MP: જબલપુરમાં BJP કાર્યકરની હત્યા કરી લાશ રેતીમાં દફનાવી દીધી, લખ્યું 'The End'

જબલપુર: મધ્ય પ્રદેશના જબલપુર સંભાગના ભેડાઘાટ પોલીસ સ્ટેશનની હદના સ્વર્ગદ્વારી પાસે એક યુવકની હત્યા કરીને મૃતદેહને રેતીમાં દફન કરવાનો ચોંકાવનારો મામલો સામે આવ્યો છે. એટલું જ નહીં યુવકના મૃતદેહ પર 'The End' લખીને તેને રેતીમાં દફન કરી દેવાયું. મળતી માહિતી મુજબ મૃતકનું નામ ઋષભ જૈન ઉર્ફે સોનુ (27 વર્ષ) હોવાનું જાણવા મળ્યું છે જે ભાજપનો કાર્યકર હતો અને ગુરુવારે રાતે ઘરેથી એક કાર્યક્રમમાં સામેલ થવા માટે બાઈકથી નીકળ્યો હતો. ગુરુવારે ઘરેથી નીકળ્યા બાદ તે આખી રાત  ઘરે પાછો ન ફર્યો. ત્યારબાદ સોનુના પરિજનોએ સોનુ સાથે વાત કરવાની કોશિશ કરી પરંતુ ફોન ન લાગતા પરિજનોએ શુક્રવારે સવારે સોનુ ગુમ થયો હોવાની ફરિયાદ નોંધાવી. ત્યારબાદ પોલીસને શુક્રવારે બપોરે 3 વાગ્યાની આસપાસ સોનુની બાઈક મળી. 

સોનુની બાઈક પાસે મળેલા લોહીના ધબ્બાને જોતા પોલીસ તેના પર આગળ વધી અને સોનુનો મૃતદેહ રેતીમાં દફનાવેલો જોવા મળ્યો. જેના પર 'The End' લખેલુ હતું. મૃતદેહ મળતા જ સોનુના પરિવારને તેની જાણ કરાઈ. સૂચના મળતા જ પરિજનો સ્થળે પહોંચ્યા અને પોલીસે એસડીએમની હાજરીમાં મૃતદેહને રેતીમાંથી બહાર કઢાવ્યો તથા પોસ્ટમોર્ટમ માટે મોકલી આપ્યો. આ સાથે જ પોલીસે મૃતક યુવકની બાઈક કબ્જે કરી લીધી છે અને ઘટનાસ્થળને સીલ કરીને તેની તપાસ શરૂ કરી દીધી છે. પોલીસે અજાણ્યા લોકો વિરુદ્ધ હત્યાનો કેસ દાખલ કરીને આસપાસના લોકોની પૂછપરછ શરૂ કરી દીધી છે. 

જુઓ LIVE TV

અત્રે જણાવવાનું કે જબલપુરના બરગી વિધાનસભા વિસ્તારની આ ઘટના છે. મૃતક સોનુ ભેડાઘાટના પંચવટીનો રહીશ હતો. સોનુની હત્યા બાદ સમગ્ર પરિવારમાં માતમ પ્રસરી ગયો છે. સોનુના પરિજનોએ પૂછપરછમાં કોઈ પણ અંગત અદાવત હોવાનો ઈન્કાર કર્યો હતો. અત્રે જણાવવાનું ઋષભ પર હાલ ભારતીય જનતા પાર્ટી યુવા મોરચા નગર મહામંક્ષી પદની જવાબદારી હતી અને તેણે લાંબા સમયથી દારૂ અને ગેરકાયદેસર રેતી ઉત્ખનન વિરુદ્ધ મુહમ છેડી રાખી હતી. ઋષભના પિતા પવન જૈનની પંચવટીમાં જૈન માર્બલ આર્ટ નામની દુકાન છે. સોનુ પણ આ જ દુકાનમાં પિતા અને ભાઈઓ સાથે કામ કરતો હતો.