रोहित प्लीज...; चाहत्याने रोहित शर्माकडे मागितली ही गोष्ट!

दुबई : आयपीएल 2021 आता अंतिम टप्प्यात येऊन पोहोचली आहे. जगभरातील क्रिकेट चाहत्यांची नजर या महिन्यात सुरू होणाऱ्या टी -20 विश्वचषकाकडे आहे. विशेषतः भारत आणि पाकिस्तान यांच्यात 24 ऑक्टोबर रोजी दुबईमध्ये होणाऱ्या हाय-व्होल्टेज सामन्याची (IND vs PAK T20 World Cup) चाहत्यांना उत्सुकता आहे. 

भारत-पाकिस्तान सामन्याबद्दल क्रिकेट चाहत्यांमध्ये असलेली क्रेझ यावरून लक्षात येते की या सामन्याची तिकिटं तब्बल 333 पट महाग विकली गेलीयेत. चाहत्यांनी सर्वात महाग तिकीट खरेदी करण्यासाठी 2 लाख रुपयांपर्यंत खर्च केला आहे. 

दरम्यान इतकं करूनही काही चाहत्यांना तिकीट मिळू शकलेलं नाही. अशाच एका चाहत्याने रोहित शर्माकडे शुक्रवारी मुंबई इंडियन्स आणि सनरायझर्स हैदराबाद यांच्यातील सामन्यादरम्यान भारत-पाकिस्तान सामन्याचे तिकीट मिळवण्याची मागणी केली. मुख्य म्हणजे या फॅनने एक पोस्टरही तयार केलं होतं. ज्यावर असं लिहिलं होतं की, रोहित IND vs PAK सामन्याला दोन तिकिटांची गरज आहे. कृपया द्या.

रोहित शर्माकडे तिकीटांची मागणी करणारं हे पोस्टर आता सोशल मीडियावर व्हायरल झालं आहे. यावर अनेकांनी विविध आणि मजेशीर कमेंट्सही केल्या आहेत. 

भारत-पाकिस्तान सामन्याची तिकिटं 2 लाखांपर्यंत विकली गेली

भारत-पाकिस्तान सामन्याच्या सुरुवातीच्या तिकिटाची किंमत 12,500 रुपये होती. याशिवाय प्रीमियम आणि प्लॅटिनम स्टॅण्डची तिकिटं 31,200 आणि 54,100 रुपयांना विकली गेली. मात्र, आता या तिन्ही श्रेणींची तिकिटं विकली गेली आहेत.