मुंबई: भांडुपच्या नरदास नगर परिसरात रविवारी घडलेल्या विचित्र अपघातात एका व्यक्तीचा दुर्दैवी मृत्यू झाला. मातीने भरलेला डंपर टेंभीपाडा रोडवर चढणीवर असताना अचानक वाहनचालकाचे नियंत्रण सुटले आणि तो उतारावरून खाली येत एका टेम्पोवर आदळला. त्याठिकाणी असलेल्या एका व्यक्तीला टेम्पोची धडक लागून तो पंधरा फूट खाली कोसळला.  संतापजनक बाब म्हणजे ही जखमी व्यक्ती बराच काळ दुर्घटनास्थळी जखमी अवस्थेत पडून होती. जमलेल्या बघ्यांच्या गर्दीमधून एकानेही त्याला रुग्णालयात हलवण्याची साधी माणुसकी देखील दाखवली नाही. याउलट या इसमाचे फोटो काढण्यातच अनेकजण व्यस्त होते. अखेर अजिंक्य भोसले या दक्ष नागरिकाने आणि त्याच्या सहकाऱ्यांनी घटनास्थळी धाव घेऊन जखमी व्यक्तीला नजीकच्या रुग्णालयात दाखल केले. मात्र, रुग्णालयात नेण्यापूर्वीच त्याचा मृत्यू झाला. सध्या पोलीस या घटनेचा अधिक तपास करत आहेत.