नार्वेकर ‘बॅक इन अ‍ॅक्शन’; नेमकं काय आहे प्रकरण...
Sanjay Narvekar is Back in Action : आता कोणत्या भूमिकेत आणि कोणत्या चित्रपटातून प्रेक्षकांवर करणार जादू
Sanjay Narvekar is Back in Action : गेल्या बऱ्याच दिवसांपासून अभिनेता शरद केळकरचा बहुप्रतिक्षित आणि बहुचर्चित ‘रानटी’ या चित्रपटाची प्रेक्षक आतुरतेनं प्रतीक्षा करत आहेत. हळू हळू या चित्रपटातील एक एक भूमिका समोर येत आहे. या भूमिका आणि त्यातही कोणते कलाकार या चित्रपटात दिसणार आहे. हे जाणून घेण्यासाठी प्रेक्षक प्रचंड आतुर आहेत. त्यात काही दिवसांपूर्वी अभिनेता संतोष जुवेकरच्या भूमिकेवरून पर्दा उठला आहे. तर आता आणखी एका अभिनेत्याच्या भूमिकेवर पर्दा उठवण्यात आला आहे. आता हा अभिनेता कोण आहे आणि त्याची भूमिका कोणती आहे याविषयी जाणून घेऊया...
या मराठमोळ्या अभिनेत्याविषयी बोलायचं झालं तर इंडस्ट्री सोबतच बॉलिवूडमध्ये या अभिनेत्यानं ‘देढ फुट्या’ या भूमिकेने लोकप्रियता मिळवली आहे. या अभिनेत्याचं नाव काय असा तुम्हाला प्रश्न पडला असेल तर त्या अभिनेत्याचं नाव संजय नार्वेकर आहे. संजय नार्वेकर हे ‘रानटी’ चित्रपटातून आपल्याला अ‍ॅक्शन मोडमध्ये दिसणार आहेत. ‘सदा राणे’ नावाच्या खतरनाक खलनायकाची भूमिका ते साकारत आहेत. ‘सदा राणे’ ही अत्यंत क्रूर व्यक्तिरेखा प्रेक्षकांचा थरकाप उडवणारी आहे. पुनीत बालन स्टुडिओ निर्मित आणि समित कक्कड दिग्दर्शित ‘रानटी’ हा मराठीतला सगळ्यात मोठा अ‍ॅक्शनपट 22 नोव्हेंबरला आपल्या भेटीला येणार आहे.
आपल्या भूमिकेबद्दल बोलताना संजय नार्वेकर म्हणाले, ‘सदा राणे’ हा वरकरणी अतिशय शांत पण आतून कपटी असा खलनायक साकारणे माझ्यासाठी चॅलेंजिंग होते. चित्रपटाच्या कथानकाला वळण देणारी ही भूमिका प्रेक्षकांनाही धडकी भरवणारी आहे. ‘कथेच्या गरजेनुसार भूमिकेत शिरणे माझ्यासाठी नेहमीच आव्हानात्मक असते. अशा भूमिका फार कमी लिहिल्या जातात, दिग्दर्शक समित कक्कड यांच्या ‘रानटी’ चित्रपटामुळे मला ‘सदा राणे’ या खलनायकाच्या व्यक्तिरेखेत प्रवेश करण्याची जबरदस्त संधी मिळाली आणि मी माझ्या पद्धतीने ती पडद्यावर साकारली आहे. समितच्या चित्रपटात काम करणे हा नेहमीच एक भन्नाट अनुभव असतो. त्याच्या प्रत्येक चित्रपटाची कथा जबरदस्त असल्याने त्यात भूमिका करणे हे प्रत्येकासाठी चॅलेंजिंग असतं. प्रेक्षकांनाही हा 'सदा राणे' दीर्घकाळ लक्षात राहील याची मला खात्री वाटते.
‘रानटी’ चित्रपटासाठी हृषिकेश कोळी यांचं लिखाण, अजित परब यांचं संगीत, अमर मोहिले यांनी संगीतबद्ध केलं आहे. तर, एझाज गुलाब यांची साहसदृष्ये, सेतु श्रीराम यांचं छायाचित्रण, आशिष म्हात्रे यांचं संकलन अशी भक्कम तांत्रिक बाजू असलेली टीम लाभलेली आहे.