ପ୍ରିୟଙ୍କାଙ୍କୁ ବି ଶୁଣିଲେନି ପାଇଲଟ୍ !

ଜୟପୁର/ନୂଆଦିଲ୍ଲୀ: ଆରପାର ଲଢ଼େଇ । ଗେହଲଟ ସରକାରଙ୍କ ଉପରେ ସଙ୍କଟ । ମୁଖ୍ୟମନ୍ତ୍ରୀ ଅଶୋକ ଗେହଲଟ କି ଉପମୁଖ୍ୟମନ୍ତ୍ରୀ ସଚିନ ପାଇଲଟ, କେହି ବି ପଛକୁ ହଟିବା ପାଇଁ ରାଜି ନାହାଁନ୍ତି । ବୈଠକକୁ ବି ଯିବାକୁ କୁଆଡ଼େ ରୋକଠୋକ୍ ମନାକରିଦେଉଛନ୍ତି ପାଇଲଟ । ସେପଟେ ଗେହଲଟ କହୁଛନ୍ତି,  ତାଙ୍କ ପାଖରେ ୧୦୯ ବିଧାୟକଙ୍କ ସମର୍ଥନ ରହିଛି । ମହାରାଷ୍ଟ୍ର, କର୍ଣ୍ଣାଟକ ଓ ମଧ୍ୟପ୍ରଦେଶ ପରେ ଦେଶ ଦେଖୁଛି ରାଜସ୍ଥାନ ପଲିଟିକ୍ସ ।

ଏବେ ଗୋଟିଏ ହିଁ ପ୍ରୟାସ । ପାଇଲଟଙ୍କୁ ବୁଝାଇବାକୁ ଚାଲିଛି ପ୍ରୟାସ । ସୂତ୍ର କହୁଛି, ତୁହାକୁ ତୁହା ଫୋନ କରୁଛନ୍ତି ପ୍ରିୟଙ୍କା । ହେଲେ ପାଇଲଟଙ୍କ ଆଡ଼ୁ ଜବାବ ମିଳୁନି । ଚରମ ନିଷ୍ପତ୍ତି ନେବାକୁ ସତେଯେମିତି ମନସ୍ତ କରିସାରିଛନ୍ତି ଏହି ଯୁବନେତା ।  ନିଷ୍ପତ୍ତି, ଆଉ ଗେହଲଟଙ୍କ ସହ କାମ କରିବେ ନାହିଁ । ବହୁତ ହୋଇଗଲା, ଆଉ ନୁହେଁ । କେତେଦିନ ହେଲେ ଦକ୍ଷତା ଓ ପ୍ରତିଭାକୁ ବଳିଦେବେ ? ହେଲେ ମଧ୍ୟପ୍ରଦେଶରେ ସିନ୍ଧିଆଙ୍କ ପରି ରାଜସ୍ଥାନରେ ଟାଇମିଂ ସଟ ଖେଳିବା ପାଇଲଟଙ୍କ ପକ୍ଷେ ଏତେ ସହଜ ନୁହେଁ । ଅବଶ୍ୟ ଚାତକ ପରି ବସିଛି ବିଜେପି । ଗେରୁଆ ଦଳର ଗଣିତ ମାଷ୍ଟର କୁଆଡ଼େ ଫୁଲ୍ ତୟାର ବୋଲି ଚର୍ଚ୍ଚା ହେଉଛି । 

ସୂତ୍ର ଅନୁସାରେ, ଏବେ ପାଇଲଟଙ୍କ ପାଖକୁ ବଡ଼ ବଡ଼ ନମ୍ବରରୁ ଖାଲି ଫୋନ୍ ଆସୁଛି । ରାହୁଲ ଗାନ୍ଧୀ ଥରେ, ପ୍ରିୟଙ୍କା ଗାନ୍ଧୀ ଭଦ୍ରା ୪ଥର, ଚିଦାମ୍ବରମ ୬ ଥର, ଅହମ୍ମଦ ପଟେଲ ୧୫ ଥର ଏବଂ କେସି ବେଣୁଗୋପାଳ ୩ ଥର ଫୋନ କଲେଣି । ସମସ୍ତେ ପାଇଲଟଙ୍କୁ ବୁଝାଇବାକୁ ଚାହୁଁଛନ୍ତି । କର୍ଣ୍ଣାଟକ ଓ ମଧ୍ୟପ୍ରଦେଶରେ ଯାହା ହେଲା, ତାହା ଯେ ରାଜସ୍ଥାନରେ ବି ହୋଇଯିବ, କଂଗ୍ରେସ ନେତୃବୃନ୍ଦଙ୍କୁ ସେଇ ଡର ଏବେ ରାତି ଶୁଆଇଦେଉନି । ହେଲେ ପାଇଲଟ ଫୋନ ଉଠାଉନାହାଁନ୍ତି । ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ଫୋନକୁ ବି ଆଭଏଡ ! ପାଇଲଟଙ୍କୁ ଫୋନ, ବିଧାୟକ ଭମ୍ବରଲାଲ ଶର୍ମାଙ୍କ ଆଡ଼ୁ ଉତ୍ତର ! ଅର୍ଥାତ ନିଜ ଜିଦରୁ ହଟିବା ଆଉ ପାଇଲଟଙ୍କ ପକ୍ଷେ ସମ୍ଭବ ହୋଇନପାରେ ।  
 
ମୁଖ୍ୟମନ୍ତ୍ରୀ ଅଶୋକ ଗେହଲଟ ଡାକିଥିବା ବୈଠକରେ ଆଜି ବି ଅନୁପସ୍ଥିତ ପାଇଲଟ ଗୋଷ୍ଠୀ ! ସେପଟେ ପାଇଲଟ ଅନୁପସ୍ଥିତ ରହିଲେ, ଦୃଢ଼ କାର୍ଯ୍ୟାନୁଷ୍ଠାନ ନେଇପାରେ ଦଳ । ତେବେ ଏସବୁ ଭିତରେ ସଚିନଙ୍କ ସହ ଯୋଗାଯୋଗ କରାଯାଉଛି । ଆଗକୁ କ'ଣ ହେବ, ପୂର୍ବାନୁମାନ କରିବା ବି ମୁସକିଲ । କାହିଁକିନା ରାଜସ୍ଥାନ ଗଣିତ, ଟିକେ କଷ୍ଟିଆ ବୋଲି ଲୋକେ କହୁଛନ୍ତି ।  

ସଚିନ ପାଇଲଟ ଓ ତାଙ୍କ ସମର୍ଥନ ମାନେସର ହୋଟେଲରେ ଥିବା ଜଣାପଡ଼ିଛି । ଗତକାଲି ପାଇଲଟ ଗୋଷ୍ଠୀ ଏକ ଭିଡିଓ ମଧ୍ୟ ଜାରି କରିଥିଲେ । ଯେଉଁଥିରେ ୧୧ ବିଧାୟକ ନଜର ଆସିଥିଲେ । କେବଳ ଏତିକି ନୁହେଁ, ୧୩ ନିର୍ଦଳୀୟ ବିଧାୟକଙ୍କ ସମ୍ପର୍କରେ ଅଛନ୍ତି ପାଇଲଟ । ଏହି ୧୩ ବିଧାୟକଙ୍କ ମଧ୍ୟରୁ ୩ ଜଣଙ୍କୁ ପ୍ରଥମରୁ ହିଁ ଅଶୋକ ଗେହଲଟ ହଟେଇ ଦେଇଥିଲେ । ତେଣୁ ସ୍ୱାଧୀନ ବିଧାୟକମାନେ ଅଶୋକ ଗେହଲଟଙ୍କ ଉପରେ ନାରାଜ ଥିବା ମଧ୍ୟ ଚର୍ଚ୍ଚା ହେଉଛି । ତେଣୁ ୧୦୯ ବିଧାୟକଙ୍କ ଦାବି କରୁଥିବା ଗୋଷ୍ଠୀଙ୍କୁ ହିଁ ଜଣାଥିବ, ସେମାନେ ସତ କହୁଛନ୍ତି କି ମୁହଁଫୁଟାଣି ମାରୁଛନ୍ତି । ଅବଶ୍ୟ, ଗେରୁଆ ଦଳ ପାଇଁ ଏବେ ନଖ ବଜାଇବା ବେଳ !