ଅନୁଙ୍କ ନୂଆସାଥୀ ସୋମେଶ !

ସୌଭାଗ୍ୟ ରଞ୍ଜନ ମିଶ୍ର, ନୂଆଦିଲ୍ଲୀ: ଓଡ଼ିଆ ଚଳଚ୍ଚିତ୍ର ଦୁନିଆର ଏକ ଚିର ପରିଚିତ ଚେହେରା ଅନୁ ଚୌଧୁରୀ । ବଡ଼ ପରଦାରେ ହସାଉଥିବା ଓ କନ୍ଦାଉଥିବା ଏହି ଅଭିନେତ୍ରୀ ଏବେ ଟେଲିଭିଜନରେ ଖୁବଶୀଘ୍ର ନିଜର କମାଲ ଦେଖାଇବାକୁ ଯାଉଛନ୍ତି । ଦୀର୍ଘ ୨ ଦଶନ୍ଧି ଧରି ୬୫ ରୁ ଅଧିକ ଓଡ଼ିଆ ଚଳଚ୍ଚିତ୍ରରେ ଅଭିନୟ କରିସାରିଛନ୍ତି ଅନୁ ଚୌଧୁରୀ । ତାଙ୍କର ସୁନ୍ଦର ଅଭିନୟ ଓ ନୃତ୍ୟରେ ତାଙ୍କ ଫ୍ୟାନ୍ସ ମାନଙ୍କୁ ବାନ୍ଧି ରଖିଛନ୍ତି। ସେ ଯେ କେବଳ ଓଲିଉଡରେ ଚର୍ଚ୍ଚିତ ତାହା ନୁହେଁ,  ବେଙ୍ଗଲୀ , ତେଲୁଗୁ ଏବଂ ହିନ୍ଦୀ ଫିଲ୍ମସରେ ଦର୍ଶକ ତାଙ୍କ ଅଭିନୟର ଯାଦୁ ଦେଖିଛନ୍ତି। ଆଉ ଏବେ ପୁଣିଥରେ ଚର୍ଚ୍ଚାରେ ଏହି ଅଭିନେତ୍ରୀ। କାରଣ ଅନୁଙ୍କୁ ମିଳିଯାଇଛି ତାଙ୍କ ନୂଆ ସାଥୀ। 

ବାସ୍ତବରେ ଜୀ ସାର୍ଥକ (Zee Sarthak) ପୁଣିଥରେ ନିଜ ଦର୍ଶକଙ୍କ ପାଇଁ ହୋଲି ସରପ୍ରାଇଜ ଦେବାକୁ ଯାଉଛି। ମାର୍ଚ୍ଚ୧୪ ରୁ ଆରମ୍ଭ ହେବାକୁ ଯାଉଛି ଅନୁଙ୍କ ସିରିଏଲ ଯାତ୍ରା। ଟେଲିଭିଜନ ଦୁନିଆରେ କ୍ରାନ୍ତି ଆଣିଥିବା ଏଣ୍ଟରଟେନମେଣ୍ଟ ଚ୍ୟାନେଲ୍ ଜୀ ସାର୍ଥକ ସଦା ସର୍ବଦା ତାର ଦର୍ଶକ ମାନଙ୍କ ପାଇଁ ମନପସନ୍ଦର ଧାରାବାହିକ ନେଇ ଆସିଥାଏ । ଓଡିଆ କଳା, ସଂସ୍କୃତି ଓ ଚାଲିଚଳନକୁ ସର୍ବଦା ପ୍ରାଥମିକତା ଦେଇ ଆସିଛି ଜୀ ସାର୍ଥକ ।ତେବେ ସେହି ଧାରାରେ ସାମିଲ ହେବାକୁ ଯାଉଛି ଜୀ ସାର୍ଥକର ମେଗା ଧାରାବାହିକ "ସର୍ବଜିତା ଅନୁ"। 

ତେବେ ଏହି ଧାରାବାହିକରେ ଅନୁଙ୍କ (Anu Choudhury) ସାଥ୍ ଦେବେ ସୋମେଶ ମହାନ୍ତି (Actor Somesh Mohanty)। ସୋମେଶ ଏହି ଧାରାବାହିକରେ ଏକ ଲିଡ କ୍ୟାରେକ୍ଟରରେ ରହିଛନ୍ତି। ଅନୁଙ୍କ ସ୍ୱାମୀ ଭୂମିକାରେ ନଜର ଆସିବେ ସୋମେଶ।ତେବେ ଏଠାରେ କହିରଖୁଛୁ ସୋମେଶ ମହାନ୍ତି ଓଲିଉଡ ଦୁନିଆରେ ଜଣେ ଚର୍ଚ୍ଚିତ ଚେହେରା। ଅନେକ ଓଡ଼ିଆ ଧାରିବାହିକ ଓ ଆଲବମରେ ସେ ନିଜର ପରାକାଷ୍ଠା ଦେଖାଇଛନ୍ତି। ଆଉ ଏହି ଧାରାବାହିକରେ ଦୁହିଁଙ୍କ ଯୋଡିକୁ ଦର୍ଶକ ଖୁବ ପସନ୍ଦ କରିବେ ବୋଲି ପୁରା ୟୁନିଟ୍ ଆଶା ରଖିଛି। 

ଆସନ୍ତା ୧୪ ତାରିଖ ଠାରୁ ସନ୍ଧ୍ୟା ୮ ଟାରେ ଏହି ମେଗା ଧାରାବାହିକ ପ୍ରସାରଣ ଆରମ୍ଭ ହେବାକୁ ଯାଉଛି । ଏହାକୁ ନେଇ ଦର୍ଶକଙ୍କ ଭିତରେ ଅନେକ ଉତ୍କଣ୍ଠା ଭରି ରହିଛି । ପୂର୍ବ ସିରିଏଲ୍ ପରି "ସର୍ବଜିତା ଅନୁ" ମଧ୍ୟ ଦର୍ଶକଙ୍କ ମନୋରଞ୍ଜନ ଆବଶ୍ୟକତାକୁ ପୂରଣ କରିବ ବୋଲି କହିଛନ୍ତି ଜୀ ସାର୍ଥକ ଚ୍ୟାନେଲ ମୁଖ୍ୟ  ଅର୍ଘ୍ୟ ରାୟ ଚୌଧୁରୀ । 

ଯଦି ଅଭିନେତ୍ରୀଙ୍କ ଅତୀତ ବିଷୟରେ କହିବା ତେବେ, ଗ୍ଲାମର ଇଣ୍ଡଷ୍ଟ୍ରିରେ ବେଶ୍ ସୁନାମ ଅର୍ଜନ କରିଥିବା ଅନୁଙ୍କୁ ୨୦୦୫ ମସିହାରେ ଫିଲ୍ମ ଶାଶୂଘର ଚାଲିଯିବି (Odia Film Sasu ghara chalijibi) ରେ ଆକର୍ଷଣୀୟ ଅଭିନୟ ପାଇଁ ମିଳିଥିଲା ଓଡି଼ଶା ରାଜ୍ୟ ଫିଲ୍ମ ପୁରସ୍କାର ।  ତେବେ ସିରିଏଲ ଦୁନିଆରେ ପୁଣିଥରେ ନିଜର ଜଲୱା ଦେଖାଇବାକୁ ଛୋଟ ପରଦାକୁ ଆସୁଛନ୍ତି ଅନୁ ଚୌଧୁରୀ। ସୂଚନାନୁସାରେ,  ଆଗରୁ "କେମିତି କହିବି କହ"ରେ ସୁପରଷ୍ଟାର ସିଦ୍ଧାନ୍ତ ଓ "ଦାଦାଗିରି"ରେ ଅନୁଭବଙ୍କ ଜଲୱା ପରେ ଏବେ "ସର୍ବଜିତା ଅନୁ"ରେ ଦର୍ଶକ ଦେଖିବେ ଏଭରଗ୍ରିନ୍ ନାୟିକା ଅନୁଙ୍କୁ ।