ગુજરાતની દિકરી સરિતા ગાયકવાડે એશિયન ગેમ્સમાં જીત્યો ગોલ્ડ, આદિવાસી સમાજે આપ્યું 1 લાખનું ઈનામ

અમદાવાદ. ગુરૂવારે એશિયન ગેમ્સમાં ગુજરાતની દીકરીએ ભારતનું નામ રોશન કર્યું  છે. એશિયન ગેમ્સમાં ભારતની મહિલાઓની ટીમે 4x400મી. રિલે દોડમાં ગોલ્ડ જીત્યો હતો. આ ટીમમાં ગુજરાતના ડાંગમાં જન્મેલી સરિતા ગાયકવાડ પણ હતી. સરિતા ઉપરાંત તેની ટીમમાં હિમા દાસ, પૂવમ્મા રાજુ અને વિસમાયા વેલુવાકોરોથ પણ હતી. ભારતીય મહિલાઓની ટીમે 3 મિનિટ 28.72 સેકન્ડમાં 4x400મી.ની રિલે દોડ પૂરી કરીને પ્રથમ નંબર મેળવ્યો હતો. આ સાથે જ તેમણે ગોલ્ડ પોતાને નામ કર્યો હતો.

સરીતા ગાયકવાડે એથલેટિક્સમાં ગુજરાતનું અનેક વખત નામ રોશન કર્યું છે તેનો પુરાવો તેના ઘરમાં લટકતા આ મેડલ છે. તેણે અનેક રાષ્ટ્રીય અને આંતરરાષ્ટ્રીય મેડલ મોતાને નામ કર્યા છે.

સરીતાનો પરિવાર તેણે મેળવેલી સિદ્ધિ બદલ ભાવવિભોર થઈ ગયો હતો. 

સરિતના પરિવારજનોએ તેણે અત્યાર સુધી જીતેલા મેડલ સાથેના ફોટા પણ ફ્રેમમાં ઘડીને ઘરમાં લગાવી રાખ્યા છે. પરિવારને તેમની દીકરીની ઉપલબ્ધીઓ પર ખુબ જ ગર્વ છે.

ડાંગ જિલ્લામાં આવેલું સરિતાનું ઘર. તમને કદાચ એ જાણીને આશ્ચર્ય થશે કે ભારતની ગોલ્ડન ગર્લ કેવા ઘરમાં રહે છે. તે અત્યંત સાદાઈથી પોતાનું ગુજરાન ચલાવે છે.

સરિતાની માતા તસવીરમાં નજરે પડે છે. તેમણે સરિતાની આ સિદ્ધિ બદલ ગર્વની લાગણી અનુભવી હતી.

સરિતાના ઘરમાં કોઈ પણ પ્રકારની આધુનિક સુખ-સુવિધાઓ નથી તે આ તસવીર જોઈને સ્પષ્ટ થાય છે. તેમ છતાં આપણી દિકરીએ તમામ અડચણો પાર કરીને દુનિયામાં ગુજરાતનું અને ડાંગ જિલ્લાનું નામ રોશન કર્યું છે.