`काँटे नही कटते....`, म्हणत अनिल कपूर यांनी तिच्यासाठी पुन्हा धरला ठेका
सोशल मीडियावर व्हिडिओ तुफान व्हायरल
मुंबई : काही कलाकार हे त्यांच्या चित्रपटांसोबतच धमाकेदार अंदाजासाठीसुद्धा कायमच प्रेक्षकांच्या मनाचा ठाव घेतात. अशाच कलाकारांपैकी एक नाव म्हणजे अभिनेता anil kapoor अनिल कपूर यांचं. वाढतं वय म्हणजे नेमकं काय, ही संकल्पनाच मुळात या अभिनेत्याला ठाऊक नाही. एव्हरग्रीन अभिनेता म्हणून ओळखले जाणारे अनिल कपूर सोशल मीडियारही बऱ्यापैकी सक्रिय आहेत. मुख्य म्हणजे सध्याच्या पिढीतही ते तितकेच लोकप्रिय आहेत.
अशा या अभिनेत्याचा एक धमाल व्हिडिओ सोशल मीडियावर व्हायरल होत आहे. या व्हिडिओमध्ये अनिल कपूर त्यांच्याच एका प्रचंड गाजलेल्या गाण्यावर ठेका धरताना दिसत आहेत. यासाठी निमित्त ठरलं ते म्हणजे एक रिऍलिटी शो.
'डान्स प्लस' या रिऍलिटी शोमधील स्पर्धक वर्तिका झा हिनं 'काँटे नही कटते' या गाण्यावर सुरेख नृत्य सादर केलं. ज्यानंतर तिनं याच गाण्यावर अनिल कपूर यांच्यासमवेत नृत्य करण्याची इच्छा व्यक्त केली. स्पर्धक, चाहतीची ही इच्छा ऐकून क्षणार्धाचाही वेळ न दवडता कपूर यांनी थेट व्यासपीठ गाठलं आणि नेहमीच्याच मन जिंकणाऱ्या अंदाजात तेसुद्धा या गाण्याच्या बोलांवर ठेका धरताना दिसले.
सोशल मीडियावर हा व्हिडिओ शेअर करण्यात आल्यानंतर तो कमालीचा व्हायरल झाला. अनिल कपूर यांच्या असंख्य चाहत्यांनीही या व्हिडिओला पसंत केलं. तर, अनेकांनीच या दिलखुलास अभिनेत्याच्या या अंदाजाला दाद दिली. त्यामुळं वयाच्या या टप्प्यावरही ते खऱ्या अर्थानं सुपरहिट ठरत आहेत, असं म्हणणं वावगं ठरणार ऩाही. किंबहुना नव्या जोमाच्या कलाकारांनीही लाजवेल असाच त्यांचा उत्साह आहे, असं म्हणणं अतिशयोक्ती ठरणार नाही.