ଡାକ୍ତରଙ୍କୁ ଅପସନ୍ଦ ଏମ୍ସ : ୩ ବର୍ଷରେ ୪୨୨ ଡାକ୍ତରଙ୍କ ଇସ୍ତଫା, ଭୁବନେଶ୍ୱରରୁ ସର୍ବାଧିକ ୩୭

ଭୁବନେଶ୍ୱର: ଦେଶର ସର୍ବୋଚ୍ଚ ଏବଂ ସର୍ବୋତ୍କୃଷ୍ଟ ଚିକିତ୍ସା ସେବା ପ୍ରଦାନ କରୁଥିବା ସରକାରୀ ସଂସ୍ଥା ଦେଶର ଅଖିଳ ଭାରତୀୟ ଆୟୁର୍ବିଜ୍ଞାନ ପ୍ରତିଷ୍ଠାନ (ଏମ୍ସ)କୁ ପସନ୍ଦ କରୁ ନାହାନ୍ତି ବିଶେଷଜ୍ଞ ଡାକ୍ତର। ସଂସଦ ହେଉ ବା ପଞ୍ଚାୟତର ପ୍ରତିନିଧିମାନେ ତାଙ୍କ ଅଞ୍ଚଳରେ ଏମ୍ସର ଏକ ଶାଖା ପ୍ରତିଷ୍ଠା ପାଇଁ ଦାବି ଜଣାଉଥିବା ବେଳେ ଡାକ୍ତରଙ୍କ ଏପରି ଅପସନ୍ଦ ଏବେ ଚିନ୍ତା ବଢ଼ାଇଛି। କାରଣ ଗତ ତିନି ବର୍ଷରେ ଦେଶର ବିଭିନ୍ନ ଏମ୍ସରୁ ୪୨୨ ଜଣ ଡାକ୍ତର ଇସ୍ତଫା ଦେଇଛନ୍ତି। ଖାଲି ସେତିକି ନୁହେଁ, ଏହି ତାଲିକାରେ ଭୁବନେଶ୍ୱର ଏମ୍ସର ଡାକ୍ତରଙ୍କ ଇସ୍ତଫା ପ୍ରଦାନ ତାଲିକା ଅଧିକ। 

ଦିଲ୍ଲୀ ଏମ୍ସରୁ ଏହି ସମୟ ଅବଧିରେ ୨୫ ଜଣ, ଭୋପାଳରୁ ୨୭ ଜଣ, ଯୋଧପୁରରୁ ୩୫ ଜଣ, ରାୟପୁରରୁ ୩୭ ଜଣ, ନାଗପୁରରୁ ୨୭ ଜଣ ଡାକ୍ତର ଇସ୍ତଫା ଦେଇଛନ୍ତି। ସଂସଦରେ ଏକ ପ୍ରଶ୍ନର ଲିଖିତ ଉତ୍ତରରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଏମ୍ସରେ ଅବସ୍ଥାପିତ ଡାକ୍ତର, ନର୍ସ ଏବଂ ଅନ୍ୟାନ୍ୟ ଅଣଅଧ୍ୟାପକ ପଦବୀରେ ନିଯୁକ୍ତି ଏକ ନିରନ୍ତର ପ୍ରକ୍ରିୟା ଏବଂ ନିଯୁକ୍ତି ପ୍ରକ୍ରିୟା ଜାରି ରହିଛି। ଏମ୍ସ ଭଳି ଏକ ପ୍ରମୁଖ ଅନୁଷ୍ଠାନରୁ ଅଧ୍ୟୟନ, ଗବେଷଣା ଓ ଅଧ୍ୟାପକ ହେବା ପ୍ରତ୍ୟେକ ଛାତ୍ରଛାତ୍ରୀଙ୍କ ସ୍ୱପ୍ନ। 

ଦିଲ୍ଲୀ ମେଡିକାଲ କାଉନସିଲର ଅଧ୍ୟକ୍ଷ ଡାକ୍ତର ଅରୁଣ ଗୁପ୍ତା କହିଛନ୍ତି, ଏମ୍ସରୁ ଭଲ ପ୍ରତିଭାଙ୍କ ଇସ୍ତଫା ଦେବା ଠିକ୍ ନୁହେଁ। ଯଦି ଦିଲ୍ଲୀ ଭଳି ଅନୁଷ୍ଠାନରୁ ଡାକ୍ତର ଯାଉଛନ୍ତି ତେବେ ସରକାରଙ୍କୁ ଏହାର ପ୍ରକୃତ କାରଣ ଖୋଜିବାକୁ ପଡ଼ିବ। ହୁଏତ ଡାକ୍ତରମାନଙ୍କୁ ସିଷ୍ଟମରେ କିଛି ଅସୁବିଧା ହେଉଛି କିମ୍ବା ସେମାନଙ୍କୁ ପର୍ଯ୍ୟାପ୍ତ ସୁଯୋଗ ମିଳୁନାହିଁ। ଏମ୍ସରେ ଡାକ୍ତର ଓ କର୍ମଚାରୀଙ୍କ ଦରମା ବହୁତ ଭଲ, କିନ୍ତୁ ନିର୍ମାଣ ହେବାକୁ ଥିବା ନୂଆ ଏମ୍ସରେ କାର୍ଯ୍ୟସ୍ଥିତିରେ ଉନ୍ନତି ଆଣିବାକୁ ପଡ଼ିବ। ଏହାର ଗୋଟିଏ କାରଣ ହୋଇପାରେ ଯେ ଡାକ୍ତରମାନେ ଭାରଗ୍ରସ୍ତ ଏବଂ ସେମାନେ କାର୍ଯ୍ୟ ଅବସ୍ଥାରେ ଖୁସି ନୁହଁନ୍ତି । ଡାକ୍ତର ଗୁପ୍ତା କହିଛନ୍ତି ଯେ ଗୋଟିଏ କଥା ସ୍ୱୀକାର କରିବାକୁ ହେବ ଯେ ସମସ୍ତ ଏମ୍ସ ସମାନ ନୁହେଁ ଏବଂ ଯେଉଁ ନୂତନ ଏମ୍ସ ନିର୍ମାଣ ହେଉଛି ସେଗୁଡ଼ିକ ମଧ୍ୟରୁ ଅଧିକାଂଶ ଦିଲ୍ଲୀ ଏମ୍ସର ମାନର ନୁହେଁ। ଦିଲ୍ଲୀ ଏମ୍ସ ବିଷୟରେ କହିବାକୁ ଗଲେ, ଅନେକ ଡାକ୍ତର ଅବସର ନେବାର କିଛି ସମୟ ପୂର୍ବରୁ ଅନୁଷ୍ଠାନ ଛାଡ଼ି ଅନ୍ୟତ୍ର ରୋଗୀସେବା କରିବାକୁ ଯାଆନ୍ତି। ଦେଶର ୨୦ଟି ଏମ୍ସରେ ମଞ୍ଜୁରୀପ୍ରାପ୍ତ ଡାକ୍ତର ପଦବୀ ସଂଖ୍ୟା ୫୭୬୭ ଥିବାବେଳେ ସେଥିମଧ୍ୟରୁ ପ୍ରାୟ ୬୪ ପ୍ରତିଶତ ଅର୍ଥାତ୍ ୩୬୫୩ ଜଣ ଡାକ୍ତର ଓ ୩୬ ପ୍ରତିଶତ ବିଭିନ୍ନ ପଦବୀ ଖାଲି ପଡ଼ିଛି। ତେବେ ଏହି ପଦବୀଗୁଡ଼ିକୁ ଯଥାଶୀଘ୍ର ପୂରଣ କରିବା ପ୍ରକ୍ରିୟା ମଧ୍ୟ ଚାଲିଛି ବୋଲି ମନ୍ତ୍ରାଳୟ ପକ୍ଷରୁ କୁହାଯାଇଛି। ଦିଲ୍ଲୀ ଏମ୍ସକୁ ଦେଖିଲେ ୧୨୩୨ ଡାକ୍ତର ପଦବୀ ଥିବାବେଳେ ସେଥିରୁ ୮୧୬ଟି ପୂରଣ ହୋଇଛି।