अमरावती जिल्ह्यात काँग्रेस, रवी राणा यांचे पुन्हा वर्चस्व; भाजप आणि राष्ट्रवादीला भोपळा

Teosa Nagar Panchayat Election Result 2022 : काँग्रेसचे पालकमंत्री असलेल्या यशोमती ठाकूर यांच्या जिल्ह्यात भाजपला येथे आपले खातेही उघडता आले नाही. राष्ट्रवादी काँग्रेसची हीच स्थिती आहे. तिवसामध्ये चांगले यश मिळाल्याने काँग्रेसच्या कार्यकर्त्यांनी जोरदार जल्लोष केला.

अमरावती : Teosa Nagar Panchayat Election Result 2022 : राज्यातील 106 नगरपंचायत आणि जिल्हा परिषदेच्या जागांसाठी झालेल्या मतदानाची आज मतमोजणी सुरु आहे.  ओबीसी आरक्षणाशिवाय राज्यातील नगरपंचायत, जिल्हा परिषद, पंचायत समितींसाठी मतदान झाले. अमरावती जिल्ह्यातील तिवसा आणि भातकुली नगरपंचायत निवडणूकीचे सर्व निकाल हाती आले आहे. 

तिवसा येथे 12 जागा जिंकून काँग्रेसने निर्विवाद वर्चस्व प्रस्थापित केले आहे. तर भातकुली येथे 9 जागा जिंकून आमदार रवी राणा यांच्या युवा स्वाभिमान पार्टीने पुन्हा वर्चस्व प्रस्थापित केले. त्यामुळे येथे  काँग्रेस आणि रवी राणा यांचीच सत्ता असणार आहे.

तर दुसरीकडे तिवसामध्ये पालकमंत्री यशोमती ठाकूर यांना यांनी चांगले काम करत काँग्रेसला अधिक बळ दिले आहे. तिवसा नगरपंचायत निवडणुकीच्या मतदानाची मतमोजणी आज सकाळी दहा वाजता सुरु झाली. तेव्हापासून काँग्रेसने आघाडी घेतली होती.

अवघ्या एका तासात 17 जागांचे निकाल हाती आले. त्यात 12 जागा जिंकून काँग्रेसने स्पष्ट बहुमत मिळविले असून गेल्या निवडणुकीपेक्षा 2 जागा जास्त जिंकल्या आहे. 

शिवसेनेला 4 जागा तर वंचित बहुजन आघाडीला 1 जागेवर समाधान मानावे लागले. मात्र, काँग्रेसचे पालकमंत्री असलेल्या यशोमती ठाकूर यांच्या जिल्ह्यात भाजपला येथे आपले खातेही उघडता आले नाही. राष्ट्रवादी काँग्रेसची हीच स्थिती आहे. तिवसामध्ये चांगले यश मिळाल्याने काँग्रेसच्या कार्यकर्त्यांनी जोरदार जल्लोष केला.