Bangladesh Explosion: बांगलादेशमध्ये (Bangladesh) एका बहुमजली इमारतीत भीषण स्फोट (Explosion) झाला आहे. या स्फोटात 14 जण ठार झाले असून 100 हून अधिक जखमी झाले आहेत. राजधानी ढाकामधील (Dhaka) गुलिस्तान (Gulistan) परिसरात हा स्फोट झाला आहे. मंगळवारी दुपारी 4 वाजण्याच्या सुमारास हा स्फोट झाला. स्फोटाची माहिती मिळताच, अग्निशमन दलाच्या 11 गाड्या घटनास्थळी दाखल झाल्या असून बचावकार्य सुरु करण्यात आलं आहे. 


स्फोटात जखमी झालेल्यांना उपचारासाठी रुग्णालयात दाखल करण्यात आलं आहे. ढाका मेडिकल कॉलेज रुग्णालयात त्यांच्यावर उपचार सुरु आहेत. रहदारी असणाऱ्या सिद्दिकी बाजारमध्ये ही इमारत आहे. या इमारतीत अनेक कार्यालयं आणि दुकानं आहेत. सात माळ्यांची ही इमारत असून तळमजल्यातील एका दुकानात हा स्फोट झाला आहे. या दुकानात सॅनिटेशनचं सामान विकलं जात होतं.