ଇପସିତା ହେବେ କୁଲଦୀପଙ୍କ ରାଜଧାନୀ କୁଇନ୍

ଭୁବନେଶ୍ୱର: ଓଲିଉଡ ଆଲବମ ଓ ଫିଲ୍ମରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ୟଙ୍ଗ ସିଙ୍ଗର କୁଲଦୀପ ଓ ଗାୟିକା ଇପସିତା ପଣ୍ଡା ଖୁବଶୀଘ୍ର ବିବାହ କରିବାକୁ ଯାଉଛନ୍ତି। ଏହି ଦୁଇ ଷ୍ଟାର କଣ୍ଠଶିଳ୍ପୀଙ୍କ ବିବାହର ପ୍ରଥମ ପାହାଚ ଅତିକ୍ରମ କରିଛନ୍ତି । ଅର୍ଥାତ୍ ଆଜି ଏହି ଦୁଇ କଣ୍ଠଶିଳ୍ପୀଙ୍କ ନିର୍ବନ୍ଧ ଶେଷ ହୋଇଛି । ଏନେଇ ନିଜେ ସୋସିଆଲ ମିଡିଆରେ ପୋଷ୍ଟ କରିଛନ୍ତି କୁଲଦୀପ ପଟ୍ଟନାୟକ।

ସପରିବାରଙ୍କ ଗହଣରେ ନିର୍ବନ୍ଧ ହୋଇଥିବା ବେଳେ କିଛି ଫଟୋ ନିଜ ଫେସବୁକରେ ପୋଷ୍ଟ  କରିଛନ୍ତି ଯାହାକୁ ନେଇ ଏବେ ଖୁବ ଚର୍ଚ୍ଚା ଚାଲିଛି । କୁଲଦୀପ ପଟ୍ଟନାୟକ (Kuldeep pattanaik) ଆଲବମ ଜଗତରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ଗାୟିକା ଇପସିତା ପଣ୍ଡା (Ipseeta Panda) ମଧ୍ୟ ଜଣେ କଣ୍ଠଶିଳ୍ପୀ । ଅନେକ ଆଲବମ ସହ ଭଜନରେ ସେ ତାଙ୍କର ସୁନ୍ଦର କଣ୍ଠଦାନ କରି ତାଙ୍କ ଫ୍ୟାନ୍ସଙ୍କ ମନ ଜିଣିଛନ୍ତି । ଅନ୍ୟପଟେ ଏହି କଣ୍ଠଶିଳ୍ପୀ ଓଡ଼ିଆ ସଙ୍ଗ୍ ରାଜଧାନୀ କ୍ୱିନରେ କଣ୍ଠଦାନ ବି କରିଛନ୍ତି। କେବଳ ରାଜଧାନୀ କୁଇନ ନୁହେଁ ଅନେକ ଆଲବମରେ ଏମାନେ ଏକାଠି କାମ ବି କରିଛନ୍ତି ।

ତେବେ ଏହି ଦୁଇ ଷ୍ଟାର କଣ୍ଠଶିଳ୍ପୀଙ୍କ ନିର୍ବନ୍ଧ ଶେଷ ହୋଇଥିବା ବେଳେ ବାହାଘର କେବେ ସେନେଇ କୌଣସି ଖବର ମିଳିପାରିନାହିଁ । ତେବେ ଜୀ ଓଡ଼ିଶା (Zee Odisha)  ପରିବାର ପକ୍ଷରୁ ଦୁହିଁଙ୍କୁ ଅନେକ ଅନେକ ଶୁଭେଚ୍ଛା ଓ ଶୁଭକାମନା।