रविंद्र कांबळे, झी मीडिया, सांगली : दक्षिण आफ्रिकेतून मागवणार चित्ते, महापौरांना अंबारीसह हत्ती तर, उपमहापौरसाठी घोडा खरेदी करणार, चंद्र मंगळावर जाण्यासाठी सांगलीत अंतराळ यान स्थानक उभारले जाणार (space station will be built in Sangli to go to Moon and Mars)... या नुसत्या कल्पना नाहीत तर ठराव आहेत.  सांगली महापालिकेत (Sangli, Miraj and Kupwad City Municipal Corporation) अनोखी अभिरुप महासभा पार पडली. या अभिरुप सभेत हे निर्णय घेण्यात आले. 


COMMERCIAL BREAK
SCROLL TO CONTINUE READING

सांगली, मिरज आणि कुपवाड शहर महानगर पालिकेत अनोखी अशी अभिरूप महासभा आयोजित करण्यात आली होती. आयुक्त महापौरांच्या खुर्चीत, अधिकारी नगरसेवकांच्या भूमिकेत, तर नगरसेवक अधिकाऱ्यांच्या भूमिकेत दिसले.  सांगली मिरज आणि कुपवाड शहर महापालिका क्षेत्रात बिबट्या, गवा , सांभार या वन्य प्राण्यांचा पकडण्याचे टेंडर काढण्याचा आणि दक्षिण आफ्रिकेकडून चित्ते मागण्याचा निर्णय घेण्यात आला. या अभिरुप सभेचे पीठासीन अधिकारी तथा महापौर म्हणून आयुक्त सुनील पवार यांनी काम पाहिले तर आयुक्तांची भूमिका महापौर दिग्विजय सूर्यवंशी यांनी बजावली.


महानगर पालिकेच्या 25 व्या वर्धापन दिनानिमित्त अभिरुप सभेचे आयोजन


सांगली मिरज आणि कुपवाड शहर महानगर पालिकेच्या 25 व्या वर्धापन दिनानिमित्त आज सांगली महापालिकेत अभिरुप महासभा पार पडली. या अभिरुप महासभेत प्रशासनाची भूमिका नगरसेवक तर नगरसेवक पदाधिकारी यांची भूमिका काहीवेळ प्रशासकीय अधिकारी सांभाळतात. ही अभिरुप सभा आल्याने या सभेत अनेक गमतीदार विषय पटलावर मांडले जातात आणि त्या विषयावर चर्चाही केली जाते. 


दुबईत अभ्यास दौरा


अभिरुप महासभेत महापालिका क्षेत्रातील नागरिकांना चंद्र व मंगळ ग्रहावर पर्यटनासाठी जानेकरिता महापालिकेच्या ओपन स्पेस मध्ये अंतराळ स्थानक उभारण्याचा निर्णय घेण्यात आला. महापालिका पदाधिकारी व नगरसेवकांना दुबईत अभ्यास दौरा करण्यास पाठवण्याचा आणि येताना दुबईतून कंदील व दिवे आणण्यास मान्यता देण्यात आली. 


महापौर आणि उपमहापौरांसाठी हत्ती, घोडे खरदी करावेत


याच अभिरूप महासभेत महापौर यांच्यासाठी रोल्स रॉयल किंवा मर्सडीज बेंझ गाडी घेण्याच्या विषयाला नगरसेवकांनी विरोध केला तर ही महागडी वाहने नगरसेवकांच्या मानधनातून न घेता शासनाच्या निधीतून घेण्याची सूचना अभिरुप नगरसेवकांनी केली. यावर अभिरुप सभेचे महापौर सुनील पवार यांनी महापौरांना रोल्स रॉयल किंवा मर्सडीज बेंझ गाडी घेण्याऐवजी हत्ती अंबारीसह आणि उपमहापौर व अन्य पदाधिकारी यांच्यासाठी घोडे खरेदी करण्याचा निर्णय घेण्यात आला. तसेच महापालिकेच्या नगरसेवकांची नोंदणीकृत ठेकेदार वर्ग अ म्हणून नोंदणी करण्यासही मान्यता देण्यात आली.


कृष्णा नदी कुपवाड कडे वळवण्याचा निर्णय


याच अभिरुप सभेत आयत्या वेळेत कृष्णा नदी कुपवाड कडे वळवण्याचा निर्णय घेण्यात आला. तर अधिकाधिक आयत्या वेळचे विषय घ्यावेत आणि त्यावरच चर्चा करावी असे अभिरुप महासभेचे महापौर सुनील पवार यांनी जाहीर केले.
 या अभिरूप महासभेत प्रशासनाच्या जागेवर नगरसेवक पदाधिकारी तर नगरसेवक पदाधिकारी यांच्या भूमिकेत प्रशासकीय अधिकारी पाहायला मिळाले त्यामुळे या सभेमध्ये झालेले संवाद , विनोद आणि कानपिचक्या पाहता या अभिरूप महासभेत हास्यकल्लोळ पाहायला मिळाला. जागतिक दर्जाचे विषय सांगली महापालिकेच्या अभिरुप सभेत घेतल्यामुळे या चर्चांना आणखीनच रंगत आली. उपायुक्त राहुल रोकडे यांनी स्थायी सभापती धीरज सूर्यवंशी यांची तर अतिरिक्त आयुक्त चंद्रकांत खोसे यांनी उपमहापौरांची भूमिका बजावली होती. उपायुक्त स्मृती पाटील यांनी नगरसेविका रोहिणी पाटील यांची तर नगरसेविका गीतांजली ढोपे पाटील यांनी उपायुक्त स्मृती पाटील यांची भूमिका बजावली.