राम रहीमला तुरुंगात हवाय मसाज

चंदीगड : मला पाठदुखीचा त्रास असून माझी मानलेली मुलगी हनीप्रीत पाठीचा मसाज करत असते. त्यामुळं तिला माझी सहाय्यक म्हणून नेमण्याची विनंती रामरहीमनं केली आहे. बलात्काराच्या गुन्ह्याखाली रोहतक तुरुंगात शिक्षा भोगत असलेला डेरा सच्चा सौदाचा प्रमुख राम रहीम गुरमीत सिंगनं तुरुंगात मसाज मिळावा अशी मागणी केली आहे.

 मसाज मिळवण्यासाठी त्यानं दोन वेगवेगळी कारणं दिली होती. पण डॉक्टरांनी केलेल्या वैद्यकीय तपासणीत त्याचा दावा खोटा असल्याचं आढळून आलं. वैद्यकीय अहवालानंतर तुरुंग प्रशासनानं राम रहीमची विनंती धुडकावून लावली. त्यानंतर त्यानं कोर्टात याचिका दाखल केली. कोर्टानंही त्याची याचिका फेटाळून लावली.

पाठदुखी, अतिताण आणि मधुमेहाचा त्रास होत असल्याची तक्रार राम रहीमनं याआधीही केली होती. हनीप्रीत ही फिजिओथेरपीसह पाठीला मसाज करते. त्यामुळं तिला सोबत ठेवण्याची विनंती राम रहीमने अर्जाद्वारे केली होती.

 राम रहीमला तुरुंगात माळी काम देण्यात आलं असून, राम-रहिमला दिवसाला ४० रुपयांची मजुरी मिळते. राजेशाही राहणीमानाची सवय झालेला राम रहीम सध्या आठ बाय आठच्या एका कोठडीत राहत असून भिंतींशी बोलत असल्याची माहिती समोर आली आहे.