରତ ଚାଷୀଙ୍କ ସହ ଆଲୋଚନା ପରେ ଦଳ ନାମାଙ୍କନ କଲାନାହିଁ। ଚାଷୀ ଆନ୍ଦୋଳନକୁ ସମ୍ମାନ ଜଣାଇ ଦଳ ଏଭଳି ନିଷ୍ପତ୍ତି ନେଇଥିବା ସୂଚନା ଦେଇଥିଲା। 

ଛକାପଞ୍ଝା ମଧ୍ୟରେ ୧୭ ତାରିଖ ଅର୍ଥାତ ଶେଷ ଦିନ ହିଁ ତିନି ପ୍ରମୁଖ ଦଳ ନାମାଙ୍କନ ଭରିଥିଲେ । ଗତ ମଙ୍ଗଳବାର ମୁଖ୍ୟମନ୍ତ୍ରୀ ଚାଷୀଙ୍କ ପାଇଁ ୨ଶହ କୋଟି ଟଙ୍କାର ଇନ୍‌ପୁଟ୍‌ ସବ୍‌ସିଡି ସହାୟତା ଘୋଷଣା କରିଛନ୍ତି । ସେହିପରି କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର୍‌ ମଧ୍ୟ ଚାଷୀଙ୍କ ପାଇଁ ଟ୍ବିଟ୍‌ କରିଥିଲେ । ଏଥିରେ ସେ ବୀମା କମ୍ପାନିଗୁଡ଼ିକୁ ବୀମା ଟଙ୍କା ତୁରନ୍ତ ପୈଠକ କରିବାକୁ ନିର୍ଦ୍ଦେଶ ଦେଇଥିଲେ । ତେଣୁ ଏହି ଦୁଇଟି ଘୋଷଣା ନେଇ ଉଭୟ ବିଜେଡି ଏବଂ ବିଜେପି ପଦ୍ମପୁର ଭୋଟରଙ୍କ ପାଖକୁ ଯିବା ଅନୁମାନ କରାଯାଉଛି । ତେବେ ଗୋଟେପଟେ ଚାଷୀବୀମା ଅନ୍ୟପଟେ ଜିଲ୍ଲା ଗଠନ ଦାବି । ଏ ସମସ୍ତ ଭିତରେ ଦୋଦୁଲ୍ୟମାନ ସ୍ଥିତିରେ ପଦ୍ମପୁରର ଭୋଟର ।