ईशासाठी आनंदनं `शब्दांविना` असं व्यक्त केलं प्रेम

मुंबई : मुकेश अंबानी यांची मुलगी ईशा अंबानी हिच्यासाठी तिचा आयुष्याचा साथीदार अर्थात तिचा होणारा नवरा आनंद पिरामलनं पुन्हा एकदा प्रेम व्यक्त केलंय... आणि तेही जाहीररित्या... पण हे प्रेम दर्शवण्यासाठी आनंदला कोणत्याही शब्दांची आवश्यकता पडली नाही... तर ईशाच्या एमबीए ग्रॅज्युएशन सेरेमनीला तिच्या कुटुंबासोबत उपस्थित राहून आनंदनं आपलं प्रेम व्यक्त केलंय.

देशातील सर्वात श्रीमंत व्यक्ती मुकेश अंबानी यांची मुलगी ईशा अंबानीनं स्टॅनफोर्ड युनिव्हर्सिटीतून आपलं शिक्षण पूर्ण केलंय. ईशानं याच वर्षी जूनमध्ये स्टॅनफोर्ड बिझनेस स्कूलमधून मास्टर इन बिझनेस अॅडमिनिस्ट्रेशनची (एमबीए) डिग्री मिळवलीय. या ग्रॅज्युएशन सेरेमनीसाठी 26 वर्षीय ईशाचं संपूर्ण कुटुंब हजर झालं होतं. सोबतच ईशाचा होणारा नवरा अर्थात आनंद पीरामलही उपस्थित होता. 

ईशानं सोशल मीडियावर शेअर केलेल्या फोटोत नीता अंबानी, मुकेश अंबानी, आनंद पीरामल, आकाश अंबानी, श्लोका मेहता आणि कुटुंबातील इतर सदस्य उपस्थित होते. ईशानं येलमधून यापूर्वी सायकोलॉजी आणि साऊथ एशियन स्टडीज पूर्ण केलीय. तिनं स्टॅनफोर्ड नर्सरीमध्ये आपल्या शिक्षणादरम्यान शिकवण्याचं कामही केलं.

ईशाचा याच वर्षी मे महिन्यात साखरपुडा पार पडला होता. महाबळेश्वरच्या एका मंदिरात आनंदनं ईशाला प्रपोज केलं होतं... आनंद पीरामल हा व्यावसायिक अजय पीरामल यांचा मुलगा आहे. ईशा-आनंदचा विवाह भारतातच होणार आहे.ईशा आणि आनंद एकमेकांचे चांगले मित्र आहेत. दोघांचे कुटुंबीय एकमेकांना चार दशकांपासून ओळखतात. 

आनंदनं हार्वर्ड बिझनेस स्कूलमधून शिक्षण पूर्ण केलंय. तो सध्या पीरामल एन्टरप्राईजचा एक्झिक्युटिव्ह डायरेक्टर आहे. शिक्षण पूर्ण झाल्यानंतर त्यानं आपले दोन स्टार्टअप्स सुरू केले होते. पहिलं हेल्थकेअर स्टार्टअप होतं...ज्याचं नाव पीरामल ई स्वास्थ्य असं होतं. तर दुसरं स्टार्टअप पीरामल रिअॅलिटी हे रिअल इस्टेटशी संबंधित होतं. आता दोन्ही पीरामल एन्टरप्राईजचाच एक भाग आहेत.