ਪੰਜਾਬ ਹਰਿਆਣਾ ਵਿਚ ਔਰਤਾਂ ਅਤੇ ਬੱਚਿਆਂ ਨਾਲ ਵਧੇ ਅਪਰਾਧ, NCRB ਦੀ ਰਿਪੋਰਟ ਵਿਚ ਹੈਰਾਨ ਕਰਨ ਵਾਲੇ ਖੁਲਾਸੇ

ਚੰਡੀਗੜ: ਪੰਜਾਬ ਅਤੇ ਹਰਿਆਣਾ ਲਈ ਐਨ. ਸੀ. ਆਰ. ਬੀ. ਨੇ ਹੈਰਾਨ ਕਰਨ ਵਾਲੇ ਅੰਕੜੇ ਸਾਂਝੇ ਕੀਤੇ ਹਨ। ਹਰਿਆਣਾ ਅਤੇ ਪੰਜਾਬ ਵਿਚ ਔਰਤਾਂ ਅਤੇ ਬੱਚਿਆਂ ਵਿਰੁੱਧ ਅਪਰਾਧਾਂ ਦੀ ਗਿਣਤੀ ਵਿਚ ਵਾਧਾ ਦਰਜ ਕੀਤਾ ਗਿਆ ਹੈ। ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਊਰੋ ਦੀ ਤਾਜ਼ਾ ਰਿਪੋਰਟ ਅਨੁਸਾਰ ਸਾਲ 2020 ਦੇ ਮੁਕਾਬਲੇ 2021 'ਚ ਹਰਿਆਣਾ 'ਚ ਔਰਤਾਂ ਵਿਰੁੱਧ ਅਪਰਾਧਾਂ 'ਚ 27 ਫੀਸਦੀ ਵਾਧਾ ਹੋਇਆ ਹੈ, ਜਦਕਿ ਪੰਜਾਬ 'ਚ 17 ਫੀਸਦੀ ਵਾਧਾ ਹੋਇਆ ਹੈ। ਇਸਦੇ ਵਿਚ ਬਲਾਤਕਾਰ, ਔਰਤਾਂ ਨਾਲ ਛੇੜਛਾੜ ਅਤੇ ਬੱਚਿਆਂ ਨੂੰ ਅਗਵਾ ਕਰਨ ਦੇ ਮਾਮਲੇ ਵਧੇ ਹਨ।

ਅਪਰਾਧਿਕ ਘਟਨਾਵਾਂ 'ਚ 7 ਫ਼ੀਸਦੀ ਹੋਇਆ ਵਾਧਾ

ਇਸ ਦੇ ਨਾਲ ਹੀ 2020 ਦੇ ਮੁਕਾਬਲੇ 2021 ਵਿਚ ਕੁੱਲ ਅਪਰਾਧ ਦੀਆਂ ਘਟਨਾਵਾਂ ਵਿਚ ਸੱਤ ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਹਾਲਾਂਕਿ ਪੰਜਾਬ ਵਿਚ ਕੁੱਲ ਅਪਰਾਧਿਕ ਘਟਨਾਵਾਂ ਵਿਚ 11 ਫੀਸਦੀ ਦੀ ਕਮੀ ਆਈ ਹੈ। ਪੰਜਾਬ ਵਿਚ ਕੁੱਲ ਅਪਰਾਧ ਦੀਆਂ ਘਟਨਾਵਾਂ 2020 ਵਿਚ 82,875 ਤੋਂ ਘੱਟ ਕੇ 2021 ਵਿਚ 73,581 ਹੋ ਗਈਆਂ ਹਨ। ਪੰਜਾਬ ਵਿਚ 2020 ਵਿਚ ਔਰਤਾਂ ਵਿਰੁੱਧ ਅਪਰਾਧ ਦੇ 4838 ਮਾਮਲੇ ਸਨ ਜੋ 2021 ਵਿਚ ਵੱਧ ਕੇ 5662 ਹੋ ਗਏ। ਇਸੇ ਤਰ੍ਹਾਂ ਹਰਿਆਣਾ ਵਿਚ 2020 ਵਿਚ 13,000 ਕੇਸਾਂ ਤੋਂ ਵੱਧ ਕੇ 2021 ਵਿੱਚ 16,658 ਹੋ ਗਏ ਹਨ।

ਔਰਤਾਂ ਵਿਰੁੱਧ ਵਾਰਦਾਤਾਂ

ਹਰਿਆਣਾ ਵਿਚ 2020 ਵਿਚ 192395 ਦੇ ਮੁਕਾਬਲੇ 2021 ਵਿਚ 2,06,431 ਅਪਰਾਧ ਦੀਆਂ ਘਟਨਾਵਾਂ ਦਰਜ ਕੀਤੀਆਂ ਗਈਆਂ। ਹਰਿਆਣਾ ਵਿਚ, 2021 ਵਿਚ ਕੁੱਲ 1,716 ਬਲਾਤਕਾਰ ਦੀਆਂ ਘਟਨਾਵਾਂ ਹੋਈਆਂ ਜਦੋਂ ਕਿ 2020 ਵਿੱਚ ਇਹ 1,373 ਸੀ। ਪੰਜਾਬ ਵਿਚ ਸਾਲ 2020 ਵਿਚ 504 ਦੇ ਮੁਕਾਬਲੇ 2021 ਵਿਚ ਬਲਾਤਕਾਰ ਦੀਆਂ ਕੁੱਲ 508 ਘਟਨਾਵਾਂ ਵਾਪਰੀਆਂ, ਜਦੋਂ ਕਿ 2020 ਵਿੱਚ 53 ਦੇ ਮੁਕਾਬਲੇ 2021 ਵਿੱਚ ਬਲਾਤਕਾਰ ਦੀਆਂ ਕੋਸ਼ਿਸ਼ਾਂ ਦੇ ਮਾਮਲੇ ਵੱਧ ਕੇ 60 ਹੋ ਗਏ। ਰਾਜ ਵਿਚ ਔਰਤਾਂ 'ਤੇ ਹਮਲੇ ਦੇ ਮਾਮਲੇ 2020 ਵਿਚ 732 ਤੋਂ ਘੱਟ ਕੇ 2021 ਵਿਚ 688 ਰਹਿ ਗਏ ਹਨ।

ਬੱਚਿਆਂ ਵਿਰੁੱਧ ਅਪਰਾਧਾਂ ਕਈ ਫੀਸਦੀ ਵਾਧਾ ਹੋਇਆ

ਬੱਚਿਆਂ ਵਿਰੁੱਧ ਅਪਰਾਧਾਂ ਦੀ ਗੱਲ ਕਰੀਏ ਤਾਂ ਪੰਜਾਬ ਵਿਚ 20 ਫੀਸਦੀ ਅਤੇ ਹਰਿਆਣਾ ਵਿਚ 31 ਫੀਸਦੀ ਵਾਧਾ ਹੋਇਆ ਹੈ। ਪੰਜਾਬ ਵਿਚ 2021 ਵਿਚ ਬੱਚਿਆਂ ਵਿਰੁੱਧ ਅਪਰਾਧ ਦੇ ਕੁੱਲ 2,556 ਮਾਮਲੇ ਦਰਜ ਕੀਤੇ ਗਏ ਜਦੋਂ ਕਿ 2020 ਵਿਚ 2,121 ਕੇਸ ਦਰਜ ਕੀਤੇ ਗਏ। ਪੰਜਾਬ ਵਿਚ 2021 ਵਿੱਚ ਬੱਚਿਆਂ ਦੇ ਅਗਵਾ ਅਤੇ ਅਗਵਾ ਦੀਆਂ 1,440 ਘਟਨਾਵਾਂ ਹੋਈਆਂ ਜਦੋਂ ਕਿ 2020 ਵਿਚ ਇਹ ਗਿਣਤੀ 1,032 ਸੀ। ਇਸੇ ਤਰ੍ਹਾਂ, ਹਰਿਆਣਾ ਵਿੱਚ 2021 ਵਿੱਚ ਬੱਚਿਆਂ ਦੇ ਵਿਰੁੱਧ 5,700 ਕੇਸ ਸਨ, ਜਦੋਂ ਕਿ 2020 ਵਿਚ ਇਹ 4,338 ਸੀ। ਪੰਜਾਬ ਵਿੱਚ 2021 ਵਿੱਚ 39 ਬੱਚਿਆਂ ਦੇ ਕਤਲ ਹੋਏ ਜਦਕਿ 2020 ਵਿੱਚ ਇਹ ਗਿਣਤੀ 44 ਸੀ। ਹਰਿਆਣਾ ਵਿੱਚ 2020 ਵਿੱਚ 59 ਦੇ ਮੁਕਾਬਲੇ 2021 ਵਿੱਚ ਕਤਲ ਦੀਆਂ 47 ਘਟਨਾਵਾਂ ਹੋਈਆਂ।