थोड्याच वेळात होणार आयर्लंड, इंग्लंड दौऱ्यासाठी टीम इंडियाची निवड

बंगळुरू : अफगाणिस्तानविरुद्धची एकमेव कसोटी, आयर्लंड दौ-यावरील टी-२० मालिका, इंग्लंड दौ-यावरील टी-२० आणि एकदिवसीय मालिकेसाठी आज संध्याकाळी भारतीय क्रिकेट संघाची निवड केली जाणार आहे. विराट कोहली हा काऊंटी क्रिकेट खेळत असल्यानं त्याच्या गैरहजेरीत अफगाणिस्तानविरुद्धच्या एकमेवत कसोटीत अजिंक्य रहाणेकडे कर्णधारपद सोपवण्यात येण्याची दाट शक्यता आहे... तर श्रेयस अय्यरला विराट कोहलीच्या स्थानी संधी मिळण्याची शक्यता आहे... तर आर्यलंडविरुद्धच्या दोन टी-२० मालिकेसाठी रोहित शर्माकडे कर्णधारपद दिलं जाण्याची शक्यता आहे.

मात्र, अफगाणविरुद्धच्या कसोटीसाठी रोहितला संधी न मिळण्याची शक्यता आहे. चेतेश्वर पुजारा, मुरली विजय, के. एल. राहुल, शिखर धवन यांची कसोटी संघातील स्थान निश्चित मानण्यात येत आहे... तर श्रीलंकेत धमाका करणारा दिनेश कार्तिक आणि टी-२० मध्ये चमकदार कामगिरी करणारा अंबाती रायडू यांची टी-२० मालिकेसाठी निवड होऊ शकते.

युवा पृथ्वी शॉ, शुभमन गिल, शिवम मावी यांची भारतीय 'अ' संघात निवड निश्चित मानली जात आहे. आज संध्याकाळी साडे पाच वाजता बंगळुरु इथं संघ निवड केली जाणार आहे.