आशियाई कुस्ती स्पर्धा, बजरंगला सुवर्णपदक

नवी दिल्ली : आशियाई कुस्ती स्पर्धेत बंजरंग पुनियाने कमाल करत भारताला स्पर्धेतील पहिले सुवर्णपदक मिळवून दिले. बंजरंग पुनियाने ६५ किलो वजनी गटात कोरियन कुस्तीपटू ली शुंग चुल याला ६-२ अशी मात देत सुवर्णपदकावर नाव कोरले. तर महिलांच्या ५८ किलो वजनी गटात सरिताने रौप्य पदक पटकावले.

अंतिम फेरीच्या सामन्यात पहिल्या राउंडमध्ये बजरंग पूनिया ०-२ अशा पिछाडीवर होता. त्यानंतर दुसऱ्या राउंडमध्ये बजरंनने जबरदस्त कामगिरी करत सामन्यात पुनरागमन करत कोरियाच्या ली शुंग चुलचा पराभव करत सुवर्णपदक पटकावले. 

तर, ५८ किलो वजनी गटाच्या सामन्यात सरिताला सुवर्णपदकाने हुलकावणी दिली. अंतिम फेरीत कझाकिस्तानच्या ए. टीनबेकोवाने सरिताचा ६-० असा एकतर्फी पराभव केला. सरिता ही ६० किलो वजनी गटात खेळणार होती. मात्र, ऐन स्पर्धेच्या तोंडावर तिला ५८ किलो वजनी गटात खेळण्यास सांगण्यात आले होते.

आशियाई कुस्ती चॅम्पियनशीप स्पर्धेत आतापर्यंत भारताने ८ पदके जिंकली असून त्यातील पाच पदके महिला कुस्तीपटूंनी जिंकली आहेत.