കാബൂള്: മുഫ്തി നൂര് വാലി മെഹ്സൂദിനെ പാക് താലിബാന് തലവനായി തെരഞ്ഞെടുത്തു.
അമേരിക്കയുടെ ഡ്രോണ് ആക്രമണത്തില് കൊല്ലപ്പെട്ട കമാന്ഡര് മുല്ല ഫസലുള്ളയ്ക്കു പകരക്കാരനായാണ് മെഹ്സൂദിനെ തെരഞ്ഞെടുത്തത്. താലിബാന് കൗണ്സില് ചേര്ന്നാണ് സൗത്ത് വസീരിസ്ഥാന് സ്വദേശിയായ മെഹ്സൂദിനെ തെരഞ്ഞെടുത്തത്.
2014ല്, എട്ട് താലിബാന് ഭീകരര് കൊല്ലപ്പെട്ട അമേരിക്കന് ഡ്രോണ് ആക്രമണത്തില് നിന്നും രക്ഷപെട്ടയാളാണ് മുപ്പത്തിയൊന്പതുകാരനായ മെഹ്സൂദ്. നിലവില് മെഹ്സൂദ് എവിടെയാണന്നതു സംബന്ധിച്ച് അറിവില്ല. അഫ്ഗാനിസ്ഥാനില് ഒളിവിലാണെന്നാണ് സൂചന.
അഫ്ഗാനിസ്ഥാനിലെ കുനാര് പ്രവിശ്യയില് അമേരിക്ക നടത്തിയ ഡ്രോണ് ആക്രമണത്തിലാണ് മുല്ല ഫസലുള്ള കൊല്ലപ്പെട്ടത്. ഫസലുള്ളയും മറ്റു കമാന്ഡര്മാരും ഇഫ്താര് വിരുന്നില് പങ്കെടുക്കുമ്പോഴായിരുന്നു യുഎസ് ആക്രമണം.
പെണ്കുട്ടികളുടെ വിദ്യാഭ്യാസ അവകാശത്തിനായി ശബ്ദമുയര്ത്തിയ പാക് വിദ്യാര്ഥിനിയും, സാമൂഹ്യ പ്രവര്ത്തകയും പിന്നീട് നൊബേല് സമ്മാന ജേതാവുമായ മലാല യൂസഫ് സായിയെ കൊലപ്പെടുത്താന് ഉത്തരവിട്ടത് ഫസലുള്ളയായിരുന്നു.
132 വിദ്യാര്ഥികള് ഉള്പ്പെടെ 151 പേരുടെ മരണത്തിനിടയാക്കിയ 2014ലെ പെഷവാര് സൈനിക സ്കൂള് ആക്രമണത്തിന് ഉത്തരവിട്ടതും ഫസലുള്ളയായിരുന്നുവെന്നു പറയപ്പെടുന്നു. മുഫ്തി ഹസ്രത്തുള്ളയാണ് പുതിയ ഡപ്യൂട്ടി കമാന്ഡര്.