અમદાવાદની 7 અને રાજકોટની 2 ટીપીને મળી રાજ્ય સરકારની મંજૂરી

હિતલ પારેખ/ગાંધીનગરઃ રાજ્યના મુખ્યમંત્રી વિજય રૂપાણી દ્વારા શહેરી વિકાસના આયોજનને વધુ ગતિ આપવા માટે અમદાવાદ શહેરની 7 અને રાજકોટ શહેરની 2 ટીપી સ્કીમને મંજૂરી આપવામાં આવી છે. અમદાવાદમાં 5 ટ્રાફ્ટ અને 2 ફાઈનલ ટીપી સ્કીમને મંજુરી અપાઈ છે, જ્યારે રાજકોટ શહેરની એક પ્રારંભિક અને એક ફાઈનલ ટીપી સ્કીમને મંજૂરી પાઈ છે. આ ડ્રાફ્ટ સ્કીમ મંજૂર થવાને કારણે સંબંધિત વિસ્તારોમાં રસ્તાઓના નિર્માણકાર્યની સાથે જ આંતર-માળખાકીય સુવિધાઓમાં ઝડપી વધારો થશે. 

ઉલ્લેખનીય છે કે, રાજ્યના મુખ્યમંત્રી વિજય રૂપાણીએ છેલ્લા એક વર્ષમાં માત્ર અમદાવાદ શહેરની જ કુલ 43 ડ્રાફ્ટ ટીપી સ્કીમને મંજૂરી આપી હતી. જેના કારણે શહેરના 3000 હેક્ટરથી પણ વધુ વિસ્તારમાં શહેરી આયોજનને એક માળખાકીય ઓપ મળ્યો હતો. આ સાથે જ મુખ્યમંત્રી રૂપાણીએ TPO/CTP વિભાગને બાકી રહેતી TP પણ તાત્કાલિક રીતે પૂર્ણ થાય અને શહેરના વિકાસમાં TPનો વિલંબ બાધારૂપ ન બને તેવા દિશા-નિર્દેશ આપ્યા હતા. 

અમદાવાદની મંજૂર થયેલી ટીપી સ્કીમ 
(1) 454(હંસપુરા), (2) 505 (કઠવાડા), (3) 243 (રણાસણ-મુઠીયા-ચિલોડા), (4) 416/A (વસ્ત્રાલ), (5) 117 (કઠવાડા) 

રાજકોટની મંજૂર થયેલી ટીપી સ્કીમ 
(1) TP 20 ( નાના મવા), (2) TP 10 (નાના મવા-ફાઈનલ)

અમદાવાદને થનારો ફાયદો
અમદાવાદ શહેરની 115 હેક્ટર્સ જેટલી જમીન રસ્તાઓ માટે અને આશરે 152.48 હેક્ટર જેટલી જમીન અર્બન ડેવલપમેન્ટ ઓથોરિટીને બાગ-બગીચા, ખુલ્લી જમીન, સોશિયલ ઈન્ફ્રાસ્ટ્રક્ચર ફેસેલિટીઝ, આર્થિક-સામાજિક વર્ગના લોકોના રહેણાંક અને વાણિજ્ય રહેણાંકના પ્લોટ પાડવા માટે પ્રાપ્ત થશે. EWS આવાસો માટે 3.73 લાખ ચોરસ મીટર જેટલી જમીન પ્રાપ્ત થશે.