ഓക്‌ലൻഡ്: വേള്‍ഡ് മാസ്റ്റേഴ്സ് ഗെയിംസിന്‍റെ 100 മീറ്റർ ഓട്ടത്തിൽ 101 കാരനായ മൻ കൗറിന് സ്വർണം. ഛണ്ഡിഗഡ് സ്വദേശിയാണ് കൗർ. ന്യൂസീലന്‍ഡിലെ ഓക്ക്‌ലന്‍ഡില്‍ നടന്ന വേള്‍ഡ് മാസ്റ്റേഴ്സ് ഗെയിംസിലാണ് മന്‍ കൗര്‍ എന്ന ഈ താരം സ്വര്‍ണം നേടിയത്. കൗറിന്‍റെ കരിയറിലെ പതിനേഴാം സ്വര്‍ണമായിരുന്നു അത്.
ഒരു മിനിറ്റും 14 സെക്കന്‍റും കൊണ്ടാണ് കൗർ 100 മീറ്റർ പൂർത്തിയാക്കിയത്. 2009 ലെ ഉസൈൻ ബോൾട്ട് സ്ഥാപിച്ച ലോക റിക്കാർഡിനേക്കാൾ 64.42 സെക്കന്‍റ് അധികസമയം എടുത്താണ് കൗർ ഓട്ടം പൂർത്തിയാക്കിയത്.
മത്സരം ആസ്വദിച്ചെന്നും താൻ വളരെ സന്തോഷവാനാണെന്നും മത്സരശേഷം കൗർ പറഞ്ഞു. ഓട്ടം നിർത്തുകയില്ല. ഇനിയും മത്സരങ്ങളിൽ പങ്കെടുക്കുമെന്നും പരിശീലനം തുടരുമെന്നും കൗർ വ്യക്തമാക്കി.
എട്ടു വര്‍ഷം മുമ്പാണ് കൗര്‍ അത്‌ലറ്റിക്‌സ് ഗൗരവമായി എടുത്തത്. മകന്‍ ഗുരുദേവ് സിങ്ങിന്‍റെ പ്രചോദനവും കൗറിന് കൂട്ടിനുണ്ടായിരുന്നു. 200 മീറ്റര്‍ ഓട്ടത്തിലും ഷോട്ട്പുട്ടിലും ജാവലിന്‍ ത്രോയിലും ഇനി കൗറിന് പങ്കെടുക്കാനുണ്ട്.
