Success Story 10th Pass Woman: एखाद्या महिलेने निश्चय केला तर काहीही करु शकते. मग शिक्षण, घरची परिस्थिती, आर्थिक, सामाजिक या गोष्टी फार गौण ठरतात. अशीच अभिमान वाटावा अशी कहाणी भारतीय महिलेने रचली आहे. यूपीच्या कन्नौजमध्ये ही महिला राहत असून तिचे शिक्षण केवळ दहावी उत्तीर्ण आहे. पण तिने केलेल्या कामगिरीचे कौतुक गुगलनेही केले आहे. असे या महिलेने काय केले? नव वर्षाचा संकल्प करताना आपण या महिलेकडून काय शिकू शकतो? याबद्दल जाणून घेऊया. 


COMMERCIAL BREAK
SCROLL TO CONTINUE READING

कन्नौजच्या तिरवा तहसीलच्या बुथैयान गावात किरण कुमारी राजपूत राहतात. त्यांची उमरदा ब्लॉकच्या गुंडाहा गावात २३ एकर जमीन आहे. त्यांचे शेत नेहमी पाण्याने भरलेले असते. त्यामुळे शेतीही नीट होत नाही. आजुबाजूच्या अनेक शेतकऱ्यांना या अडचणीतून जावे लागते. पण यावर मार्ग काही निघत नव्हता. दरम्यान किरण कुमारी यांनी शेतातील पाणी तुंबलेल्या भागाचे तलावात रूपांतर करण्याचा निर्णय घेतला. त्यांनी शेतात पाणी साचण्याच्या समस्येचा अशा प्रकारे सामना केला की आता सर्वजण त्यांची प्रशंसा करत आहेत. आपत्तीचे संधीत रूपांतर करून त्यांनी शेतीचेच एका छोट्या बेटात रूपांतर केले आहे.


2016 मध्ये किरणने जलपूर योजनेंतर्गत प्रशासनाकडून 2 लाख रुपये घेतले. थोडी बचत आणि काही कर्ज घेऊन मत्स्यपालन सुरू केले. 23 एकर जागेत तलावाचे काम सुरू करण्यासाठी 11 लाख रुपये खर्च करण्यात आले.


त्यांना सुरुवातीला थोडा फायदा झाला. यानंतर  त्यांनी तलावाच्या मधोमध एक एकर बेट तयार केले. आंबा, पेरू, केळी, करवंद, पपई, ढोलकीची झाडे, फुलझाडे लावून त्याचे बागेत रूपांतर करण्यात केले. आता हे बेट आकर्षणाचे केंद्र बनले आहे. आता लोक तिथे भेटायला आणि बोटींग करायला येतात. 


किरणची तब्येत ठीक नसल्यामुळे आता बेटावर त्यांचा मुलगा शैलेंद्र पहारा देत आहे. तलावात कटलफिश, नान, चायना फिश, ग्रास कटर आणि सिल्व्हर मासे आहेत. त्या आता मत्स्यशेती आणि फळे विकून दरवर्षी सुमारे 20 ते 25 लाख रुपये कमावतात.


हे बेट पाहण्यासाठी लांबून लोक येत आहेत. तो सर्वांच्या आकर्षणाचा मुख्य बिंदू राहिला आहे. किरण कुमारी यांच्या बेटाची चर्चा आता जगभरात होऊ लागली आहे. गुगलनेही त्यांच्या कार्याचे कौतुक केले असून त्यांना सन्मानाचे प्रमाणपत्र दिले आहे. गुगलने आम्हाला वर्षभरापूर्वी प्रमाणपत्र दिले होते. त्यावेळी आमच्या बेटाचेही कौतुक झाले. गुगलनेही आमचा फोटो अपलोड केला होता, अशी माहिती किरण कुमारी यांचा मुलगा शैलेंद्र याने दिली.