ന്യൂഡല്ഹി: പ്ലാസ്റ്റിക് നോട്ടുകൾ ഉടൻ അവതരിപ്പിക്കുമെന്ന് കേന്ദ്രസർക്കാർ ലോക്സഭയിൽ. പത്തു രൂപയുടെ പ്ലാസ്റ്റിക് നോട്ടുകൾ തെരഞ്ഞെടുത്ത അഞ്ച് സിറ്റികളിൽ പുറത്തിറക്കുമെന്ന് ധനകാര്യ സഹമന്ത്രി പൊൻ രാധാകൃഷ്ണൻ ലോക്സഭയിൽ അറിയിച്ചു.
കൊച്ചി, മൈസൂരു, ജയ്പുർ, ഷിംല, ഭുവനേശ്വർ എന്നീ നഗരങ്ങളിലാണ് പ്ലാസ്റ്റിക് നോട്ടുകൾ പുറത്തിറക്കുന്നത്.
അതേസമയം, രണ്ടായിരം രൂപ നോട്ടിന്റെ അച്ചടി അവസാനിപ്പിക്കാൻ തീരുമാനമില്ലെന്ന് അദ്ദേഹം വ്യക്തമാക്കി. സമീപഭാവിയിലൊന്നും 2000 രൂപയുടെ അച്ചടി അവസാനിപ്പിക്കാൻ ആലോചനയില്ലെന്ന് പൊൻ രാധാകൃഷ്ണൻ അറിയിച്ചു.
പുതിയ 500, 2000 നോട്ടുകൾ തമ്മിൽ വലുപ്പത്തിൽ 10 മില്ലിമീറ്റർ വ്യത്യാസമുണ്ടെന്നും അതിനാൽ പെട്ടെന്ന് തിരിച്ചറിയാൻ സാധിക്കുമെന്നും അദ്ദേഹം ചോദ്യത്തിന് മറുപടിയായി സഭയെ അറിയിച്ചു.